1 Mose 43:1-34

  • Yosef nyɛmimɛi hii lɛ tee Ejipt nɔ ni ji shii enyɔ nɔ; amɛkɛ Benyamin tee (1-14)

  • Yosef kɛ enyɛmimɛi hii lɛ kpe ekoŋŋ (15-23)

  • Yosef ŋmɛ enyɛmimɛi hii lɛ okpɔlɔ (24-34)

43  Agbɛnɛ, hɔmɔ lɛ naa bawa waa yɛ shikpɔŋ lɛ nɔ.+  No hewɔ lɛ, be ni amɛye ŋmaa* ni amɛkɛjɛ Ejipt kɛba lɛ amɛtã lɛ,+ amɛtsɛ kɛɛ amɛ akɛ: “Nyɛyaa ekoŋŋ nyɛyahéa niyenii fioo nyɛbahãa wɔ.”  Kɛkɛ ni Yuda kɛɛ lɛ akɛ: “Nuu lɛ kɛɛ wɔ faŋŋ akɛ, ‘Nyɛkabaa mihiɛ* dɔŋŋ, ja nyɛnyɛmi nuu lɛ fata nyɛhe.’+  Kɛ́ obaahã wɔnyɛmi nuu lɛ afata wɔhe kɛya lɛ, no lɛ, wɔbaaya* ní wɔyahé niyenii wɔbahã bo.  Shi kɛ́ ohãaa eya lɛ, no lɛ, wɔyaŋ,* ejaakɛ nuu lɛ kɛɛ wɔ akɛ, ‘Nyɛkabaa mihiɛ* dɔŋŋ, ja nyɛnyɛmi nuu lɛ fata nyɛhe.’”+  Ni Israel+ bi akɛ: “Mɛni hewɔ nyɛkɛɛ nuu lɛ akɛ nyɛyɛ nyɛmi nuu kroko, ni nyɛkɛ haomɔ nɛɛ eba minɔ lɛ?”  Amɛhã hetoo akɛ: “Nuu lɛ bi wɔ kɛ wɔwekumɛi lɛ ahe sane tɛ̃ɛ akɛ, ‘Ani nyɛpapa yɛ wala mli lolo? Ani nyɛyɛ nyɛmi nuu kroko?’ ni wɔgba lɛ anɔkwalei ni yɔɔ saji nɛɛ amli lɛ.+ Te wɔɔfee tɛŋŋ wɔle akɛ ebaakɛɛ akɛ, ‘Nyɛkɛ nyɛnyɛmi nuu lɛ abaa* lɛ’?”+  Kɛkɛ ni Yuda kpa etsɛ Israel fai akɛ: “Okɛ gbekɛ lɛ ahã mi,+ ní wɔyi mli kɛya koni wɔhi wala mli ní wɔkagboi+—wɔ kɛ bo kɛ wɔbii lɛ.+  Mi diɛŋtsɛ makwɛ koni nɔ ko akaba enɔ.*+ Kɛ́ nɔ ko ba enɔ lɛ, gbalamɔ mitoi. Kɛ́ mikɛ lɛ ekuuu sɛɛ ebahãaa bo ní mikɛ lɛ awo odɛŋ lɛ, no lɛ, mifee esha mishi bo kɛmiiya naanɔ. 10  Eji wɔshi wɔtee nɔŋŋ kulɛ, benɛ wɔtee jɛmɛ wɔba shii enyɔ.” 11  No hewɔ lɛ, amɛtsɛ Israel kɛɛ amɛ akɛ: “Kɛ́ nakai sa akɛ eba lɛ lɛ, no lɛ, nyɛfea enɛ: Nyɛŋɔa shikpɔŋ lɛ nɔ nibii kpakpai fe fɛɛ lɛ eko nyɛwoa nyɛkotokui lɛ amli, ní nyɛkɛyakea nuu lɛ:*+ balsam fioo,+ wo fioo, labdanum,* tso he totoi ní ama yɔɔ mli,+ pistashio,* kɛ almond. 12  Nyɛŋɔa shika lɛ toi enyɔ kɛyaa; agbɛnɛ hu, nyɛkɛ shika ní asaa akɛwo nyɛkotokui lɛ amli* lɛ akua sɛɛ kɛyaa.