1 Mose 34:1-31

  • Ato Daina kabonaa (1-12)

  • Yakob bihii lɛ laka Shekem hii lɛ (13-31)

34  No mli lɛ, Daina, ni ji Yakob biyoo ní ekɛ Lea fɔ lɛ,+ jeɔ kpo ni ekɛ shikpɔŋ lɛ nɔ oblayei lɛ yabɔɔ.*+  Be ni shikpɔŋ lɛ nɔ lumɔ ko ni ji Hivnyo Hamor+ lɛ binuu Shekem na lɛ lɛ, emɔ lɛ, ni ekɛ lɛ wɔ ni efite lɛ.  Ni enyɛɛɛ ejie ejwɛŋmɔ yɛ Daina, Yakob biyoo lɛ nɔ,* ni ebasumɔ oblayoo lɛ, ni ekɛ lɛ wie wiemɔi ni baakɔne eyiŋ.*  Naagbee lɛ, Shekem kɛɛ etsɛ Hamor+ akɛ: “Yaaŋɔ oblayoo nɛɛ obahã mi koni etsɔ miŋa.”  Be ni Yakob nu akɛ Shekem ebule ebiyoo Daina lɛ, no mli lɛ, ebihii lɛ kɛ ekooloi lɛ yɛ ŋa lɛ mli. No hewɔ lɛ, Yakob fee diŋŋ kɛyashi amɛku amɛsɛɛ amɛba.  Sɛɛ mli lɛ, Shekem tsɛ Hamor tee Yakob ŋɔɔ koni ekɛ lɛ ayawie.  Shi Yakob bihii lɛ nu he, ni amɛku amɛsɛɛ kɛjɛ ŋa lɛ mli kɛba amrɔ nɔŋŋ. Edɔ amɛ, ni amɛmli fu waa, ejaakɛ eshwie Israel hiɛ shi yɛ Yakob biyoo lɛ ní ekɛ lɛ wɔ lɛ hewɔ,+ nɔ ko ni esaaa akɛ afeɔ.+  Hamor kɛ amɛ wie ekɛɛ: “Mibinuu Shekem sumɔɔ* nyɛbiyoo lɛ. Nyɛfainɛ, nyɛkɛ lɛ ahãa lɛ gbãla,*  ni nyɛkɛ wɔ akpaŋ gbãla kpaŋmɔ.* Nyɛkɛ nyɛbiyei lɛ ahãa wɔ, ni nyɛŋɔa wɔbiyei lɛ nyɛhãa nyɛhe.+ 10  Nyɛkɛ wɔ ahia shi, shikpɔŋ lɛ kã shi hã nyɛ. Nyɛhia nɔ, ni nyɛyea jara yɛ nɔ, ni nyɛhea shi yɛ nɔ.” 11  Kɛkɛ ni Shekem kɛɛ oblayoo lɛ papa kɛ enyɛmimɛi hii lɛ akɛ: “Nyɛhãa mihiɛ abaa nyam yɛ nyɛhiɛ, ni mahã nyɛ nɔ fɛɛ nɔ ni nyɛbaabi mi. 12  Nyɛbaanyɛ nyɛbi mi yinii ni jara wa kɛ nikeenii.+ Mahã nyɛ nɔ fɛɛ nɔ ní nyɛbaabi mi lɛ. Oblayoo lɛ kɛkɛ nyɛkɛhãa mi gbãla.”* 13  Ni Yakob bihii lɛ kɛ lakamɔ wiemɔi hã Shekem kɛ etsɛ Hamor hetoo, ejaakɛ ebule Daina, amɛnyɛmi yoo lɛ. 14  Amɛkɛɛ amɛ akɛ: “Wɔnyɛŋ wɔfee nakai nɔ ko kɔkɔɔkɔ, akɛ wɔkɛ wɔnyɛmi yoo lɛ baahã nuu ní afoko lɛ ketia,+ ejaakɛ no lɛ, wɔshwie wɔhiɛiaŋ shi. 15  Wɔbaanyɛ wɔkpɛlɛ nɔ wɔhã nyɛ kɛji nyɛfee enɛ kɛkɛ: akɛ nyɛbaatsɔmɔ tamɔ wɔ ni nyɛbaafolɔ nyɛhii lɛ fɛɛ ketia.+ 16  Kɛkɛ lɛ, wɔkɛ wɔbiyei lɛ baahã nyɛ, ni wɔ hu wɔbaaŋɔ nyɛbiyei lɛ wɔhã wɔhe, ni wɔkɛ nyɛ baahi shi ni wɔbaatsɔmɔ gbɔmɛi kome. 17  Shi kɛ́ nyɛbooo wɔ toi ní nyɛbaahã afolɔ nyɛ ketia lɛ, no lɛ, wɔbaaŋɔ wɔbiyoo lɛ ní wɔya.” 18  Amɛwiemɔi lɛ ŋɔɔ Hamor+ kɛ ebinuu Shekem naa.