Kapitulo Disiseis

“Magpakita Kamo Sing Mainit nga Gugma sa Isa kag Isa”

1. Sa ano masami nagadayaw ang mga bag-uhan sa mga miting sang mga Saksi ni Jehova?

 KON ang mga tawo una nga makatambong sa mga miting sang mga Saksi ni Jehova, masami nga nagadayaw sila sa gugma nga ginpakita didto. Nakita nila ini sa pag-abiabi sa ila kag sa mainit nga pag-inupdanay. Natalupangdan man sang mga dumuluaw sa aton mga kombension ini nga gugma. Ang isa ka manugbalita nagsulat tuhoy sa kombension: ‘Wala sing bisan sin-o nga yara sa impluwensia sang droga ukon alkohol. Wala sing nagasinggit kag nagasiyagit. Wala sing tikluranay. Wala sing dis-uganay. Wala sing isa nga nagapamuyayaw ukon nagapakamalaut. Wala sing binastos nga mga lahog ukon malaw-ay nga hambal. Wala sing nagapanigarilyo. Wala sing nagapangawat. Wala sing nagahaboy sing lata sa duta. Tumalagsahon gid ini.’ Ini tanan pamatuod sang gugma, ang sahi nga “wala nagagawi sing indi disente, wala nagapangita sang kaugalingon nga mga kaayuhan.”​​—1 Corinto 13:​4-8.

2. (a) Sa ulihi, ano ang dapat makita sa pagpasundayag naton sing gugma? (b) Bilang pag-ilog kay Cristo, ano nga sahi sang gugma ang dapat naton palambuon?

² Ang utudnon nga gugma amo ang nagapakilala nga tanda sang matuod nga mga Cristiano. (Juan 13:35) Samtang nagauswag kita sa espirituwal, matun-an naton nga ipabutyag ang gugma sing labi pa. Nangamuyo si apostol Pablo nga ang gugma sang iya mga masigka-Cristiano “magbugana sing labi kag labi pa gid.” (Filipos 1:9) Ginpakita ni apostol Juan nga ang aton gugma dapat nga masinakripisyuhon sa  kaugalingon. Sia nagsulat: “Sa sini nakilala naton ang gugma, bangod ginhatag [sang Anak sang Dios] ang iya kalag tungod sa aton; kag obligado kita nga ihatag ang aton mga kalag tungod sa aton mga kauturan.” (1 Juan 3:​16; Juan 15:​12, 13) Ihatag gid bala naton ang aton kabuhi sa aton mga kauturan? Bisan wala ini ginakinahanglan sa kalabanan nga mga kahimtangan, tubtob sa ano nga kasangkaron manikasog kita nga buligan sila karon, bisan pa nga indi ini kombeniente?

3. (a) Sa ano nga paagi mahimo naton mapakita ang aton gugma sing labi pa? (b) Ngaa kinahanglan nga magpakita kita sing mainit nga gugma sa isa kag isa karon?

³ Lakip sa aton mga buhat nga nagapakita sing espiritu sang pagsakripisyo sa kaugalingon, kinahanglan nga mainit gid ang aton ginabatyag sa aton mga kauturan. Ang Pulong sang Dios nagalaygay sa aton: “Sa utudnon nga gugma magpakita kamo sing mapinalanggaon nga gugma sa isa kag isa.” (Roma 12:10) Subong sini ang ginabatyag naton tanan sa pila ka tawo. Apang matun-an bala naton nga ipakita man ini nga gugma sa iban pa? Samtang nagahilapit ang katapusan sining daan nga sistema, kinahanglan nga mangin suod pa kita sa aton mga masigka-Cristiano. Ang Biblia nagsiling: “Ang katapusan sang tanan nga butang malapit na. . . . Labaw sa tanan, magpakita kamo sing mainit nga gugma sa isa kag isa, kay ang gugma nagatabon sang kadam-an nga mga sala.”​​—1 Pedro 4:​7, 8.

