1 Mose 31:1-55
31 Sɛɛ mli lɛ, enu nɔ ni Laban bihii lɛ kɛɔ lɛ, akɛ: “Yakob eŋɔ wɔtsɛ nɔ fɛɛ nɔ, ni wɔtsɛ nibii lɛ anɔ etsɔ ená nibii nɛɛ fɛɛ.”+
2 Be ni Yakob kwɛ Laban hiɛ lɛ, ena akɛ etseee ehiɛ ehãaa lɛ dɔŋŋ tamɔ tsutsu lɛ.+
3 Agbɛnɛ, Yehowa kɛɛ Yakob akɛ: “Kuu osɛɛ kɛya otsɛmɛi ashikpɔŋ lɛ nɔ kɛ owekumɛi lɛ aŋɔɔ,+ ni maya nɔ mikɛ bo ahi shi.”
4 Kɛkɛ ni Yakob tsu ayakɛɛ Rahel kɛ Lea akɛ amɛba ŋa lɛ mli, he ni etooku lɛ yɔɔ lɛ,
5 ni ekɛɛ amɛ akɛ:
“Mina akɛ, nyɛtsɛ tseee ehiɛ ehãaa mi dɔŋŋ,+ shi Nyɔŋmɔ ní mipapa sɔmɔɔ lɛ lɛ etee nɔ ekɛ mi ehi shi.+
6 Nyɛ diɛŋtsɛ nyɛle faŋŋ akɛ, mikɛ mihewalɛ fɛɛ esɔmɔ nyɛpapa.+
7 Ni nyɛpapa eka akɛ ebaashishiu mi, ni etsake minyɔmɔwoo lɛ shii nyɔŋma; shi Nyɔŋmɔ eŋmɛko lɛ gbɛ ní eye mi awui ko.
8 Kɛ́ ekɛɛ, ‘Toi ni he yɔɔ turuntarai lɛ baafee onyɔmɔwoo’ lɛ, kɛkɛ lɛ tooku muu lɛ fɛɛ efɔ nɔ ni he yɔɔ turuntarai; shi kɛ́ ekɛɛ, ‘Toi ni he yɔɔ samaisamai lɛ baafee onyɔmɔwoo’ lɛ, kɛkɛ lɛ tooku muu lɛ fɛɛ efɔ nɔ ni he yɔɔ samaisamai.+
9 No hewɔ lɛ, Nyɔŋmɔ tee nɔ eshɔ̃ nyɛpapa kooloi lɛ yɛ edɛŋ, ni ekɛhã mi.
10 Be ko be ní tooyei lɛ akwɔɔ be shɛ lɛ, mihole mihiŋmɛii anɔ ni mina yɛ lamɔ mli akɛ abotiahii ní he yɔɔ samaisamai kɛ turuntarai kɛ damdam lɛ ji nɔ ni kwɔɔ abotiayei lɛ.+
11 Kɛkɛ ni anɔkwa Nyɔŋmɔ lɛ bɔfo lɛ kɛɛ mi yɛ lamɔ lɛ mli akɛ, ‘Yakob!’ ni mikɛɛ, ‘Naa mi.’
12 Ni etsa nɔ ekɛɛ akɛ, ‘Ofainɛ, holemɔ ohiŋmɛii anɔ, ni obaana akɛ abotiahii lɛ fɛɛ ní he yɔɔ samaisamai, turuntarai, kɛ damdam lɛ ji nɔ ni kwɔɔ abotiayei lɛ, ejaakɛ mina nibii fɛɛ ni Laban feɔ bo lɛ.+
13 Miji anɔkwa Nyɔŋmɔ lɛ ni jie ehe kpo etsɔɔ bo yɛ Betel,+ he ni ofɔ akulashiŋ lɛ mu, kɛ he ni owo mi shi yɛ lɛ.+ Agbɛnɛ tee shi, jee shikpɔŋ nɛɛ nɔ, ní oku osɛɛ kɛya shikpɔŋ ni afɔ bo yɛ nɔ lɛ nɔ.’”+
