1 Mose 14:1-24

  • Abram yahere Lot (1-16)

  • Melkizedek jɔɔ Abram (17-24)

14  Agbɛnɛ, yɛ Shinear+ maŋtsɛ Amrafel, kɛ Elasar maŋtsɛ Ariok, kɛ Elam+ maŋtsɛ Kedorlaomer,+ kɛ Goiim maŋtsɛ Tidal gbii lɛ amli lɛ,  maŋtsɛmɛi nɛɛ kɛ Sodom+ maŋtsɛ Bera, kɛ Gomora+ maŋtsɛ Birsha, kɛ Adma maŋtsɛ Shinab, kɛ Zeboim+ maŋtsɛ Shemeber, kɛ Bela, ní atsɛɔ lɛ Zoar hu lɛ maŋtsɛ lɛ wu.  Mɛnɛɛmɛi fɛɛ* bua amɛsraafoi lɛ anaa yɛ Sidim Jɔɔ*+ lɛ mli, ni no nɔŋŋ ji Ŋoo Ŋshɔ lɛ.*+  Amɛsɔmɔ Kedorlaomer afii 12, shi amɛtse atua yɛ afi ni ji 13 lɛ mli.  No hewɔ lɛ, yɛ afi ni ji 14 lɛ mli lɛ, Kedorlaomer kɛ maŋtsɛmɛi ni fata ehe lɛ ba ni amɛbaye Refabii lɛ anɔ kunim yɛ Ashterot-karnaim, amɛye Zuzbii lɛ anɔ kunim yɛ Ham, amɛye Embii+ lɛ anɔ kunim yɛ Shave-kiriataim,  ni amɛye Horbii+ lɛ hu anɔ kunim yɛ amɛgɔŋ ni ji Seir+ lɛ nɔ aahu kɛyashi El-paran ní yɔɔ ŋa lɛ nɔ lɛ tɔ̃ɔ.  Kɛkɛ ni amɛku amɛsɛɛ, ni amɛba En-mishpat, ni ji Kadesh,+ ni amɛye Amalekbii+ lɛ ashikpɔŋ lɛ fɛɛ kɛ Amorbii+ ni yɔɔ Hazazon-tamar+ lɛ hu anɔ kunim.  Be nɛɛ mli lɛ, Sodom maŋtsɛ lɛ, kɛ Gomora maŋtsɛ lɛ, kɛ Adma maŋtsɛ lɛ, kɛ Zeboim maŋtsɛ lɛ, kɛ Bela ní atsɛɔ lɛ Zoar hu lɛ maŋtsɛ lɛ fɛɛ fã, ni amɛbagba ta amɛwo amɛ yɛ Sidim Jɔɔ* lɛ mli,  amɛgba ta lɛ amɛwo Elam maŋtsɛ Kedorlaomer, Goiim maŋtsɛ Tidal, Shinear maŋtsɛ Amrafel, kɛ Elasar maŋtsɛ Ariok+—maŋtsɛmɛi ejwɛ nɛɛ kɛ maŋtsɛmɛi enumɔ lɛ wu. 10  Agbɛnɛ, Sidim Jɔɔ* lɛ mli eyi obɔ kɛ kootaa bui, ni Sodom kɛ Gomora maŋtsɛmɛi lɛ ka akɛ amɛbaajo foi, ni amɛyagbeegbee bui nɛɛ amli, ni mɛi ni shwɛ lɛ jo foi kɛtee gɔji lɛ anɔ. 11  Kɛkɛ ni kunimyelɔi lɛ ŋɔ Sodom kɛ Gomora nii fɛɛ, kɛ amɛniyenii fɛɛ, ni amɛyiŋ amɛtee.+ 12  Amɛŋɔ Lot, Abram nyɛmi nuu lɛ bi lɛ ni yɔɔ Sodom+ lɛ hu, kɛ enibii fɛɛ, ni amɛtsa amɛnyiɛmɔ lɛ nɔ. 13  No sɛɛ lɛ, nuu ko ni je ta lɛ mli lɛ ba ebakɛɛ Abram, Hebrinyo lɛ, nɔ ni etee nɔ lɛ. No mli lɛ, Abram yɛ Mamre,* Amornyo lɛ tsei wuji lɛ amasɛi;+ Eshkol kɛ Aner nyɛmi nuu ji Mamre.