Kon Mag-utwas ang mga Problema

4. (a) Ngaa mahimo mag-utwas ang mga problema sa tunga sang mga katapo sang kongregasyon? (b) Bisan pa mahimo nga indi kita pirme nahuyog sa paghimo sini, anong maayo nga butang ang magaresulta kon ginaaplikar naton ang laygay sang Biblia?

⁴ Sa pagkamatuod, tubtob di-himpit kita, may mga tion nga makahimo kita sing mga butang nga makasaklaw sa iban. Ang aton mga utod mahimo man nga makasala batok sa aton sa nagkalainlain nga paagi. (1 Juan 1:8) Kon masapwan mo  ang imo kaugalingon sa sini nga kahimtangan, ano ang dapat mo himuon? Ang Kasulatan nagahatag sing kinahanglanon nga panuytoy. Apang ang ginasiling sini mahimo nga wala nagahisanto sa aton huyog nga himuon subong di-himpit nga mga tawo. (Roma 7:​21-​23) Walay sapayan sini, ang aton hanuot nga pagsunod sa laygay sang Biblia magapamatuod sa aton sinsero nga handum nga pahamut-an si Jehova. Ang paghimo sa sini magapauswag man sang kalidad sang gugma nga ginapakita naton sa iban.

5. Kon may makasaklaw sa aton, ngaa indi kita dapat magbalos?

⁵ Kon ang mga tawo masaklaw, nagapangita sila kon kaisa sing mga paagi agod makabalos sa nakasala. Apang ginapalala lamang sini ang kahimtangan. Kon kinahanglan ang pagbalos, dapat naton ini itugyan sa Dios. (Hulubaton 24:29; Roma 12:17-​21) Ang iban mahimo nga magalikaw sa pagpakig-angot sa nakasala. Apang indi naton dapat ini himuon sa aton mga masigkasumilimba, bangod agod mangin kalahamut-an ang aton pagsimba, nasandig ini, sa bahin, sa aton paghigugma sa aton mga kauturan. (1 Juan 4:20) Sa amo, si Pablo nagsulat: “Padayon kamo nga magpinaumuray sa isa kag isa kag hilway nga magpinatawaray sa isa kag isa kon ang isa may inugsumbong batok sa isa. Subong nga si Jehova hilway nga nagapatawad sa inyo, amo man ang himuon ninyo.” (Colosas 3:13) Mahimo mo bala ina?

6. (a) Daw ano kasunson dapat naton patawaron ang aton utod? (b) Ang paghangop sa ano nga butang tuhoy sa aton kaugalingon ang magabulig sa aton kon ano ang himuon sa sala nga nahimo batok sa aton?

⁶ Kamusta naman kon ang isa sulit-sulit nga nakasala sa aton apang wala nagahimo sing daku nga sala nga bangod sini mahimo sia paguwaon gikan sa kongregasyon? Para sa magagmay nga mga sala, nagpanugda si apostol Pedro sang pagpatawad sing “tubtob sa pito ka beses.” Apang si Jesus nagsiling: “Indi, Tubtob sa pito ka beses, kundi, Tubtob sa kapituan kag pito ka beses.” Ginpatalupangod niya ang daku nga utang naton sa Dios kon ipaanggid sa mahimo nautang sa  aton sang bisan sin-o nga tawo. (Mateo 18:21-​35) Sa madamo nga paagi nagapakasala kita batok sa Dios kada adlaw​​—kon kaisa bangod sa isa ka mahamkunon nga buhat, bangod sa aton ginasiling ukon ginahunahuna, ukon bangod sa butang nga napaslawan naton nga himuon—​nga wala gani nakarealisar nga nakasala kita. (Roma 3:23) Apang, maluluy-on gihapon ang Dios sa aton. (Salmo 103:10-​14; 130:​3, 4) Amo man ang ginapahimo niya sa aton sa isa kag isa. (Mateo 6:​14, 15; Efeso 4:​1-3) Nian ginahimo naton ang sahi sang gugma nga ‘wala nagaisip sang kahalitan.’​​—1 Corinto 13:​4, 5; 1 Pedro 3:​8, 9.