14 Kɛkɛ ni Rahel kɛ Lea hã lɛ hetoo akɛ: “Ani gbɛfaŋnɔ ko yɛ lolo ní wɔbaaná akɛ gboshinii yɛ wɔtsɛ shĩa lɛ?
15 Ani jeee mɛikpɔji ebuɔ wɔ? Ejaakɛ ehɔ̃ɔ wɔ, ni eeye shika ni akɛhã yɛ wɔhewɔ lɛ.+
16 Nii fɛɛ ni Nyɔŋmɔ ehe kɛje wɔpapa dɛŋ lɛ ji wɔ kɛ wɔbii lɛ anɔ.+ No hewɔ lɛ, agbɛnɛ feemɔ nɔ fɛɛ nɔ ni Nyɔŋmɔ ekɛɛ bo akɛ ofee lɛ.”+
17 Kɛkɛ ni Yakob te shi ni ehole ebii kɛ eŋamɛi lɛ etara afukpɔŋɔi lɛ anɔ,+
18 ni ebɔi etooku lɛ fɛɛ kɛ nibii fɛɛ ni ená lɛ kpalamɔ,+ kooloi ni eyɔɔ ní ená yɛ Padan-aram lɛ, koni eya etsɛ Isak ŋɔɔ yɛ Kanaan shikpɔŋ lɛ nɔ.+
19 No mli lɛ, Laban etee eyaaku egwantɛŋi lɛ ahetsɔi, ni Rahel ju epapa terafim amagai*+ lɛ.+
20 Ni Yakob hu shwɛ Laban, Aramnyo lɛ akpa, ejaakɛ ekɛɛɛ lɛ akɛ eejo foi eya.
21 Ni ejo foi ni eyafo Faa*+ lɛ, lɛ kɛ nɔ fɛɛ nɔ ni eyɔɔ. Kɛkɛ ni ekɛ ehiɛ tsɔɔ Gilead gɔji lɛ anɔ gbɛ.+
22 Gbi ni ji etɛ lɛ nɔ lɛ, akɛɛ Laban akɛ Yakob ejo foi.
23 No hewɔ lɛ, eŋɔ enyɛmimɛi* lɛ efata ehe ni etiu lɛ gbii kpawo gbɛnyiɛmɔ, ni eyanina lɛ yɛ Gilead gɔji lɛ anɔ.
24 Ni Nyɔŋmɔ ba Laban, Aramnyo+ lɛ, ŋɔɔ yɛ lamɔ mli nyɔɔŋ,+ ni ekɛɛ lɛ akɛ: “Kwɛmɔ jogbaŋŋ yɛ nɔ ni obaakɛɛ Yakob lɛ he, ekpakpa jio, efɔŋ jio.”*+
25 No hewɔ lɛ, Laban tsi ebɛŋkɛ Yakob, no mli lɛ, Yakob efee emama tsũ yɛ gɔŋ lɛ nɔ, ni Laban kɛ enyɛmimɛi lɛ ebɔ nsara yɛ Gilead gɔji lɛ anɔ.
26 Kɛkɛ ni Laban bi Yakob akɛ: “Mɛni ofee nɛɛ? Mɛni hewɔ oshwɛ mi akpa, ni oloo mibiyei lɛ kɛmiiya tamɔ mɛi ni aŋɔ amɛ nom yɛ klante naa nɛɛ?
27 Mɛni hewɔ ojo foi nigii, ni oshwɛ mi akpa, ni okɛɛɛ mi lɛ? Eji okɛɛ mi kulɛ, mawo bo gbɛ kɛ miishɛɛ kɛ lalai kɛ akashaa kɛ saŋku.
28 Shi ohãaa mi hegbɛ ní mashɔ minabii* kɛ mibiyei lɛ anaa. Oye kwashiai asane.
29 Manyɛ maye* bo awui, shi otsɛ Nyɔŋmɔ lɛ kɛ mi wie nyɛ gbɛkɛ ekɛɛ, ‘Kwɛmɔ jogbaŋŋ yɛ nɔ ni obaakɛɛ Yakob lɛ he, ekpakpa jio, efɔŋ jio.’+
30 Agbɛnɛ oshi, ejaakɛ ooshwe ní oku osɛɛ kɛya otsɛ shĩa lɛ, shi mɛni hewɔ oju minyɔŋmɔi lɛ?”+
31 Yakob hã Laban hetoo akɛ: “Nɔ hewɔ ní mijo foi nigii lɛ ji akɛ, mishe gbeyei, ejaakɛ mikɛɛ mihe akɛ, ‘Obaashɔ̃ obiyei lɛ kɛje midɛŋ.’
