Action Wit Da Aposals 20:1-38
20 Wen da riot wuz pau, Paul tell da followas fo come by him. An afta he build dem up, he tell dem a hui hou an start fo head to Mac·e·doʹni·a.
2 He go thru dat area from town to town, giving da guys ova dea plenny good kine words. Den he get to Greece.
3 He stay dea fo three months. But da Jews wen make one plan fo kill him wen he wuz about fo get on one boat to Syria. So Paul decide fo go back thru Mac·e·doʹni·a.
4 Da guys traveling wit Paul wuz Sopʹa·ter, dass Pyrʹrhus boy from Be·roeʹa, two Thes·sa·loʹni·an guys named Ar·is·tarʹchus an Se·cunʹdus, Gaʹius from Derʹbe, Timothy, an Tychʹi·cus an Trophʹi·mus from da Asia districk.
5 Dese guys wen go ahead of us an wuz waiting dea in Troʹas.
6 But we sailed from Phi·lipʹpi afta da Festival Of Bread Dat No Moa Yeast,* an five days layta we met up wit dem in Troʹas. Den we stayed dea fo seven days.
7 On da firs day of da week wen we had get togedda fo eat, Paul started fo talk to evrybody dea cuz he wuz goin leave da nex day, an he ended up talking til midnight.
8 Had plenny lamps burning in da room upstairs wea we all wuz.
9 One guy named Euʹty·chus wuz sitting at da window. He wen knock out while Paul wuz still talking an wen fall down from da third story. Wen dey go pick him up, he wuz dead.
10 But Paul go downstairs an bend ova him an put his arms aroun him an sed: “No freak out, cuz he stay alive again.”*
11 Den Paul go upstairs an start fo eat.* He keep talking to dem til da sun come up, an den he leave.
12 So dey take da boy back home an dey wuz so happy he wuz alive.
13 We wen head to da boat fo go Asʹsos wea we wuz planning fo take Paul on board wit us. Paul told us fo meet him dea cuz he wuz goin walk um.
14 So wen he get to us in Asʹsos, he jump on da boat wit us fo go Mit·y·leʹne.
15 Da nex day, we sail away from dea an get close to da island of Chiʹos. But da day afta dat, we stop fas kine in Saʹmos. An da nex day, we got to Mi·leʹtus.
16 Paul decided fo sail pas Ephʹe·sus cuz he neva like spen time in da Asia districk. He wuz rushing, cuz if can, he wanted fo get to Jerusalem on da day of da Festival Of Pentecost.*
17 But wen he wuz in Mi·leʹtus, he sen one message to Ephʹe·sus fo ask da eldas in da hui fo meet up wit him.
18 Wen dey get to him, he sed to dem: “You guys know how I wen ack aroun you since da firs day I wen step foot in da Asia districk.
19 I wen stay humbo* working hahd fo da Lord, an I had cry plenny an go thru hahd times cuz da Jews wuz trying fo kill me.
20 An I neva hold back from telling you stuffs dat wuz good fo you or from teaching you in public or from house to house.
21 But I had talk to both Jews an Greeks an I had explain evryting real good about how dey gotta come sorry, turn to God, an put faith in oua Lord Jesus.
22 An try look! God’s powa stay moving me fo go Jerusalem, even tho I donno wat goin happen to me ova dea.
23 But from town to town, God use his powa fo tell me dat I goin get lock up an hahd times stay coming.
24 But az okay, cuz my own life no stay dat importan to me.* Wat matta to me iz dat I pau da work da Lord Jesus wen give me fo do, fo tell oddas da good news about God’s unreal love.*
25 “I wen tell you guys about God’s Govament. But from now on, you not goin see me anymoa.
26 So right now, you guys iz my witnesses dat nobody’s blood stay on me,*
27 cuz I neva hold back fo tell you God’s plan.*
28 Keep an eye on yoaself an on all da sheep, cuz God wen use his powa fo pick you fo look afta dem. Take kea God’s peopo like how one shepherd take kea da sheep, cuz God wen pay fo dem wit da blood of his own Son.
29 I know dat afta I leave, vicious wolfs goin come inside da hui an treat da sheep real mean kine.
30 Some of dem goin come from you guys an goin twist da trut fo make da braddahs an sistahs follow dem instead.
31 “So watch out, an no foget dat fo three years, day an night, I neva stop giving evry one of you advice, an I even wen cry talking to you.
32 So now I putting you in God’s hands an I leaving you wit da message about God’s unreal love dat can make you come strong an can give you da blessing God give to all da holy ones.
33 I neva try fo get anybody else’s silva, gold, or clothes.
34 You guys know dat I wen work wit my own hands fo take kea myself an da guys wit me.
35 I wen show you by evryting I did dat you gotta work hahd fo help da guys dat need um. An no foget wat da Lord Jesus sed: ‘You goin be moa happy wen you give to oddas, den if oddas give to you.’”
36 Afta Paul sed dis, he go down on his knees wit all dem an pray.
37 Evrybody wen buss out crying an dey all wen hug* an kiss Paul,
38 cuz had hurt dem so much dat he sed dey wuzn’t goin see him anymoa. Den dey wen go wit him to da ship fo see him off.
Footnotes
^ Go check out “Festival Of Bread Dat No Moa Yeast” in Da Bible Dictionary.
^ In da original Greek dis wen mean “broke da bread”.
^ Or, “neva tink too much of myself”.
^ Or, “no mean notting to me”.
^ Go check out “Unreal Love” in Da Bible Dictionary.
^ Or, “I not responsible fo anybody’s death”.
^ Or, “evryting God like do”.
^ In da original Greek dis wen mean “wen fall on to Paul’s neck”.