7. Ano ang dapat naton himuon kon ang isa ka utod may paghinakit sa aton?

⁷ May mga tion nga marealisar naton nga bisan pa wala kita sing malain nga buot sa aton utod, may paghinakit gali sia sa aton. Sarang kita makapamat-od nga ‘tabunan ini sang gugma,’ subong sang ginapanugda sang 1 Pedro 4:8. Ukon kita ang mag-una nga hambalon sia kag tinguhaan nga mapasag-uli ang mahidaiton nga mga kaangtanan.​​—Mateo 5:​23, 24.

8. Kon ang isa ka masigkatumuluo nagahimo sing butang nga nagatublag sa aton, ano ang himuon naton tuhoy sini?

⁸ Ayhan ang isa ka masigkatumuluo nagahimo sing butang nga nagatublag indi lamang sa imo kundi sa iban man. Indi bala maayo nga hambalon sia? Siguro. Kon ipaathag mo sa iya sing mainayuhon ang problema, mahimo nga may maayo ini nga mga resulta. Apang dapat mo anay pamangkuton ang imo kaugalingon: ‘May ginahimo gid bala sia nga di-makasulatanhon? Ukon ang problema gid bala amo nga magkatuhay kami sing gindak-an kag paghanas?’ Maghalong nga wala ka nagahimo sang imo kaugalingon nga talaksan kag nian maghukom suno sa sini. (Santiago 4:​11, 12) Walay pagpasulabi nga ginabaton ni Jehova ang mga tawo gikan sa tanan nga sahi sang ginhalinan kag mapailubon sia sa ila samtang nagauswag sila sa espirituwal.

9. (a) Sin-o ang nagaatubang sa mga kaso sang mabug-at nga sala sa kongregasyon? (b) San-o responsabilidad sang isa nga nahimuan sing sala nga maghikot una, kag ano ang katuyuan?

 ⁹ Kon ang isa sa kongregasyon makahimo sing mabug-at nga sala, subong sang imoralidad, dapat ini atubangon sa gilayon. Ni sin-o? Sang mga gulang. (Santiago 5:​14, 15) Apang, kon ang sala ginhimo batok sa isa ka indibiduwal, ayhan sa negosyo ukon sa makahalalit nga paggamit sa dila, nian ang isa nga nahimuan sang sala dapat manikasog sing una nga palapitan ang nakasala sing pribado. (Mateo 18:15) Kon indi mahusay ang problema, dapat himuon ang dugang pa nga mga tikang, subong ginabalay sa Mateo 18:​16, 17. Ang gugma sa aton nakasala nga utod kag ang handum nga ‘madaug’ sia magabulig sa aton nga himuon ini sa paagi nga nagatinguha nga malab-ot ang iya tagipusuon.​​—Hulubaton 16:23.

10. Kon mag-utwas ang problema, ano ang magabulig sa aton agod tamdon sing nagakaigo ang problema?

 ¹⁰ Kon mag-utwas ang problema, daku man ukon gamay, mabuligan kita kon panikasugan naton nga hangpon kon ano ang pagtamod ni Jehova sa sini. Wala sia mahamuot sa bisan ano nga sahi sang sala, kag sa iya gintalana nga tion, ang di-mahinulsulon nga mga nagahimo sing daku nga sala ginapaguwa gikan sa iya organisasyon. Apang, indi naton pagkalimtan nga kita tanan nagapakasala sa magagmay nga mga paagi kag nagakinahanglan sang iya pagkamainantuson kag kaluoy. Sa amo si Jehova nagapahamtang sing sulundan nga dapat naton sundon kon ang iban nakasala sa aton. Kon maluluy-on kita, ginapabanaag naton ang iya gugma.​​—Efeso 5:​1, 2.

