1 Mose 44:1-34
44 Sɛɛ mli lɛ, efã nuu ní kwɛɔ eshĩa lɛ nɔ lɛ akɛ: “Wo hii lɛ akotokui lɛ amli niyenii ni fa bɔ ni amɛbaanyɛ amɛtere, ní okɛ amɛteŋ mɔ fɛɛ mɔ shika awo ekotoku lɛ mli.*+
2 Shi okɛ mijwiɛtɛi kɔɔpoo lɛ awo gbekɛ kwraa lɛ kotoku lɛ mli, ní okɛ shika ní ekɛba koni ekɛbahé ŋmaa* lɛ hu afata he.” No hewɔ lɛ, efee bɔ ni Yosef fã lɛ lɛ.
3 Enɔ leebi be ni jeŋ tse lɛ, awo hii lɛ gbɛ kɛ amɛtejii lɛ.
4 Be ni amɛshi maŋ lɛ mli lɛ, amɛshɛɛɛ he ko kɛkɛ ni Yosef kɛɛ nuu lɛ ní kwɛɔ eshĩa lɛ nɔ lɛ akɛ: “Tee shi! Tiumɔ hii lɛ! Kɛ́ oyanina amɛ lɛ, kɛɛmɔ amɛ akɛ, ‘Mɛni hewɔ nyɛkɛ efɔŋ eto ekpakpa najiaŋ lɛ?
5 Ani jeee enɛ mli minuŋtsɔ nuɔ nii yɛ, ni ekɛklaa* fitsofitso? Enɛ lɛ, efɔŋ diɛŋtsɛ nyɛfee lɛ.’”
6 No hewɔ lɛ, eyanina amɛ ni ekɛɛ amɛ nibii nɛɛ.
7 Shi amɛkɛɛ lɛ akɛ: “Mɛni hewɔ minuŋtsɔ wieɔ nɔ ko ni tamɔ nɛkɛ? Ebaŋ lɛ kɔkɔɔkɔ akɛ otsuji baafee nɔ ko ni tamɔ nɛkɛ.
8 Naa, shika ni wɔna yɛ wɔkotokui lɛ amli* lɛ, wɔkɛku sɛɛ kɛjɛ Kanaan shikpɔŋ lɛ nɔ wɔbahã bo.+ No hewɔ lɛ, te aaafee tɛŋŋ ni wɔbaaju jwiɛtɛi loo shika tsuru yɛ onuŋtsɔ shĩa lɛ?
9 Kɛ́ ana yɛ onyɔji lɛ ateŋ mɔ ko dɛŋ lɛ, hã egbo, ni wɔ mɛi ní baashwɛ lɛ hu baatsɔmɔ minuŋtsɔ nyɔji.”
10 No hewɔ lɛ ekɛɛ: “Afee bɔ ni nyɛkɛɛ lɛ: Mɔ dɛŋ ní abaana yɛ lɛ baatsɔ minyɔŋ, shi nyɛ mɛi ní baashwɛ lɛ, nyɛhe baaje mli.”
11 Kɛkɛ ni amɛteŋ mɔ fɛɛ mɔ he fee oya ni ejie ekotoku lɛ ema shi, ni efɛne naa.
12 Etao fitsofitso, eje shishi kɛjɛ onukpa fe fɛɛ lɛ nɔ, ni eyagbe naa yɛ gbekɛ kwraa lɛ nɔ. Naagbee lɛ, ana kɔɔpoo lɛ yɛ Benyamin kotoku lɛ mli.+
13 Kɛkɛ ni amɛgbalagbalaa amɛhe atadei, ni amɛteŋ mɔ fɛɛ mɔ wó ejatsu ema eteji nɔ ekoŋŋ, ni amɛku amɛsɛɛ kɛtee maŋ lɛ mli.
14 Be ni Yuda+ kɛ enyɛmimɛi lɛ tee Yosef shĩa lɛ, no mli lɛ eyɛ jɛmɛ lolo; ni amɛho amɛgbeegbee shikpɔŋ yɛ ehiɛ.+
15 Yosef kɛɛ amɛ akɛ: “Mɛni nyɛfee nɛɛ? Ani nyɛleee akɛ nuu ni tamɔ mi lɛ, manyɛ matsɔɔ nɔ ni baaba wɔsɛɛ lɛ fitsofitso?”+
16 Kɛkɛ ni Yuda kɛɛ: “Mɛni po wɔbaanyɛ wɔkɛɛ minuŋtsɔ? Mɛni wɔbaanyɛ wɔwie? Ni te wɔɔfee tɛŋŋ wɔtsɔɔ akɛ jalɔi ji wɔ lɛ? Anɔkwa Nyɔŋmɔ lɛ ena onyɔji lɛ anɔ fɔŋ lɛ.+ Amrɔ nɛɛ wɔtsɔmɔ minuŋtsɔ nyɔji, wɔ kɛ mɔ dɛŋ ní ana kɔɔpoo lɛ yɛ lɛ fɛɛ!”
17 Shi ekɛɛ: “Ebaŋ lɛ nakai kɔkɔɔkɔ akɛ mafee nakai! Mɔ dɛŋ ni ana kɔɔpoo lɛ yɛ lɛ, lɛ ebaatsɔ minyɔŋ.+ Shi nyɛ mɛi ni eshwɛ lɛ, nyɛyaa nyɛtsɛ ŋɔɔ yɛ toiŋjɔlɛ mli.”