+ Ekolɛ amɛhiɛ ni kpa nɔ. 13  Nyɛŋɔa nyɛnyɛmi lɛ ní nyɛyaa, nyɛkua nyɛsɛɛ kɛyaa nuu lɛ ŋɔɔ. 14  Nyɔŋmɔ Ofe lɛ ahã nuu lɛ musuŋ atsɔ lɛ yɛ nyɛhewɔ, koni eŋmɛɛ nyɛnyɛmi nuu kroko lɛ kɛ Benyamin he ehã nyɛ. Shi mi lɛ, kɛ́ mibii baaje midɛŋ lɛ, amɛje midɛŋ!”+ 15  No hewɔ lɛ, hii lɛ ŋɔ nikeenii lɛ, ni amɛŋɔ shika lɛ toi enyɔ amɛhiɛ amɛdɛŋ, ni amɛŋɔ Benyamin hu. Kɛkɛ ni amɛte shi ni amɛyi mli amɛtee* Ejipt ni amɛyadamɔ Yosef hiɛ ekoŋŋ.+ 16  Be ni Yosef na Benyamin fata amɛhe lɛ, amrɔ lɛ, ekɛɛ nuu ni kwɛɔ eshĩa lɛ nɔ lɛ akɛ: “Okɛ hii lɛ aya shĩa lɛ, ní ogbe kooloi ní okɛfee niyenii, ejaakɛ hii lɛ kɛ mi baaye nii shwane nɛɛ.” 17  Amrɔ nɔŋŋ lɛ, nuu lɛ fee bɔ ni Yosef kɛɛ lɛ lɛ pɛpɛɛpɛ,+ ni ekɛ amɛ tee Yosef shĩa lɛ. 18  Shi gbeyei mɔmɔ hii lɛ be ni akɛ amɛ tee Yosef shĩa lɛ, ni amɛbɔi wiemɔ akɛ: “Shika lɛ ní asaa akɛwo wɔkotokui lɛ amli nyɛsɛɛ lɛ hewɔ akɛ wɔ eba biɛ lɛ. Agbɛnɛ, amɛbaatutua wɔ ni amɛkɛ wɔ baafee nyɔji, ni amɛbaahe wɔtejii lɛ yɛ wɔdɛŋ!”+ 19  No hewɔ lɛ, amɛtsi amɛbɛŋkɛ nuu lɛ ní kwɛɔ Yosef shĩa lɛ nɔ lɛ, ni amɛkɛ lɛ wie yɛ shĩa lɛ agbó lɛ naa. 20  Amɛkɛɛ: “Minuŋtsɔ, wɔmiikpa bo fai! Nyɛsɛɛ lɛ wɔba biɛ wɔbahé niyenii.+ 21  Shi be ni wɔyashɛ gbɔiatoohe lɛ ní wɔbɔi wɔkotokui lɛ anaa fɛnemɔ lɛ, naa, mɔ fɛɛ mɔ shika lɛ yɛ ekotoku lɛ mli,* wɔshika lɛ fɛɛ.+ No hewɔ lɛ, wɔ diɛŋtsɛ wɔkɛku sɛɛ kɛba. 22  Ni wɔkɛ shika kroko hu eba koni wɔkɛbahé niyenii. Wɔleee mɔ ni kɛ wɔshika lɛ wo wɔkotokui lɛ amli.”+ 23  Kɛkɛ ni ekɛɛ: “Enɛ akagba nyɛnaa. Nyɛkashea gbeyei. Nyɛ-Nyɔŋmɔ kɛ nyɛtsɛ Nyɔŋmɔ lɛ ji mɔ ni kɛ jwetri wo nyɛkotokui lɛ amli. Minine shɛ nyɛshika lɛ nɔ klɛŋklɛŋ.” Enɛ sɛɛ lɛ, ekɛ Simeon je kpo ebahã amɛ.+ 24  Ni nuu lɛ kɛ amɛ ba Yosef shĩa lɛ, ni ehã amɛ nu kɛhã amɛnaji ahe fɔmɔ, ni ehã amɛtejii lɛ niyenii. 25  Ni amɛsaa nikeenii+ lɛ amɛto koni kɛ́ Yosef ba shwane lɛ amɛkɛhã lɛ, ejaakɛ amɛnu akɛ amɛbaaye nii yɛ jɛmɛ.+ 26  Be ni Yosef bote shĩa lɛ mli lɛ, amɛkɛ amɛnikeenii lɛ bahã lɛ yɛ shĩa lɛ, ni amɛkoto lɛ ni amɛkɛ amɛhiɛ bumɔ shi.