+ Hii nɛɛ kɛ Abram ekpaŋ. 14  No hewɔ lɛ, Abram nu akɛ aŋɔ ewekunyo*+ lɛ nom. Kɛkɛ ni ebua ehii ni atsɔse amɛ, ni ji etsuji 318 ní afɔ amɛ yɛ eshĩa lɛ anaa, ni etiu amɛ aahu kɛyashi Dan.+ 15  Nyɔɔŋ mli lɛ, ejara esraafoi lɛ amli, ni lɛ kɛ etsuji lɛ yatutua amɛ, ni amɛye amɛnɔ kunim. Ni etiu amɛ aahu kɛyashi Hoba, ní yɔɔ Damasko kooyi lɛ tɔ̃ɔ. 16  Esaa eŋɔ nibii lɛ fɛɛ, ni ekpɔ̃ Lot, ewekunyo lɛ, kɛ enibii lɛ kɛ yei lɛ kɛ mɛi krokomɛi lɛ. 17  Be ni Abram yaye Kedorlaomer kɛ maŋtsɛmɛi ni fata ehe lɛ anɔ kunim ni eku esɛɛ lɛ, Sodom maŋtsɛ lɛ tee ni ekɛ Abram yakpe yɛ Shave Jɔɔ,* ni ji Maŋtsɛ Jɔɔ lɛ mli.+ 18  Ni Melkizedek,+ Salem maŋtsɛ+ lɛ kɛ blodo kɛ wain ba; no mli lɛ, eji Nyɔŋmɔ Ni Nɔ Kwɔ Fe Fɛɛ lɛ osɔfo.+ 19  Kɛkɛ ni ejɔɔ Abram ekɛɛ: “Nyɔŋmɔ Ni Nɔ Kwɔ Fe Fɛɛ lɛ,Mɔ ni fee ŋwɛi kɛ shikpɔŋ lɛ, ajɔɔ Abram; 20  Ni ajie Nyɔŋmɔ Ni Nɔ Kwɔ Fe Fɛɛ lɛ,Mɔ ni eŋɔ mɛi ni waa bo yi lɛ ewo odɛŋ lɛ yi!” Ni Abram hã lɛ nɔ fɛɛ nɔ mlijai nyɔŋma mli ekome.+ 21  No sɛɛ lɛ, Sodom maŋtsɛ lɛ kɛɛ Abram akɛ: “Okɛ gbɔmɛi* lɛ ahã mi, shi nibii lɛ, ŋɔɔ ohã ohe.” 22  Shi Abram kɛɛ Sodom maŋtsɛ lɛ akɛ: “Miiwó minine nɔ kɛmiikã Yehowa, Nyɔŋmɔ Ni Nɔ Kwɔ Fe Fɛɛ lɛ, mɔ ni fee ŋwɛi kɛ shikpɔŋ lɛ kitã 23  akɛ, miŋɔŋ nɔ ko nɔ ko ni ji onɔ, kɛjɛ kpãa nɔ kɛyashi tokota naa kpãa nɔ, koni okakɛɛ akɛ, ‘Mi mihã Abram tsɔ niiatsɛ.’ 24  Miŋɔŋ nɔ ko nɔ ko, akɛ ja nɔ ni oblahii lɛ eye momo lɛ kɛkɛ. Shi hii ni kɛ mi tee lɛ, ni ji Aner kɛ Eshkol kɛ Mamre lɛ,+ hã amɛŋɔ amɛgbɛfaŋnɔ.”

Shishigbɛ Niŋmaa

Eeenyɛ efee akɛ, wiemɔ ni ji “mɛnɛɛmɛi fɛɛ” lɛ kɔɔ maŋtsɛmɛi ni atsĩ amɛtã yɛ kuku kome lɛ mli lɛ ahe.
Loo “Sidim Shikpɔŋ Kplanaa.”
Ni ji, Ŋshɔ Ni Egbo lɛ.
Loo “Sidim Shikpɔŋ Kplanaa.”
Loo “Sidim Shikpɔŋ Kplanaa.”
Loo “yɛ mama tsũi amli yɛ Mamre.”
Hebri sht. ŋm., “enyɛmi nuu.”
Loo “Shave Shikpɔŋ Kplanaa.”
Loo “susumai.”