1 Mose 17:1-27

  • Abraham baatsɔ jeŋmaji pii atsɛ (1-8)

    • Atsake Abram gbɛ́i awo lɛ Abraham (5)

  • Ketiafoo kpaŋmɔ (9-14)

  • Atsake Sarai gbɛ́i awo lɛ Sara (15-17)

  • Awo shi akɛ abaafɔ Isak (18-27)

17  Be ni Abram eye afii 99 lɛ, Yehowa jie ehe kpo etsɔɔ Abram ni ekɛɛ lɛ akɛ: “Miji Nyɔŋmɔ Ofe lɛ. Hii shi akɛ anɔkwafo yɛ mihiɛ,* ní ofee mɔ ni sane ko bɛ ehe.*  Mahã mikpaŋmɔ ní yɔɔ mi kɛ bo teŋ lɛ ama shi,+ ni mahã oshwere babaoo diɛŋtsɛ.”+  Kɛkɛ ni Abram kɛ ehiɛ bu shi, ni Nyɔŋmɔ tee nɔ ekɛ lɛ wie ekɛɛ:  “Naa! mi lɛ, mikɛ bo ekpaŋ kpaŋmɔ,+ ni bɔ fɛɛ bɔ ní fee lɛ, obaatsɔ jeŋmaji pii atsɛ.+  Atsɛŋ bo Abram* dɔŋŋ; abaatsɛ bo Abraham,* ejaakɛ mahã otsɔ jeŋmaji pii atsɛ.  Mahã owo shwiei babaoo diɛŋtsɛ, ni mahã otsɔ jeŋmaji, ni maŋtsɛmɛi baajɛ omli aba.+  “Ni maye mikpaŋmɔ ní mi kɛ bo+ kɛ oseshi ni baaba yɛ osɛɛ lɛ ekpaŋ lɛ nɔ yɛ amɛyinɔi fɛɛ amli, ni enɛ ji naanɔ kpaŋmɔ, akɛ matsɔ Nyɔŋmɔ mahã bo kɛ oseshi ni baaba yɛ osɛɛ lɛ.  Ni mikɛ shikpɔŋ ni ohi nɔ akɛ gbɔ+ lɛ—Kanaan shikpɔŋ muu lɛ fɛɛ—baahã bo kɛ oseshi ni baaba yɛ osɛɛ lɛ akɛ amɛnɔ kɛmiiya naanɔ, ni matsɔ amɛ-Nyɔŋmɔ.”+  Nyɔŋmɔ tee nɔ ekɛ Abraham wie ekɛɛ: “Bo lɛ, ye mikpaŋmɔ lɛ nɔ, bo kɛ oseshi ni baaba yɛ osɛɛ lɛ yɛ amɛyinɔi fɛɛ amli. 10  Enɛ ji mikpaŋmɔ ni yɔɔ mi kɛ bo teŋ, ní bo kɛ oseshi ni baaba yɛ osɛɛ lɛ baaye nɔ lɛ: Esa akɛ afo nuu fɛɛ nuu ni yɔɔ nyɛteŋ lɛ ketia.+ 11  Esa akɛ afolɔ nyɛ ketia, ni no baatsɔ kpaŋmɔ ni yɔɔ mi kɛ nyɛ teŋ lɛ he okadi.+ 12  Yɛ nyɛyinɔi fɛɛ amli lɛ, esa akɛ afo nuu fɛɛ nuu ni yɔɔ nyɛteŋ ni ená gbii kpaanyɔ lɛ ketia,+ mɔ fɛɛ mɔ ni afɔ lɛ yɛ shĩa kɛ mɔ fɛɛ mɔ ni jeee oseshinyo ní akɛ shika hé lɛ yɛ gbɔ ko dɛŋ lɛ. 13  Esa akɛ afo nuu fɛɛ nuu ni afɔ yɛ oshĩa lɛ, kɛ nuu fɛɛ nuu ni okɛ oshika hé lɛ ketia,+ ni esa akɛ mikpaŋmɔ ni yɔɔ nyɛheloo mli lɛ atsɔ naanɔ kpaŋmɔ. 