+ 27  Enɛ sɛɛ lɛ, ebi amɛ bɔ ni amɛyɔɔ, ni ekɛɛ: “Te nyɛtsɛ nuumo lɛ ni nyɛwie ehe sane lɛ yɔɔ tɛŋŋ? Ani eyɛ wala mli lolo?”+ 28  Kɛkɛ ni amɛkɛɛ: “Otsulɔ, wɔpapa lɛ, yɛ jogbaŋŋ. Eyɛ wala mli lolo.” Kɛkɛ ni amɛkula shi ni amɛkɛ amɛhiɛ bumɔ shi.+ 29  Be ni ewo ehiɛ nɔ ní ena enyɛmi nuu Benyamin, emami binuu lɛ,+ ekɛɛ: “Ani mɔ nɛ ji nyɛnyɛmi nuu gbekɛ kwraa lɛ ní nyɛwie ehe sane nyɛtsɔɔ mi lɛ?”+ Ekɛɛ kɛfata he akɛ: “Nyɔŋmɔ ajɔɔ bo,* mibinuu.” 30  Kɛkɛ ni Yosef he fee oya kɛje kpo, ejaakɛ enyɛɛɛ ehenumɔi anɔ eye dɔŋŋ yɛ enyɛmi lɛ hewɔ, ni etao he ko ní ebaayafó yɛ. No hewɔ lɛ, ekome too etee tsũ ko mli ni eyafó yɛ jɛmɛ.+ 31  No sɛɛ lɛ, efɔ ehiɛ ni eje kpo, ni eye ehe nɔ agbɛnɛ, ni ekɛɛ: “Nyɛkɛ niyenii lɛ abamamɔa shi.” 32  Amɛhã ekome too niyenii yɛ afã, ni amɛhã amɛ hu niyenii yɛ afã, ni Ejiptbii ní fata ehe lɛ sɔŋŋ hu ye amɛnɔ yɛ afã, ejaakɛ Ejiptbii nyɛɛɛ amɛkɛ Hebribii aye nii, ejaakɛ eji Ejiptbii lɛ anihiinii.+ 33  Nyɛmimɛi lɛ tara* ehiɛ, kromɔbi lɛ ta shi yɛ ekromɔ gbɛhe,+ ni gbekɛ kwraa lɛ hu ta shi yɛ egbekɛ gbɛhe, ni amɛteŋ mɔ fɛɛ mɔ tee nɔ ekwɛ enyɛmi hiɛ, ni amɛnaa ekpɛ amɛhe. 34  Etee nɔ ejie ekpɔlɔ lɛ nɔ niyenii lɛ eko kɛtee amɛkpɔlɔ lɛ nɔ, shi nɔ ni ehã Benyamin lɛ fa fe mɛi krokomɛi lɛ fɛɛ anɔ lɛ toi enumɔ.+ No hewɔ lɛ, amɛtee nɔ amɛkɛ lɛ ye nii ni amɛnu nii, ni amɛtsui nyɔ amɛmli.

Shishigbɛ Niŋmaa

Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Hebri sht. ŋm., “Nyɛkanaa mihiɛ.”
Loo “wɔbaakpeleke shi kɛya.”
Loo “wɔkpelekeŋ shi kɛyaŋ.”
Hebri sht. ŋm., “Nyɛkanaa mihiɛ.”
Loo “akpelekea shi kɛbaa.”
Loo “Mikɛ mihe baato awaba mahã lɛ.”
Loo “nyɛkɛkpelekea shi kɛyahãa nuu lɛ akɛ nikeenii.”
Loo “tso mli ama diŋ.”
Atĩa tso henɔ ko ní woɔ yibii tamɔ ŋkatiɛ, ni eŋɔɔ.
Hebri sht. ŋm., “akɛwo nyɛkotokui lɛ anaa.”
Loo “amɛkpeleke shi kɛtee.”
Hebri sht. ŋm., “ekotoku lɛ naa.”
Loo “Nyɔŋmɔ ahã oná ehiɛ dromɔ.”
Hebri sht. ŋm., “Amɛtara.”