1 Mose 45:1-28
45 Agbɛnɛ, Yosef nyɛɛɛ ehe nɔ eye dɔŋŋ yɛ esɔɔlɔi lɛ fɛɛ ahiɛ.+ No hewɔ lɛ, ebo ekɛɛ: “Nyɛ fɛɛ nyɛshia mimasɛi nyɛyaa!” Mɔ ko mɔ ko bɛ Yosef masɛi be ni ejie ehe shi etsɔɔ enyɛmimɛi lɛ.+
2 Kɛkɛ ni ebɔi yaafo waa aahu akɛ Ejiptbii lɛ nu he, ni Farao shĩabii lɛ hu nu he.
3 Naagbee lɛ, Yosef kɛɛ enyɛmimɛi lɛ akɛ: “Miji Yosef. Ani mipapa yɛ wala mli lolo?” Shi enyɛmimɛi lɛ nyɛɛɛ ahã lɛ hetoo ko kwraa, ejaakɛ amɛnaa ekpɛ amɛhe yɛ ehewɔ.
4 No hewɔ lɛ, Yosef kɛɛ enyɛmimɛi lɛ akɛ: “Nyɛfainɛ, nyɛtsia nyɛbɛŋkɛa mi.” Kɛkɛ ni amɛtsi amɛbɛŋkɛ lɛ.
Ni ekɛɛ: “Miji nyɛnyɛmi Yosef, mɔ ni nyɛhɔ̃ɔ kɛba Ejipt lɛ.+
5 Shi amrɔ nɛɛ, nyɛkahãa edɔa nyɛ, ni nyɛkashwaa nyɛhe akɛ nyɛhɔ̃ɔ mi kɛba biɛ; ejaakɛ Nyɔŋmɔ tsu mi kɛtsɔ nyɛhiɛ kɛhã mɛi awala yibaamɔ.+
6 Kɛjɛ be ni hɔmɔ lɛ ba shikpɔŋ lɛ nɔ nɛɛ, afii enyɔ mli abote lɛ,+ ni eshwɛ afii enumɔ lolo ní aduŋ nii, ni akpaŋ nii hu.
7 Shi Nyɔŋmɔ tsu mi kɛtsɔ nyɛhiɛ bɔ ni afee ní ahã mɛi komɛi ashwɛ+ ahã nyɛ yɛ shikpɔŋ lɛ nɔ, ní atsɔ kpɔmɔ kpeteŋkpele nɔ abaa nyɛwala yi.
8 No hewɔ lɛ, agbɛnɛ, jeee nyɛ nyɛtsu mi kɛba biɛ, shi moŋ, anɔkwa Nyɔŋmɔ lɛ ni, bɔ ni afee ní ewó mi Farao ŋaawolɔnukpa,* kɛ eshĩa lɛ fɛɛ nɔ nuŋtsɔ, kɛ Ejipt shikpɔŋ lɛ fɛɛ nɔyelɔ.+
9 “Nyɛkua nyɛsɛɛ nyɛyaa mipapa ŋɔɔ oya nɔŋŋ, ní nyɛyakɛa lɛ akɛ, ‘Nɔ ni obinuu Yosef kɛɛ nɛ: “Nyɔŋmɔ ewó mi Ejipt fɛɛ nɔ nuŋtsɔ.+ Ba* miŋɔɔ. Kaatsɛ.+
10 Obaahi Goshen shikpɔŋ lɛ nɔ,+ koni obɛŋkɛ mi—bo kɛ obii kɛ onabii kɛ otoi kɛ otsinai kɛ nɔ fɛɛ nɔ ni oyɔɔ.
11 Mahã bo niyenii yɛ jɛmɛ, ejaakɛ eshwɛ hɔmɔ afii lɛ enumɔ lolo.+ Kɛjeee nakai lɛ, obaaye ohia, bo kɛ oshĩa lɛ kɛ nɔ fɛɛ nɔ ni oyɔɔ lɛ.”’
12 Amrɔ nɛɛ, nyɛ kɛ minyɛmi Benyamin fɛɛ miina kɛ nyɛ diɛŋtsɛ nyɛhiŋmɛii akɛ, mi tuuntu mikɛ nyɛ wieɔ lɛ.+
13 No hewɔ lɛ, nyɛyagbaa mipapa anunyam fɛɛ ní miyɔɔ yɛ Ejipt kɛ nɔ fɛɛ nɔ ni nyɛna lɛ. Agbɛnɛ, nyɛhe afea oya ni nyɛkɛ mipapa abaa* biɛ.”