14  Nuu fɛɛ nuu ni afoko lɛ ketia ní hãaa afo lɛ ketia lɛ, afo nakai mɔ* lɛ ashɛ afɔ̃* kɛje emaŋbii lɛ ateŋ. Eku mikpaŋmɔ lɛ mli.” 15  Kɛkɛ ni Nyɔŋmɔ kɛɛ Abraham akɛ: “Shi oŋa Sarai*+ lɛ, esaaa akɛ otsɛɔ lɛ Sarai dɔŋŋ, ejaakɛ abaatsɛ lɛ Sara.* 16  Majɔɔ lɛ, ni agbɛnɛ hu, mahã efɔ binuu ehã bo;+ majɔɔ lɛ ni ebaatsɔ jeŋmaji; ni maji anɔ maŋtsɛmɛi baajɛ emli aba.” 17  Kɛkɛ ni Abraham kɛ ehiɛ bu shi ni ebɔi ŋmɔɔ, ni ekɛɛ yɛ etsuiŋ akɛ:+ “Ani abaafɔ bi ahã nuu ni eye afii 100 lɛ, ni Sara, yoo ni eye afii 90 lɛ baafɔ bi?”+ 18  No hewɔ lɛ, Abraham kɛɛ anɔkwa Nyɔŋmɔ lɛ akɛ: “Ao, miná kulɛ Ishmael yi ná wala yɛ ohiɛ!”+ 19  Kɛkɛ ni Nyɔŋmɔ kɛɛ: “Bɔ fɛɛ bɔ ni fee lɛ, oŋa Sara baafɔ binuu ehã bo, ni gbɛ́i ni owo lɛ ji Isak.*+ Ni mahã mikpaŋmɔ lɛ ama shi ahã lɛ, ní etsɔ naanɔ kpaŋmɔ ehã eseshi ni baaba yɛ esɛɛ lɛ.+ 20  Shi yɛ Ishmael gbɛfaŋ lɛ, minu nɔ ni owie lɛ. Naa! majɔɔ lɛ ni mahã ewo shwiei, ni ebaashwere babaoo diɛŋtsɛ. Ebaafɔ lumɛi 12, ni mahã etsɔ jeŋmaŋ kpeteŋkpele.+ 21  Shi mahã mikpaŋmɔ lɛ ama shi ahã Isak,+ mɔ ni Sara baafɔ ehã bo yɛ biɛ afi pɛpɛɛpɛ mli lɛ.”+ 22  Be ni Nyɔŋmɔ kɛ Abraham wie etã lɛ, eshi Abraham etee.* 23  Kɛkɛ ni Abraham ŋɔ ebinuu Ishmael kɛ hii fɛɛ ni afɔ yɛ eshĩa lɛ kɛ mɔ fɛɛ mɔ ni ekɛ shika hé, nuu fɛɛ nuu ni yɔɔ Abraham shĩa lɛ, ni efolɔ amɛ ketia yɛ nakai gbi lɛ nɔ nɔŋŋ, tamɔ bɔ ni Nyɔŋmɔ kɛ lɛ wie lɛ.+ 24  Abraham eye afii 99 be ni ehã afo lɛ ketia lɛ.+ 25  Ni ebinuu Ishmael eye afii 13 be ni afo lɛ ketia lɛ.+ 26  Nakai gbi lɛ nɔ nɔŋŋ lɛ, afo Abraham ketia, ni afo ebinuu Ishmael hu ketia. 27  Hii fɛɛ ni yɔɔ eshĩa lɛ, mɔ fɛɛ mɔ ni afɔ lɛ yɛ shĩa lɛ kɛ mɔ fɛɛ mɔ ni akɛ shika hé yɛ gbɔ ko dɛŋ lɛ, afolɔ amɛ hu ketia afata ehe.

Shishigbɛ Niŋmaa

Hebri sht. ŋm., “Nyiɛmɔ yɛ mihiɛ.”
Loo “shwamɔ ko bɛ ehe.”
Eshishi ji, “Tsɛ Nɔ Kwɔ (Awó Tsɛ Nɔ Gojoo).”
Eshishi ji, “Asafoku Tsɛ; Mɛi Pii Atsɛ.”
Loo “susuma.”
Loo “agbe lɛ.”
Eeenyɛ efee akɛ, eshishi ji, “Béilɔ.”
Eshishi ji, “Yoo Ablade.”
Eshishi ji, “Ŋmɔlɔ.”
Loo “eshi Abraham ni ekwɔ kɛtee.”