Action Wit Da Aposals 10:1-48
10 Had one guy in Caes·a·reʹa named Cornelius dat wuz one army officer of 100 soldiers from da Italian troop.*
2 He had respeck God plenny an wen worship him wit his family. He did good tings fo guys dat wuz pooa* an wen pray hahd to God all da time.
3 Aroun 3 o’clock in da aftanoon,* he see in one vision one angel come to him an say: “Cornelius!”
4 Cornelius stare at him all sked an ask: “Yeah Lord?” He tell um: “God wen hea yoa prayas an see all da good tings you do fo oddas.
5 So now sen some guys to Jopʹpa fo look fo one guy named Simon who stay called Peter, an tell him fo come.
6 He staying wit Simon, one tanner* dat live by da sea.”
7 Right afta da angel leave, Cornelius call two of his workas an one soldier dat worship God,
8 an he tell evryting to dem an sen dem to Jopʹpa.
9 Da nex day, wen dey wuz on da road an coming close to da town, Peter went to da roof fo pray, wuz aroun 12 o’clock in da aftanoon.*
10 But he come supa hungry an wanted fo eat. Wen dey wuz making food, he see one vision.
11 He see da sky open up an someting* coming down to da earth like one big linen sheet dat wuz bein let down by da four cornas.
12 An inside um had all kine animals wit four feet an tings like snakes an lizards* an birds dat fly.
13 Den one voice sed to him: “Get up Peter, kill one of dose animals an eat um!”
14 But Peter sed: “No ways Lord, I neva eva ate anyting da Law sed I not suppose to.”*
15 Da voice talk to him again an tell: “Wat God say iz good, stop saying iz no good.”
16 Da voice talk one moa time. Den right away, da ting* Peter wen see go back into da sky.
17 Wen Peter wuz still trying fo figga out wat da vision mean, right den an dea da guys Cornelius sen wen show up at Simon’s house an wuz standing by da gate.
18 Dey call out fo ask if Simon, da guy dass called Peter, wuz staying dea.
19 Peter wuz still tinking about da vision wen God use his powa fo tell him: “Eh! Three guys stay asking fo you.
20 So get up, go downstairs, an go wit dem. No tink twice about um, cuz I wen sen dem.”
21 Den Peter go downstairs to da guys an sed: “Dass me, da guy you looking fo. How come you stay hea?”
22 Dey tell: “We hea cuz of one army officer named Cornelius. He one righteous guy dat worship God an all da Jews talk good about him. God wen use one angel fo tell him fo make you come his house an lissen wat you get fo say.”
23 So he tell dem come inside an had dem stay ova.
Da nex day, he get up an go wit dem. Some of da braddahs from Jopʹpa go wit him too.
24 Da day afta dat, he get to Caes·a·reʹa. Cornelius wuz waiting fo dem come an had get togedda his relatives an good frenz.
25 Wen Peter get dea, Cornelius come fo meet him an wen fall to his feet fo show him respeck.*
26 But Peter lif him up an tell: “Get up, I jus one guy like you.”
27 Az Peter wuz talking story wit him, he go inside da house an see plenny peopo all togedda.
28 He sed to dem: “You know az not right fo one Jew hang out wit or come visit one guy of anodda race. But still yet, God wen show me dat iz not right fo me tell dat somebody iz pilau an no good.
29 So I neva ask no questions an I jus wen come. Dass why I asking you now: ‘How come you wen tell me fo come?’”
30 Den Cornelius sed: “Wuz about dis time four days ago wen I wuz praying in my house. Wuz about 3 o’clock in da aftanoon an one guy in bright clothes wuz standing right in front me,
31 an he sed: ‘Cornelius, God wen hea yoa praya an he see da good tings you do fo odda peopo.
32 So sen guys to Jopʹpa an go ask fo Simon who stay called Peter. He staying at Simon’s house, one tanner dat live by da sea.’
33 Real fas I wen sen guys to you, an you wuz nice enuff fo come. So now we stay all togedda in front God, an we ready fo hea wateva Jehovah* told you fo tell us.”
34 Wen Peter hea dis, he start fo say: “Now I know fo shua dat God treat evrybody da same.
35 God no kea wea somebody come from, but da guy dat get plenny respeck fo him an do wass right, God stay happy wit him.
36 God wen sen his message to da peopo of Israel fo tell dem da good news of peace cuz of wat Jesus Christ did. He da Lord of all peopo.
37 You heard da talk dat wuz goin aroun afta John wen tell oddas about baptizum. Wen start in Galʹi·lee an had spread all ova Ju·deʹa.
38 Wuz about Jesus from Nazʹa·reth, an how God wen use his powa fo pick him.* He go all ova doin good tings an healing all da peopo dat suffa cuz of da Devil, cuz God wuz wit him an gave him powa.
39 An all da tings he did, we seen um fo ouaself, both in da towns wea da Jews live an in Jerusalem. But dey wen put him on da pos* an kill um.
40 An God wen bring him back to life three days layta an let peopo see him,
41 but not evrybody, ony da peopo God wen pick befoa. Dass us, who wen eat an drink wit him afta he wen come back to life.
42 An he told us fo tell da peopo evryting about dis guy dat God sed goin judge da living an da dead.
43 All da prophets wen talk about Jesus. Dey sed dat thru him, God goin fogive da sins of evrybody dat believe in him.”
44 Wen Peter wuz still talking about dese tings, God wen give his powa to all da guys lissening to da message.
45 An da believas dat wuz circumcised who wen come wit Peter wuz shocked, cuz da peopo dat no wuz Jews wuz getting da free gif of God’s powa too.
46 Dey heard dem talking in all kine diffren languages* an praising God. Den Peter sed:
47 “Dese guys wen get powa from God jus like us. Who can stop dem from getting baptized wit watta?”
48 Afta dat he tell dem fo get baptized fo show dey respeck Jesus Christ. Den dey ask him fo stay dea moa long.
Footnotes
^ Or, “unit”. One Roman army unit wuz 600 soldiers.
^ Or, “wen give gifs to da pooa”. Go check out “Gifs To Da Pooa” in Da Bible Dictionary.
^ In da original Greek dis wen mean “da ninth hour” afta da sun come up.
^ Dis somebody dat take animal skins an turn um into ledda.
^ In da original Greek dis wen mean “da sixth hour” afta da sun come up.
^ In da original Greek dis wen mean “someting used fo carry stuff”.
^ Or, “reptiles; creepy crawly kine animals”.
^ Or, “not clean”.
^ In da original Greek dis wen mean “da ting used fo carry stuff”.
^ Or, “bow down”.
^ In da original Greek dis wen mean “in tongues”.
