Action Wit Da Aposals 24:1-27
24 Five days layta An·a·niʹas da main pries wen come down wit some eldas an one lawyer named Ter·tulʹlus, an dey tell da govna about dea case agains Paul.
2 Wen Ter·tulʹlus get called fo talk, he start off wit saying:
“Felix, Yoa Honor, get plenny peace in da land cuz of you, an good kine changes in dis nation stay happening cuz you so akamai.
3 We talk about um all da time an tell mahalo fo all da good tings you do.
4 But I no like take up too much of yoa time, so please be kind an try lissen to us fas kine.
5 We like let you know dis guy iz one trouble mayka,* an all ova da earth he stir up da Jews fo riot, an he da ringleada fo da group called da Naz·a·renesʹ.
6 An he even try fo make da tempo pilau, so we wen grab um.
7 * ——
8 If you ask him yoaself, you goin find out az tru wat we tell.”
9 Den da Jews join in fo attack him too, saying dat dis stuff iz tru.
10 Wen da govna nod to Paul fo talk, Paul tell:
“I know you been da judge fo dis nation fo plenny years, an cuz of dat I happy fo tell my side of da story in front you.
11 You can check um fo yoaself, ony been aroun 12 days since I wen go up to Jerusalem fo worship.
12 An dey neva see me arguing wit anybody in da tempo or causing one riot in da town or synagogs.
13 Dey no can even prove to you da tings dey accusing me of right now.
14 But dass tru, I do follow da way of dat group dey talking about. Az why I serve da God of my ancestas da way I do, cuz I believe evryting written in da Law an da Prophets.*
15 An I get da same hope dat dese guys get, dat God goin bring back to life da guys dat do wass right an da guys dat do wass bad.
16 Dass why I always work hahd fo have one clear conscience* in front God an men.
17 Afta a good amount of years, I wen go Jerusalem fo give money fo help my peopo an fo give sacrifices to God.
18 While I wuz taking kea dis, dey wen find me in da tempo, an I wuz awready clean based on da law. But get some Jews from da Asia districk
19 dat should be hea in front you fo accuse me if dey really get anyting agains me.
20 Or let da guys ova hea speak up an say wat I wen do wrong wen I wuz in front da High Court.
21 Ony get one ting dey could accuse me of. Wen I wuz in court I sed: ‘I stay bein judged today cuz I believe in da resurrection of da dead!’”
22 But cuz Felix know all about da Way,* he push dea case to da side an say: “Weneva Lysʹi·as da army commanda come down hea, den I goin decide wat fo do about yoa case.”
23 An he orda da army officer fo keep dis guy unda arrest, but give him litto bit freedom an let his frenz come take kea him.
24 Some days layta Felix come wit his wife Dru·silʹla, she Jewish. An he ask Paul fo come so he can hea him explain wat mean fo believe in Jesus.
25 But wen Paul wuz talking about doin wass right an holding back an how God goin judge evrybody fo wat dey do, Felix come sked an tell: “Dass enuff fo now, go away, an wen I get chance, I goin call you back again.”
26 At da same time he wuz hoping dat Paul wuz goin give um money fo bribe him. Dass how come he tell Paul fo keep coming to talk wit him.
27 But afta two years go by, Porcius Festus wen take Felix’s place az rula. An cuz Felix wanted fo get on da Jews good side, he leave Paul in prison.