32 Mɔ fɛɛ mɔ dɛŋ ni obaana onyɔŋmɔi lɛ yɛ lɛ, ehiŋ wala mli. Taomɔ minibii lɛ amli yɛ wɔnyɛmimɛi lɛ ahiɛ, ní oŋɔ nɔ ni ji onɔ lɛ.” Shi no mli lɛ, Yakob leee akɛ Rahel eju nyɔŋmɔi lɛ.
33 No hewɔ lɛ, Laban tee Yakob mama tsũ lɛ mli, ni etee Lea mama tsũ lɛ mli, ni etee nyɔji yei+ lɛ amama tsũ lɛ mli, shi enaaa amagai lɛ. Kɛkɛ ni eje kpo kɛje Lea mama tsũ lɛ mli ni etee Rahel mama tsũ lɛ mli.
34 No mli lɛ, Rahel eŋɔ terafim amagai lɛ, ni ekɛwo afukpɔŋɔ nɔtamɔnii ní yei taa nɔ lɛ mli, ni eta nɔ. No hewɔ lɛ, Laban tao mama tsũ lɛ mli fɛɛ, shi enaaa amagai lɛ.
35 Kɛkɛ ni Rahel kɛɛ epapa akɛ: “Minuŋtsɔ, omli akafu mi, akɛni minyɛɛɛ shi mate yɛ ohiɛ lɛ hewɔ, ejaakɛ mifee yei anii.”+ No hewɔ lɛ, etee nɔ etao terafim amagai lɛ fitsofitso, shi enaaa.+
36 Kɛkɛ ni Yakob mli fu ni ewie eshi Laban. Ni Yakob kɛɛ Laban akɛ: “Mɛɛ efɔŋ mifee, ni mɛɛ esha mifee hewɔ okɛ hiɛdɔɔ tiuɔ mi lɛ?
37 Amrɔ nɛɛ ni otao minibii lɛ fɛɛ amli lɛ, mɛni ona ni ji oshĩa nibii lɛ eko? Okɛŋmɛ biɛ, yɛ minyɛmimɛi lɛ kɛ bo hu onyɛmimɛi lɛ ahiɛ, koni amɛkojo mi kɛ bo teŋ.
38 Afii 20 ni mikɛ bo ehi shi nɛɛ, ogwantɛŋi kɛ obotiai lɛ eko musu shrãkeko pɛŋ,+ ni miyeko ogwantɛŋhii lɛ eko pɛŋ.
39 Mikɛ kooloi ni kooloi awuiyelɔi tserɛɔ amɛmli lɛ eko eko ebahãaa bo.+ Mi diɛŋtsɛ mitoɔ najiaŋ. Kɛ́ aju kooloo lɛ shwane jio, aju nyɔɔŋ jio, obiɔ ní mato najiaŋ.
40 Shwane mli lɛ, latsa tsaa mi, ni nyɔɔŋ mli lɛ, fɛ̃i yeɔ mi, ni wɔ hu tseɔ yɛ mihiɛ.*+
41 Afii 20 sɔŋŋ nɛ ní mihi oshĩa lɛ. Misɔmɔ bo afii 14 yɛ obiyei enyɔ lɛ ahewɔ, kɛ afii 6 yɛ otooku lɛ hewɔ, ni otsake minyɔmɔwoo lɛ shii nyɔŋma sɔŋŋ.+
42 Eji Nyɔŋmɔ ní mipapa sɔmɔɔ lɛ,+ ni ji Abraham Nyɔŋmɔ lɛ kɛ mɔ ni Isak sheɔ lɛ gbeyei*+ lɛ bɛ misɛɛ kulɛ, amrɔ nɛɛ obaawo mi gbɛ kɛ midɛ̃ folo. Nyɔŋmɔ ena mimanehulu kɛ mideŋmegbomɔ lɛ, ni no hewɔ ejaje bo nyɛ gbɛkɛ lɛ.”+
43 Kɛkɛ ni Laban hã Yakob hetoo akɛ: “Yei lɛ mibiyei ni, ni gbekɛbii lɛ mibii ni, ni tooku lɛ mitooku ni, ni nɔ fɛɛ nɔ ni onaa nɛɛ, mi kɛ mibiyei lɛ anɔ ni. Mɛni manyɛ mafee ŋmɛnɛ mashi mɛnɛɛmɛi aloo bii ni amɛfɔfɔɔ lɛ?
