Action Wit Da Aposals 1:1-26
1 Hui The·ophʹi·lus, da firs time I wen write you, wuz about all da tings Jesus wen do an teach
2 til da day God wen take him up to heaven. Dat wuz afta God’s powa wen guide him fo give instructions to da aposals he wen choose.
3 Afta he had suffa, he let his guys see him an wen give dem choke proof dat he wuz alive. Thru out 40 days, dey seen him plenny diffren times an he told dem about God’s Govament.
4 Wen he wuz meeting wit dem, he sed: “No leave Jerusalem, but keep waiting fo wat da Faddah had promise, like I wen tell you befoa.
5 Cuz fo shua John had baptize wit watta, but you guys goin get baptize wit God’s powa pretty soon.”
6 So wen dey get togedda, dey ask him: “Lord, you goin make um so God rule ova Israel again?”
7 He sed to dem: “Az not fo you know da days an times da Faddah decide fo do tings.*
8 But wen God’s powa start fo work in you, you goin get powa an you goin tell about me in Jerusalem, in all Ju·deʹa an Sa·marʹi·a, an all ova da earth.”*
9 Afta he sed dis, he wuz lifted up in front dem. An one cloud had cova him an dey no could see him anymoa.
10 Dey wuz looking at da sky, an az he wuz goin up, all of a sudden two guys in white clothes wuz standing by dem
11 an sed: “You guys from Galʹi·lee, how come you stan dea looking at da sky? Dis Jesus who wuz wit you guys an wen go up in da sky, he goin come back da same way you seen him goin into da sky.”
12 Den dey go back Jerusalem from da Mount of Olives, dass close to Jerusalem, ony about half mile away.*
13 Wen dey get dea, dey go inside da room upstairs wea dey wuz staying. Ova dea had Peter, John, James, Andrew, Philip an Thomas, Bar·tholʹo·mew an Matthew, James da son of Al·phaeʹus, Simon da one dat jus geev um, an Judas da son of James.
14 Dey wuz all togedda praying plenny. Had some wahines dea too, an had Mary da maddah of Jesus wit his braddahs.
15 Dat time, wen about 120 peopo wuz togedda, Peter stan up in front all dem an sed:
16 “You guys, da scripcha had fo come tru. Da one wea God’s powa wen move David fo prophesy about Judas, da guy dat wen bring peopo to Jesus fo arrest um.
17 Cuz he wuz one of us an wen work wit us.
18 (Dass why dis guy wen buy one field wit da money he got fo da evil ting he did. An he wen fall head firs, his body wen buss open* an all his guts wen splatta all ova.
19 All da guys in Jerusalem find out about dis, so dey call da field A·kelʹda·ma in dea language, dat mean, “Field of Blood.”)
20 Wuz written in da book Songs Fo God, ‘Let da place he live come empty, an nobody live dea’ an, ‘Let somebody else take ova his kuleana.’*
21 So den, dass why we gotta pick somebody fo take his place. Gotta be from one of da guys dat wuz wit us during da time Jesus wuz doin his work.*
22 He had fo be wit us starting from wen Jesus got baptize by John til da time he wuz taken up from us. Dis guy had fo be wit us fo see Jesus resurrection.”
23 So dey choose two guys, Joseph, da one dey call Barʹsab·bas, who dey also call Justus, an Mat·thiʹas.
24 Den dey pray an tell: “You, Jehovah,* you know wass in evrybody’s heart, show us which of da two guys you wen pick
25 fo take da place in dis work an come one aposal. Cuz Judas wen bag out on dis kuleana an go his own way.”
26 So dey wen throw small stones* an da one dat wuz pick wuz Mat·thiʹas, an he wuz added* to da 11 aposals.
Footnotes
^ Dis phrase ova hea show Jehovah give himself da right fo set da days an times.
^ Or, “to da ends of da earth”.
^ In da original Greek dis wen mean “one Sabbath day’s journey”. Dis wuz how far one Jew wuz allowed fo walk on da Sabbath.
^ Or, “his stomach buss open”.
^ Dat iz, take his place in taking kea da hui.
^ In da original Greek dis wen mean “Jesus wen come an go”.
^ Or, “counted wit”. Dat iz, dey wen look him da same az da odda 11 aposals.
