Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

1 Mose 39:1-23

EMLI SAJI

  • Yosef yaje Potifar shĩa lɛ (1-6)

  • Yosef ekpɛlɛɛɛ Potifar ŋa lɛ (7-20)

  • Awo Yosef tsuŋ (21-23)

39  Agbɛnɛ, akɛ Yosef kpeleke shi kɛtee Ejipt,+ ni Ejiptnyo ko ni atsɛɔ lɛ Potifar,+ ni eji Farao maŋtsɛ shĩa lɛ onukpai lɛ ateŋ mɔ kome kɛ bulɔi lɛ anɔ onukpa hu lɛ, hé lɛ yɛ Ishmaelbii+ ní kɛ lɛ kpeleke shi kɛba jɛmɛ lɛ adɛŋ.  Shi Yehowa kɛ Yosef yɛ.+ No hewɔ lɛ, eye omanye, ni awó lɛ enuŋtsɔ Ejiptnyo lɛ shĩa lɛ nɔ onukpa.  Ni enuŋtsɔ lɛ na akɛ Yehowa kɛ lɛ yɛ, ni akɛ, Yehowa miihã nɔ fɛɛ nɔ ni efeɔ lɛ miiye omanye.  Yosef hiɛ tee nɔ eba nyam yɛ enuŋtsɔ lɛ hiɛ, ni ebatsɔ lɛ diɛŋtsɛ esɔɔlɔ. No hewɔ lɛ, ewó lɛ onukpa yɛ eshĩa lɛ nɔ, ni etu enii fɛɛ ewo edɛŋ.  Kɛjɛ be ni Ejiptnyo lɛ wó lɛ eshĩa lɛ nɔ onukpa, ní etu enii fɛɛ ewo edɛŋ lɛ, Yehowa tee nɔ ejɔɔ eshĩa lɛ yɛ Yosef hewɔ, ni Yehowa jɔɔ nɔ fɛɛ nɔ ni eyɔɔ yɛ shĩa lɛ kɛ ŋa lɛ mli lɛ nɔ.+  Naagbee lɛ, eshi nɔ fɛɛ nɔ ni eyɔɔ lɛ ewo Yosef dɛŋ ní ekwɛ nɔ, ni egbaaa ehe naa yɛ nɔ ko nɔ ko he, akɛ ja niyenii ní eyeɔ lɛ kɛkɛ. Agbɛnɛ, Yosef batsɔ nuu titirii ní he yɔɔ fɛo hu.  Agbɛnɛ, yɛ nibii nɛɛ asɛɛ lɛ, Yosef nuŋtsɔ lɛ ŋa lɛ kɛ hiŋmɛi ko bɔi lɛ kwɛmɔ, ni ekɛɛ: “Okɛ mi abawɔ.”  Shi ekpɛlɛɛɛ, ni ekɛɛ enuŋtsɔ lɛ ŋa lɛ akɛ: “Naa, minuŋtsɔ lɛ gbaaa ehe naa yɛ nɔ ni yɔɔ midɛŋ yɛ shĩa lɛ he, ni etu nɔ fɛɛ nɔ ni eyɔɔ lɛ ewo midɛŋ.  Mɔ ko mɔ ko bɛ ni fe mi yɛ shĩa nɛɛ, ni etsĩii mi gbɛ yɛ nɔ ko nɔ ko he akɛ ja bo kɛkɛ, ejaakɛ bo lɛ eŋa ji bo. No hewɔ lɛ, te aaafee tɛŋŋ ní mafee efɔŋ kpele nɛɛ, ní mafee esha mashi Nyɔŋmɔ lɛ?”+ 10  No hewɔ lɛ, daa gbi lɛ ekɛ Yosef wieɔ, shi Yosef ekpɛlɛɛɛ akɛ ekɛ lɛ baawɔ loo ní ebaahi emasɛi. 11  Shi gbi ko be ni Yosef tee shĩa lɛ koni eyatsu enitsumɔ lɛ, no mli lɛ, shĩa lɛ mli tsuji lɛ ateŋ mɔ ko kwraa bɛ shĩa lɛ. 12  Kɛkɛ ni yoo lɛ kpiti lɛ kɛ etade lɛ, ni ekɛɛ: “Okɛ mi abawɔ!” Shi eshi etade lɛ ewo edɛŋ, ni ejo foi kɛje kpo. 13  Be ni yoo lɛ na akɛ eshi etade lɛ ewo edɛŋ ni ejo foi kɛje kpo lɛ, amrɔ lɛ, 14  ebɔi bolɔmɔ kɛ eshĩa lɛ mli hii lɛ tsɛmɔ akɛ: “Nyɛkwɛa! Eyaŋɔ nɛkɛ Hebrinyo nɛɛ kɛba wɔŋɔɔ koni ebaye wɔhe fɛo. Eba miŋɔɔ koni ekɛ mi abawɔ, shi mibɔi bolɔmɔ waa. 15  Ni be ni enu akɛ miwó migbee nɔ miibolɔ lɛ, amrɔ lɛ, eshi etade lɛ yɛ mimasɛi, ni ejo foi kɛje kpo.” 16  No sɛɛ lɛ, ekɛ etade lɛ ŋmɛ emasɛi kɛyashi Yosef nuŋtsɔ lɛ ba eshĩa lɛ. 17  Kɛkɛ ni egba lɛ nɔ kome too lɛ nɔŋŋ ekɛɛ: “Tsulɔ Hebrinyo lɛ ní okɛ lɛ ba wɔŋɔɔ lɛ ba miŋɔɔ koni ebaye mihe fɛo. 18  Shi be ni miwó migbee nɔ ní mibɔi bolɔmɔ lɛ, amrɔ lɛ, eshi etade lɛ yɛ mimasɛi ni ejo foi kɛje kpo.” 19  Be ni Yosef nuŋtsɔ lɛ nu sane ní eŋa lɛ bɔ lɛ akɛ: “Nibii ni otsulɔ lɛ fee mi nɛ” lɛ, amrɔ lɛ, emli wo la waa. 20  No hewɔ lɛ, Yosef nuŋtsɔ lɛ mɔ lɛ ni eyawo lɛ tsuŋ yɛ he ni awoɔ maŋtsɛ lɛ gboklɛfoi lɛ tsuŋ yɛ lɛ, ni ehi tsuŋwoohe lɛ.+ 21  Shi Yehowa tee nɔ ekɛ Yosef hi shi, ni etee nɔ ejie suɔmɔ ni tsakeee kpo etsɔɔ lɛ, ni ehã ehiɛ ba nyam yɛ tsuŋwoohe lɛ nɔkwɛlɔnukpa lɛ hiɛ.+ 22  No hewɔ lɛ, tsuŋwoohe lɛ nɔkwɛlɔnukpa lɛ tu gboklɛfoi fɛɛ ni yɔɔ tsuŋwoohe lɛ ewo Yosef dɛŋ, ni nɔ fɛɛ nɔ ní amɛfeɔ yɛ jɛmɛ lɛ, lɛ ji mɔ ni kwɛɔ ni afeɔ.+ 23  Tsuŋwoohe lɛ nɔkwɛlɔnukpa lɛ gbaaa ehe naa yɛ nibii ní Yosef kwɛɔ nɔ lɛ eko kwraa he, ejaakɛ Yehowa kɛ Yosef yɛ, ni Yehowa hãa nɔ fɛɛ nɔ ni efeɔ lɛ yeɔ omanye.+

Shishigbɛ Niŋmaa