44 Agbɛnɛ, ba ni wɔkpaŋ, mi kɛ bo, ni no baatsɔ odase yɛ wɔteŋ.”
45 No hewɔ lɛ, Yakob wó tɛ ni ekɛma shi tamɔ akulashiŋ.+
46 Kɛkɛ ni Yakob kɛɛ enyɛmimɛi lɛ akɛ: “Nyɛkɔlɔa tɛi!” Ni amɛkɔlɔ tɛi, ni amɛto lɛ kuu. No sɛɛ lɛ, amɛye nii yɛ tɛi ní amɛto lɛ kuu lɛ nɔ.
47 Ni Laban tsɛ lɛ akɛ Yegar-sahaduta,* shi Yakob tsɛ lɛ akɛ Galeed.*
48 Kɛkɛ ni Laban kɛɛ: “Tɛi ni ato lɛ kuu nɛɛ ji odasefonyo yɛ mi kɛ bo teŋ ŋmɛnɛ.” No hewɔ ni ewo lɛ Galeed,+
49 kɛ Buu-Mɔɔ* lɛ, ejaakɛ ekɛɛ: “Yehowa hiŋmɛi ahi mi kɛ bo fɛɛ he, be ni onaaa mi ní mi hu minaaa bo lɛ.
50 Kɛ́ ofee mibiyei lɛ niseniianii, ni okɛ yei krokomɛi bɔi shihilɛ akɛ ŋamɛi ofata mibiyei lɛ ahe lɛ, kaimɔ akɛ, kɛji gbɔmɔ ko enaaa po lɛ, Nyɔŋmɔ ni ji wɔdasefonyo lɛ baana.”
51 Laban kɛɛ kɛfata he ehã Yakob akɛ: “Naa tɛi ni ato lɛ kuu nɛɛ, ni naa akulashiŋ ni mikɛma shi yɛ mi kɛ bo teŋ lɛ.
52 Tɛi ni ato lɛ kuu nɛɛ ji odase, ni akulashiŋ lɛ ji nɔ ko ni yeɔ odase akɛ,+ mihoŋ tɛi ni ato lɛ kuu nɛɛ he mibayeŋ bo awui ni bo hu ohoŋ tɛi ni ato lɛ kuu nɛɛ kɛ akulashiŋ nɛɛ he obayeŋ mi awui ko.
53 Abraham Nyɔŋmɔ+ lɛ kɛ Nahor Nyɔŋmɔ lɛ, ni ji amɛtsɛ Nyɔŋmɔ lɛ, akojo mi kɛ bo teŋ.” Ni Yakob kɛ mɔ ni etsɛ Isak sheɔ lɛ gbeyei*+ lɛ gbɛ́i kã kitã.
54 No sɛɛ lɛ, Yakob shã afɔle yɛ gɔŋ lɛ nɔ, ni efɔ̃ enyɛmimɛi* lɛ nine koni amɛbaye nii. No hewɔ lɛ, amɛye nii, ni amɛye jenamɔ lɛ yɛ gɔŋ lɛ nɔ.
55 Shi Laban te shi leebi maŋkpa ni eshɔshɔɔ enabii*+ lɛ kɛ ebiyei lɛ anaa, ni ejɔɔ amɛ.+ Kɛkɛ ni Laban shi, ni eku esɛɛ etee shĩa.+
Shishigbɛ Niŋmaa
^ Loo “shĩa nyɔŋmɔi; shĩa amagai.”
^ Ni ji, Yufrate.
^ Loo “ewekumɛi.”
^ Hebri sht. ŋm., “Kwɛmɔ ohe ni ahi, koni okɛ Yakob akawie kɛjɛ ekpakpa nɔ kɛmiiya efɔŋ nɔ.”
^ Hebri sht. ŋm., “mibii.”
^ Loo “Eyɛ mihewalɛ mli akɛ miye.”
^ Loo “mihiŋmɛiiaŋ.”
^ Hebri sht. ŋm., “Isak gbeyeishemɔ.”
^ Eji Aramaik wiemɔ ni shishi ji, “Odaseyeli Tɛi Ni Ato Lɛ Kuu.”
^ Eji Hebri wiemɔ ni shishi ji, “Odaseyeli Tɛi Ni Ato Lɛ Kuu.”
^ Loo “He Ko Ni Adamɔɔ Abuɔ; He Ko Ni Adamɔɔ Akwɛɔ Shɔŋŋ Nii.”
^ Hebri sht. ŋm., “kɛ etsɛ Isak gbeyeishemɔ.”
^ Loo “ewekumɛi.”
^ Hebri sht. ŋm., “ebihii.”