14 Kɛkɛ ni efua enyɛmi Benyamin ni ejwa yaafo,* ni Benyamin hu fua lɛ ni efó.+
15 Ni eshɔshɔɔ enyɛmimɛi lɛ fɛɛ anaa ni efó eshwie amɛnɔ, ni no sɛɛ lɛ, enyɛmimɛi lɛ kɛ lɛ wie.
16 Anu sane lɛ he yɛ Farao shĩa lɛ akɛ: “Yosef nyɛmimɛi lɛ eba!” Eŋɔɔ Farao kɛ etsuji lɛ anaa.
17 No hewɔ lɛ, Farao kɛɛ Yosef akɛ: “Kɛɛmɔ onyɛmimɛi lɛ akɛ, ‘Nyɛfea enɛ: Nyɛtoa jatsui nyɛshwiea nyɛkooloi lɛ anɔ, ní nyɛyaa Kanaan shikpɔŋ lɛ nɔ,
18 ni nyɛyaŋɔa nyɛpapa kɛ nyɛshĩabii lɛ kɛbaa miŋɔɔ yɛ biɛ. Mikɛ Ejipt shikpɔŋ lɛ nɔ nibii kpakpai lɛ baahã nyɛ, ni nyɛbaahi shikpɔŋ lɛ nɔ he ni hi fe fɛɛ lɛ.’*+
19 Ni bo lɛ, afã bo ní okɛɛ amɛ akɛ:+ ‘Nyɛfea enɛ: Nyɛŋɔa shwiilii+ kɛjɛa Ejipt shikpɔŋ lɛ nɔ kɛhã nyɛbii kɛ nyɛŋamɛi lɛ, ní nyɛkɛ ekome ayawóa nyɛpapa, ní nyɛbaa biɛ.+
20 Nyɛkayea nyɛtsui yɛ nyɛnibii ahewɔ,+ ejaakɛ Ejipt shikpɔŋ lɛ nɔ nibii kpakpai fe fɛɛ lɛ, nyɛnɔ ni.’”
21 Ni Israel bihii lɛ fee nakai, ni Yosef hã amɛ shwiilii yɛ Farao famɔi lɛ anaa, ni ehã amɛ niyenii kɛhã gbɛfãa lɛ.
22 Ehã amɛteŋ mɔ fɛɛ mɔ atade hee komekome, shi Benyamin lɛ, ehã lɛ jwiɛtɛi kapɛji 300 kɛ atadei hei enumɔ.+
23 Ni etsɛ lɛ, ekɛ nibii ní nyiɛ sɛɛ nɛɛ maje lɛ: tejii nyɔŋma ní tere Ejipt nibii kpakpai kɛ tejiyei nyɔŋma ní tere ŋmaa* kɛ blodo* kɛ niyenii krokomɛi koni akɛyahã epapa kɛhã gbɛfãa lɛ.
24 No hewɔ lɛ, ewo enyɛmimɛi lɛ gbɛ, ni be ni amɛyaa lɛ, ekɛɛ amɛ akɛ: “Nyɛmli akayafua nyɛhe yɛ gbɛ lɛ nɔ.”+
25 Kɛkɛ ni amɛshi Ejipt, ni amɛba* amɛtsɛ Yakob ŋɔɔ yɛ Kanaan shikpɔŋ lɛ nɔ.
26 Ni amɛbabɔ lɛ amaniɛ amɛkɛɛ: “Yosef yɛ wala mli lolo, ni lɛ ji Ejipt shikpɔŋ lɛ fɛɛ nɔ nɔyelɔ!”+ Shi etsui gbo tum yɛ emli, ejaakɛ eheee amɛ eyeee.+
27 Be ni amɛtee nɔ amɛgba amɛtsɛ Yakob nibii fɛɛ ni Yosef kɛɛ amɛ, ní ena shwiilii ni Yosef kɛtsu koni akɛbawó lɛ kɛba lɛ, ebɔi* hewalɛ hee námɔ.
28 Israel bo akɛ: “Efa! Mibinuu Yosef yɛ wala mli lolo! Esa akɛ maya ní mayana lɛ dani magbo!”+
Shishigbɛ Niŋmaa
^ Hebri sht. ŋm., “tsɛ.”
^ Loo “Kpelekemɔ shi kɛba.”
^ Loo “akpelekea shi kɛbaa.”
^ Hebri sht. ŋm., “egbee enyɛmi Benyamin kuɛ nɔ ni ejwa yaafo.”
^ Loo “ni nyɛbaaye shikpɔŋ lɛ he ni ewo fɔ lɛ.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “niyenii.”
^ Loo “amɛkwɔ kɛba.”
^ Loo “emumɔ bɔi.”
