Action Wit Da Aposals 27:1-44
27 Dey decided fo have us sail to Italy, so dey wen turn Paul an some odda prisonas ova to one army officer named Julius. He from da troop of soldiers called Au·gusʹtus.
2 We got on one boat from Ad·ra·mytʹti·um dat wuz ready fo go sail to ports on da coast of da Asia districk. One Mac·e·doʹni·an guy from Thes·sa·lo·niʹca wuz wit us, his name wuz Ar·is·tarʹchus.
3 We got to Siʹdon da nex day, an Julius, cuz he get one big heart, wuz real nice to Paul an let him go see his frenz fo dem take kea him.
4 We wen leave dea an sail close to da island of Cyʹprus fo block da wind blowing agains us.
5 Den we sail thru da deep watta along da coast of Ci·liʹcia an Pam·phylʹi·a an wen dock at Myʹra in Lyʹci·a.
6 Ova dea, da army officer wen find one ship from Alexandria dat wuz goin Italy, an he made us get on um.
7 We wuz having hahd time an wen sail real slow fo some days til we made um to Cniʹdus. Cuz da wind wuz holding us back, we sailed close to Crete at Sal·moʹne fo help block da wind.
8 An fighting da wind along da coast, we get to one place called Fair Havens, which wuz close by da town of La·seʹa.
9 Plenny days go by, an now wuz too dangerous fo sail. Even da day fo fast* wuz awready pau, so Paul give dem advice
10 an tell dem: “You guys, I can tell dat if we keep on goin, we not goin ony lose oua cargo an da ship, but oua life* too.”
11 But da army officer lissen to da captain an da owna of da ship radda den Paul.
12 Cuz no wuz good fo stay in dat harbor fo da winta, mos of da guys wanted fo leave an try make um to Phoenix fo spen da winta ova dea. Dat wuz one harbor in Crete dat you can reach from da northeast an da southeast.
13 Wen da south wind started fo blow small kine, dey thought dey wuz good fo go, so dey pull up da anchor an start fo sail close to da shore of Crete.
14 But afta litto while, one mean northeast wind called Eu·ro·aqʹui·lo wen rip thru.
15 Da wind wuz so strong we no could control da ship. Wuz hahd fo fight da wind, so we jus give up an let um carry da ship.
16 Den we sailed quick to one small island called Cauʹda fo try block da wind, but we almos no could save da small boat* dat wuz bein towed behind us.
17 But afta pulling da small boat on top, dey wen pass ropes unda da main ship from one side to da odda fo hold um togedda. Cuz dey wuz sked dey wuz goin get stuck at da place dat had sandbars,* dey wen lower da sails an keep drifting wit da wind.
18 Cuz we wuz getting pounded by da storm, da nex day dey started fo throw some of da cargo ovaboard fo lighten da ship.
19 On da third day, dey wen throw some of da equipment* off da ship.
20 Wen we no could see da sun or stars fo long time an da big* storm wuz bussing us up, we wen lose fight an tink we wuz gonnaz awready.
21 Afta dey neva eat long time, Paul wen stan in front all dem an tell: “You guys, if you had lissen to my advice fo no leave Crete, we neva woulda gone thru dis an lose evryting.
22 Still yet, I telling you guys now, be strong. Cuz none of you goin mahke, ony da ship goin be gonnaz.
23 Las night one angel of da God I serve an worship wen come by me
24 an sed: ‘No worry Paul. You goin go in front Caesar, an try look! God goin save you an all da guys sailing wit you.’
25 So you guys, make strong cuz I believe God, dat he goin do exackly wat da angel sed.
26 But da boat goin get shipwreck nea one island.”
27 Afta getting thrown aroun on da Sea of Aʹdri·a fo 14 nights, at midnight da sailors had one feeling dey wuz getting close to land.
28 Dey wen check how deep wuz an find out wuz about 120 feet.* Den dey go litto bit moa far an check how deep wuz again, an wuz about 90 feet.*
29 We wuz sked da ship wuz goin hit da rocks an get stuck, so da sailors wen throw four anchors off da back of da ship* an evrybody wuz wishing daytime would come awready.
30 Da sailors wanted fo escape, so dey make like dey wuz lowering da anchors, but dey wuz trying fo lower da small boat into da watta from da front of da ship.*
31 So Paul tell da army officer an da soldiers: “Unless dese guys stay on da ship, you not goin get saved.”
32 So da soldiers cut away da ropes fo da small boat an let um go.
33 Wen da sun wuz about fo come up, Paul try make dem eat an he tell: “Been 14 days awready you stay waiting fo da storm pau, an you guys neva eat notting.
34 So try eat litto bit fo yoa own good, cuz none of you guys goin lose even one hair from yoa head.”
35 Afta he sed dis, he wen take da bread, tank God in praya in front all dem, broke um up, an started fo grind.
36 So evrybody stop worrying an start fo eat too.
37 All togedda had 276 of us on da ship.
38 Wen evrybody had enuff fo eat, dey throw da wheat in da watta fo lighten da ship.
39 Wen daytime came, dey no could figga out wat land dey wuz looking at, but dey see one sandy beach an dey like reach dat beach if can.
40 So dey cut da ropes fo da anchors an let um go, same time dey untie da ropes fo da paddles dat steer da ship.* An afta dey put up da sail in da front of da ship, dey head fo da beach.
41 Dey wen hit one sandbar unda da watta an da front of da ship wen get stuck an no could move. But da back of da ship wuz catching cracks from da waves an wen start fo broke in pieces.
42 Wen dis happen, da soldiers decide fo kill da prisonas so dat nobody would try fo swim away an escape.
43 But da army officer wanted fo keep Paul safe, so he wen stop dem from following thru wit dea plan. He told da guys dat could swim fo jump in da watta an try make um to da beach firs
44 an da res goin follow, some of dem on planks an some on pieces of da ship. An all dem wen make um safe to da beach.
Footnotes
^ Dis stay talking about wen dey would fast on da Day Fo God Let Sins Go. Dis time wuz aroun Septemba/Octoba, da start of rainy wedda an ruff watta. Go check out “Day Fo God Let Sins Go” in Da Bible Dictionary.
^ Or, “skiff”. Dis extra boat could be used az one tug boat, one lifeboat, or fo unload cargo.
^ Or, “tackling”.
^ In da original Greek dis wen mean “not one manini”.
^ Or, “20 fathoms”.
^ Or, “15 fathoms”.
^ Or, “stern”.
^ Or, “da bow”.
^ Or, “rudder oars”.
