Action Wit Da Aposals 19:1-41
19 Wen A·polʹlos wuz in Corinth, Paul wen travel on da road far away from da sea an come down to Ephʹe·sus. Ova dea he find some followas
2 an sed to dem: “You guys wen get God’s powa wen you had come believas?” Dey ansa him: “Wat you mean? We neva did hea notting about God’s powa.”
3 So he ask dem: “Wat kine baptizum you had den?” Dey sed: “John’s baptizum.”
4 Paul sed: “John wen baptize peopo fo show dey stay sorry, an he tell da peopo fo believe in da guy coming afta him, dass Jesus.”
5 Wen dey hea dis, dey wen get baptize fo show dey respeck da Lord Jesus.*
6 An wen Paul put his hands on dem, dey wen get God’s powa, an dey start fo talk all kine diffren languages an prophesy.
7 All togedda had about 12 guys.
8 Fo three months he go inside da synagog* an he no hold back wen he talk. He teach da peopo an try fo help dem believe wat he tell about God’s Govament.
9 But wen some guys wen make hahd head an neva like believe, an talk bad about Da Way* in front da peopo, Paul go away from dem an take da followas wit him. Evryday he would teach in da big hall in da skool of Ty·ranʹnus.
10 Dis wen go on fo two years so dat evrybody, da Jews an da Greeks living in da districk of Asia, wen hea God’s message.*
11 An God wen keep doin unreal miracles thru Paul,
12 wea dey even wen bring to da sick guys da cloths an aprons dat wen touch his body, an dey wuz healed, an da demons* wen come outa dem too.
13 But even some of da Jews dat go aroun kicking out demons wen try use da Lord Jesus name on dem. Dey tell: “I orda you by Jesus, da one Paul talk about, fo get out.”
14 Had seven boys of one Jewish main pries named Sceʹva, an dey wuz doin dis.
15 But da demon tell dem: “I know Jesus an I know Paul too, but who you?”
16 Den da guy wit da bad spirit jump on dem, an take each one of dem down so dat dey run outa da house buss up an naked.*
17 All da Jews an Greeks dat live in Ephʹe·sus wen hea about dis an start fo respeck God plenny, an da name of da Lord Jesus wen spread.
18 An plenny of da guys dat wen come follawas would go tell in da open all da bad tings dey did an dat dey wuz sinnaz.
19 Had choke guys dat do magic kine stuff, an dey wen bring dea books togedda an burn um up in front evrybody. Wen dey add up how much all dat wuz worth, wuz 50,000 silva pieces.*
20 So Jehovah’s* message wen spread an wen keep reaching peopo’s hearts moa an moa.
21 Afta all dis happen, Paul figga dat afta he go thru Mac·e·doʹni·a an A·chaʹia, he would go Jerusalem. He sed: “Afta dat, I gotta go Rome too.”
22 So he sen two of his helpas, Timothy an E·rasʹtus, to Mac·e·doʹni·a. But he wen stay in da districk of Asia moa long.
23 Dat time, big problems had come up wit da guys dat follow Da Way.
24 One guy named De·meʹtri·us, who wuz one silvasmith, would make mini tempos dat look like da tempo of Arʹte·mis. He wen make good money fo da guys dat do dis kine work.
25 He bring dem togedda wit odda guys dass in da same trade an sed: “You guys know dat dis bizness stay making us plenny money.
26 An you guys wen see an hea dat, not ony in Ephʹe·sus, but pretty much all ova da Asia districk, Paul wen convince choke peopo fo tink diffren. He tell dat da gods man make, az ony fake.
27 If we let dis happen, peopo goin talk bad about oua bizness. But not ony dat, dey goin look down on da tempo of oua goddess Arʹte·mis like az notting. An den peopo not goin tink she awesome anymoa, even tho she wuz da one peopo worship in da whole districk of Asia an all ova da world.”
28 Wen dey hea dis, dey come all nutz an start fo yell: “Arʹte·mis no ka ‘oi! She da god fo da E·pheʹsians!”
29 One riot wen break out in da town an da peopo wen start fo yell. All dem wen run into da stadium,* dragging Gaʹius an Ar·is·tarʹchus wit dem. Dese guys wuz Mac·e·doʹni·ans an traveling wit Paul.
30 Paul wuz ready fo go inside fo talk to da peopo, but da followas neva let him.
31 Even some of da guys dat wuz in charge of da festivals an games dat wuz frenz wit Paul sen guys fo warn him fo no risk his life goin inside da stadium.
32 Some guys wuz yelling one ting an odda guys someting else. An mos of dem neva know how come dey had all come togedda.
33 So da Jews push Alexander to da front, an wen he in front evrybody, he make one motion wit his hand fo da peopo be quiet cuz he wanted fo explain wass goin on.
34 But wen da peopo see he one Jew, dey start fo yell all togedda “Arʹte·mis no ka ‘oi! She da god fo da E·pheʹsians!” Dey yell dis fo about two hours.
35 Wen da leada of da town finally got da peopo fo be quiet, he sed: “Peopo of Ephʹe·sus, evrybody know dat Ephʹe·sus iz da town dat guard da tempo of da powaful Arʹte·mis an da statue dat wen fall from da sky.
36 Nobody can deny um, so jus calm down an no get nutz.
37 You wen bring dese guys hea an dey neva steal from da tempos or talk agains oua goddess.
38 So if De·meʹtri·us an da workas wit him get someting fo charge dem wit, dey know da days da court stay open an dat get govnas fo judge dese tings.
39 But if you looking fo someting else dey wen do, da officials gotta get one town meeting togedda fo figga um out.
40 Cuz da way tings iz goin right now, if we no watch out, we could be charged wit goin agains da govament, cuz no moa one good reason fo dis riot.”
41 Afta he say dis, he tell da guys dea fo leave.
Footnotes
^ In da original Greek dis wen mean “in da name of da Lord Jesus”. Dis mean fo recognize Jesus authority.
^ Dis stay talking about da group of peopo dat wen follow da Christian way of life an teaching.
^ In da original Greek dis wen mean “da message of da Lord”.
^ Or, “half naked; in dea undawear.”
^ If da silva piece wuz one drachma or denarius, den one worka would have fo spen 50,000 days, or about 137 years working seven days a week fo make dat much money.
^ Dis one place plenny peopo would get togedda. Wuz one half circle an made of stone an about 25,000 peopo could fit dea.