18 Agbɛnɛ, Yuda tsi ebɛŋkɛ lɛ ni ekɛɛ: “Minuŋtsɔ, ofainɛ, hã onyɔŋ akɛɛ minuŋtsɔ nɔ ko, ní obo mi toi, ni omli akafu onyɔŋ, ejaakɛ otamɔ Farao nɔŋŋ.+
19 Minuŋtsɔ bi enyɔji akɛ, ‘Ani nyɛyɛ tsɛ loo nyɛmi nuu ko?’
20 No hewɔ lɛ, wɔkɛɛ minuŋtsɔ akɛ, ‘Wɔyɛ tsɛ nuumo ko kɛ bi ko ni efɔ lɛ yɛ egbɔlɛ beiaŋ, ebi gbekɛ kwraa lɛ.+ Shi enyɛmi nuu lɛ egbo,+ no hewɔ lɛ, lɛ pɛ ji emami bi ní eshwɛ,+ ni epapa sumɔɔ lɛ.’
21 No sɛɛ lɛ, okɛɛ onyɔji akɛ, ‘Nyɛkɛ lɛ abaa* miŋɔɔ koni mana lɛ.’+
22 Shi wɔkɛɛ minuŋtsɔ akɛ, ‘Gbekɛ lɛ nyɛŋ ashi epapa. Kɛ́ eshi epapa lɛ, no lɛ, bɔ fɛɛ bɔ ni fee lɛ, epapa baagbo.’+
23 Kɛkɛ ni okɛɛ onyɔji akɛ, ‘Kɛ́ nyɛkɛ nyɛnyɛmi gbekɛ kwraa lɛ baaa* lɛ, no lɛ, nyɛkabaa mihiɛ dɔŋŋ.’*+
24 “No hewɔ lɛ, wɔtee* onyɔŋ, ni ji mipapa ŋɔɔ, ni wɔyakɛɛ lɛ minuŋtsɔ wiemɔi lɛ.
25 Sɛɛ mli lɛ, wɔtsɛ kɛɛ, ‘Nyɛyaa ekoŋŋ nyɛyahéa niyenii fioo nyɛbahãa wɔ.’+
26 Shi wɔkɛɛ, ‘Wɔnyɛŋ wɔya. Kɛ́ wɔnyɛmi gbekɛ kwraa lɛ fata wɔhe lɛ, no lɛ, wɔbaaya, ejaakɛ wɔnyɛŋ nuu lɛ hiɛ wɔna, ja wɔnyɛmi gbekɛ kwraa lɛ fata wɔhe.’+
27 Kɛkɛ ni onyɔŋ, ni ji mitsɛ, kɛɛ wɔ akɛ, ‘Nyɛle jogbaŋŋ akɛ, bihii enyɔ miŋa fɔ ehã mi.+
28 Shi amɛteŋ mɔ kome shi mi, ni mikɛɛ: “Ekã shi faŋŋ akɛ, benɛ atserɛ emli dukuduku!”+ ni minako lɛ kɛbashi bianɛ.
29 Kɛ́ nyɛŋɔ mɔ nɛ hu kɛje mihiɛ kɛtee, ni oshãra wulu* ko yashãra lɛ lɛ, no lɛ bɔ fɛɛ bɔ ni fee lɛ, nyɛbaahã mikɛ miyiteŋ waji akpeleke shi kɛya Gbonyobu*+ lɛ mli kɛ awerɛho ni naa wa.’*+
30 “Ni agbɛnɛ, kɛ́ miku misɛɛ kɛtee onyɔŋ, ni ji mitsɛ ŋɔɔ, ni gbekɛ lɛ fataaa wɔhe lɛ, akɛni esumɔɔ gbekɛ lɛ tamɔ bɔ ni esumɔɔ lɛ diɛŋtsɛ esusuma* hewɔ lɛ,
31 no lɛ, kɛ́ ena akɛ gbekɛ lɛ bɛ nɔŋŋ pɛ lɛ, ebaagbo, ni onyɔji baahã onyɔŋ, ni ji wɔtsɛ lɛ kɛ eyiteŋ waji akpeleke shi kɛya Gbonyobu* lɛ mli kɛ awerɛho.
32 Onyɔŋ wo mipapa shi akɛ ebaakwɛ koni nɔ ko akaba gbekɛ lɛ nɔ ekɛɛ, ‘Kɛ́ mikɛ lɛ ekuuu sɛɛ ebahãaa bo lɛ, no lɛ, mifee esha mishi mitsɛ kɛmiiya naanɔ.’+
33 No hewɔ lɛ, agbɛnɛ, ofainɛ, hã mi moŋ mahi shi akɛ minuŋtsɔ nyɔŋ yɛ gbekɛ lɛ najiaŋ, bɔ ni afee ni gbekɛ lɛ kɛ enyɛmimɛi lɛ aku sɛɛ kɛya.
34 Te mafee tɛŋŋ maku misɛɛ kɛya mitsɛ ŋɔɔ ní gbekɛ lɛ fataaa mihe? Minyɛŋ makwɛ mipapa ní eena amanehulu tamɔ nɛkɛ!”
Shishigbɛ Niŋmaa
^ Hebri sht. ŋm., “ekotoku lɛ naa.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Ni tsɔɔ akɛ, ekɛtsɔɔ nɔ ni baaba wɔsɛɛ.
^ Hebri sht. ŋm., “wɔkotokui lɛ anaa.”
^ Loo “akpelekea shi kɛbaa.”
^ Loo “kpelekeee shi kɛbaaa.”
^ Hebri sht. ŋm., “nyɛnaŋ mihiɛ dɔŋŋ.”
^ Loo “wɔkwɔ kɛtee.”
^ Ni tsɔɔ akɛ, oshãra ni kɛ gbele baa.
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Loo “kɛ amanehulu.”
^ Hebri sht. ŋm., “akɛni gbekɛ nɛɛ susuma he esusuma kpɛtɛ.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