Mangita Sing mga Paagi Agod “Magpasangkad”

11. Ngaa ginpalig-on ni Pablo ang mga taga-Corinto nga “magpasangkad”?

¹¹ Si Pablo naghinguyang sing mga binulan sa pagpalig-on sa kongregasyon sa Corinto, Gresya. Nagpangabudlay sia sing lakas agod buligan ang mga kauturan didto, kag ginhigugma niya sila. Apang ang iban sa ila kulang sing mainit nga balatyagon sa iya. Mamulayon gid sila. Ginlaygayan niya sila nga “magpasangkad” sa pagpakita sing pagpalangga. (2 Corinto 6:​11-​13; 12:15) Dapat naton tanan binagbinagon kon tubtob diin naton mapakita ang gugma sa iban kag magpangita sing mga paagi agod magpasangkad.​​—1 Juan 3:14.

12. Paano magatubo ang aton gugma sa tanan sa kongregasyon?

¹² Nabudlayan bala kita sa pagpakigsuod sa pila sa kongregasyon? Kon tinguhaan gid naton nga indi pagsapakon ang ila tuhay nga personalidad​​—subong sang luyag naton nga himuon nila sa aton—​makabulig ini agod mag-init ang kaangtanan sa ulot naton. Magauswag man ang aton balatyagon sa ila kon pangitaon naton ang ila maayong mga kinaiya kag magkonsentrar sa sini. Pat-od nga magapatubo gid ini sang aton gugma sa ila.​​—Lucas 6:​32, 33, 36.

13. Paano kita makapasangkad sa pagpakita sing gugma sa mga kauturan sa aton kongregasyon?

 ¹³ Matuod, may mga limitasyon sa kon ano ang sarang naton mahimo para sa iban. Mahimo nga indi naton matamyaw ang tanan sa tagsa ka miting. Mahimo nga indi naton maagda ang tanan kon nagaimbitar kita sing mga abyan sa isa ka pagkaon. Apang makapasangkad bala kita paagi sa paghinguyang sing pila lamang ka minuto agod makilala sing maayo pa ang isa sa kongregasyon? Mahimo bala naton kon kaisa maagda ang isa nga indi naton tanto kilala nga magpanghikot upod sa aton sa ministeryo sa latagon?

14. Kon yara kita sa tunga sang mga Cristiano nga wala pa naton makilala, paano naton mapakita ang mainit nga gugma sa isa kag isa?

¹⁴ Ang Cristianong mga kombension nagahatag sing maayo nga mga higayon agod mapasangkad ang aton gugma. Linibo ang mahimo magtambong. Indi naton sila tanan masugilanon, apang mahimo naton mapakita nga ginauna naton ang ila kaayuhan sangsa aton kasulhayan. Sa ulot sang mga sesyon, mapakita naton ang personal nga interes paagi sa pagpangilala sa pila sa palibot naton. Sa pila ka adlaw ang tanan nga nagakabuhi sa duta mangin mga mag-ulutod, nga nahiusa sa pagsimba sa matuod nga Dios kag Amay sang tanan. Daw ano nga kalipay nga makilala ang isa kag isa! Ang mainit nga gugma magapahulag sa aton nga himuon ini. Ngaa indi sugdan na karon?

Repaso nga Paghinun-anon?

• Kon mag-utwas ang mga problema sa tunga sang mga Cristiano, paano ini dapat husayon, kag ngaa?

• Samtang nagauswag kita sa espirituwal, sa anong mga paagi dapat man mag-uswag ang aton gugma?

• Paano posible nga mapakita ang mainit nga gugma indi lamang sa mahirop nga mga abyan?

[Mga Pamangkot sa Pagtinuon]

[Retrato sa pahina 148]

Ang Cristianong gugma ginapakita sa madamo nga paagi, subong sa mga miting sang kongregasyon