+ 19  Oblanyo lɛ fiteee be kwraa ni eyafee nɔ ni amɛbi lɛ lɛ,+ ejaakɛ ená Yakob biyoo lɛ he miishɛɛ, ni oblanyo lɛ ji mɔ ni abuɔ lɛ fe fɛɛ yɛ epapa shĩa lɛ fɛɛ. 20  No hewɔ lɛ, Hamor kɛ ebinuu Shekem tee amɛmaŋ lɛ agbó lɛ naa, ni amɛkɛ maŋ lɛ mli hii lɛ wie+ amɛkɛɛ: 21  “Hii nɛɛ miitao amɛkɛ wɔ ahi shi yɛ toiŋjɔlɛ mli. Nyɛhãa amɛhia shikpɔŋ lɛ nɔ ní amɛye jara yɛ nɔ, ejaakɛ shikpɔŋ lɛ da bɔ ni amɛbaanyɛ amɛhi nɔ. Wɔbaanyɛ wɔŋɔ amɛbiyei lɛ akɛ wɔŋamɛi, ni wɔbaanyɛ wɔkɛ wɔbiyei lɛ ahã amɛ.+ 22  Ja wɔfee nɔ kome nɛɛ kɛkɛ dani gbɔmɛi lɛ baakpɛlɛ ní amɛkɛ wɔ ahi shi koni wɔtsɔmɔ gbɔmɛi kome, no ji akɛ: afolɔ hii fɛɛ ni yɔɔ wɔteŋ lɛ ketia tamɔ bɔ ni afolɔ amɛ hu ketia lɛ.+ 23  Kɛkɛ lɛ, nibii ni amɛyɔɔ, amɛninámɔi, kɛ kooloi ni amɛlɛɔ lɛ fɛɛ lɛ, ani etsɔŋ wɔnɔ? No hewɔ lɛ, nyɛhãa wɔkpɛlɛa nɔ wɔhãa amɛ koni amɛkɛ wɔ ahi shi.” 24  Mɛi fɛɛ ni tsɔɔ Hamor maŋ lɛ agbó lɛ mli kɛjeɔ kpo lɛ bo lɛ kɛ ebinuu Shekem toi, ni afolɔ hii lɛ fɛɛ ketia, mɛi fɛɛ ní tsɔɔ maŋ lɛ agbó lɛ mli kɛjeɔ kpo lɛ. 25  Shi gbi ni ji etɛ lɛ nɔ, be ni ketia lɛ miiwa amɛhe lolo lɛ, Yakob bihii enyɔ, Simeon kɛ Levi, ni ji Daina nyɛmimɛi hii+ lɛ ateŋ mɔ fɛɛ mɔ kɔ eklante ni amɛtee maŋ ni hiɛ bɛ ehe nɔ lɛ mli ni amɛyagbe hii lɛ fɛɛ.+ 26  Amɛkɛ klante gbe Hamor kɛ ebinuu Shekem, ni amɛŋɔ Daina kɛje Shekem shĩa lɛ, ni amɛtee. 27  Yakob bihii krokomɛi lɛ banina hii ní agbe lɛ, ni amɛloo maŋ lɛ mli nibii lɛ, ejaakɛ abule amɛnyɛmi yoo lɛ.+ 28  Amɛloo amɛtoi kɛ amɛtsinai kɛ amɛtejii kɛ nɔ fɛɛ nɔ ni yɔɔ maŋ lɛ mli kɛ ŋa lɛ mli lɛ. 29  Agbɛnɛ hu, amɛloo nibii ní amɛyɔɔ lɛ fɛɛ, ni amɛmɔmɔ amɛbii bibii kɛ amɛŋamɛi lɛ fɛɛ, ni amɛloo nɔ fɛɛ nɔ ni yɔɔ shĩai lɛ amli lɛ. 30  Kɛkɛ ni Yakob kɛɛ Simeon kɛ Levi akɛ:+ “Nyɛkɛ haomɔ kpele* eba minɔ, ni nyɛhã mihe eje fu ewo shikpɔŋ lɛ nɔ bii lɛ, Kanaanbii kɛ Perizbii lɛ. Wɔyi faaa,* ni bɔ fɛɛ bɔ ni fee lɛ, amɛbaabua amɛhe naa kɛbatutua mi, ni amɛbaakpãtã mihiɛ, mi kɛ mishĩabii lɛ.” 31  Shi amɛkɛɛ: “Ani esa akɛ mɔ ko kɛ wɔnyɛmi yoo lɛ aye tamɔ akɛ ashawo yeɔ lɛ?”

Shishigbɛ Niŋmaa

Loo “eyakwɛɔ shikpɔŋ lɛ nɔ oblayei lɛ.”
Loo “Ni esusuma mɔ Daina, Yakob biyoo lɛ.”
Hebri sht. ŋm., “ekɛ oblayoo lɛ tsui wie.”
Loo “susuma emɔ.”
Loo “nyɛkɛ lɛ ahãa lɛ akɛ eŋa.”
Loo “nyɛkɛ wɔ abotea gbalashihilɛ mli ní wɔ hu wɔkɛ nyɛ abote gbalashihilɛ mli.”
Loo “nyɛkɛhãa mi akɛ miŋa.”
Loo “musu.”
Loo “Miyi faaa.”