1 Mose 27:1-46

  • Isak jɔɔ Yakob (1-29)

  • Esau bi ni ajɔɔ lɛ, shi etsakeko etsui (30-40)

  • Esau bɛ Yakob ewo emli (41-46)

27  Agbɛnɛ, be ni Isak egbɔ ní ehiŋmɛii anɔ eha, ní enaaa nii lɛ, etsɛ ebinukpa Esau+ kɛba eŋɔɔ ni ekɛɛ: “Mibinuu!” Ni ehere nɔ akɛ: “Naa mi!”  Ni etsa nɔ ekɛɛ: “Amrɔ nɛɛ migbɔ. Mileee gbi ni magbo.  No hewɔ lɛ, ofainɛ, amrɔ nɛɛ ŋɔɔ ogbɔbimɔ nibii lɛ, ogãi kotoku kɛ ogãi lɛ, ní oya ŋa lɛ mli ní oyatao jwɛiaŋ loo obahã mi.+  Ní okɛfee niyenii ni ŋɔɔ ní misumɔɔ lɛ ní okɛbahã mi. Ní maye koni majɔɔ* bo dani magbo.”  Shi be ni Isak kɛ ebinuu Esau wieɔ lɛ, no mli lɛ Rebeka miibo toi. Ni Esau tee ŋa lɛ mli koni eyatao jwɛiaŋ loo kɛba.+  Ni Rebeka kɛɛ ebinuu Yakob akɛ:+ “Bianɛ nɔŋŋ minu ní opapa miikɛɛ onyɛmi nuu Esau akɛ,  ‘Yaatao jwɛiaŋ loo obahã mi ní okɛfee niyenii ni ŋɔɔ ohã mi. Ní maye koni majɔɔ bo yɛ Yehowa hiɛ dani magbo.’+  Ni agbɛnɛ, mibinuu, bo toi jogbaŋŋ ní ofee nɔ ni matsɔɔ bo lɛ.+  Ofainɛ, yaa toi lɛ ateŋ ní oyamɔmɔ abotiai ni darako ní hi fe fɛɛ lɛ ateŋ enyɔ yɛ jɛmɛ obahã mi, koni mikɛfee niyenii ni ŋɔɔ mahã opapa, tamɔ bɔ ni esumɔɔ lɛ pɛpɛɛpɛ. 10  Ni okɛyahã opapa ní eye, koni ejɔɔ bo dani egbo.” 11  Yakob kɛɛ enyɛ Rebeka akɛ: “Shi minyɛmi nuu Esau lɛ, tsɔiatsɛ ni,+ ni mi lɛ, mihewolonɔ yɛ trotro. 12  Ni kɛ́ mipapa tara mihe hu?+ No lɛ, ebaafee tamɔ nɔ ni miiye ehe fɛo, ni mikɛ loomɔ moŋ baaba minɔ fe jɔɔmɔ.” 13  Kɛkɛ ni emami kɛɛ lɛ akɛ: “Mibinuu, mi minɔ loomɔ ni baaba onɔ lɛ aba. Feemɔ nɔ ni mikɛɛ lɛ kɛkɛ, ní oya oyamɔmɔ amɛ obahã mi.”+ 14  No hewɔ lɛ, etee ni eyamɔmɔ amɛ ni ekɛ amɛ bahã emami, ni emami hoo niyenii ni ŋɔɔ, tamɔ bɔ ni epapa sumɔɔ lɛ pɛpɛɛpɛ. 15  No sɛɛ lɛ, Rebeka ŋɔ ebinukpa Esau atadei kpakpai fe fɛɛ ni yɔɔ eŋɔɔ yɛ shĩa lɛ, ni ekɛwo ebinuu fioo Yakob.+ 16  Agbɛnɛ hu, ekɛ abotiai ni darako lɛ ahewoji lɛ wo Yakob niji ahe kɛ ekuɛ he hei ni tsɔi bɛ lɛ.+ 17  Kɛkɛ ni ekɛ niyenii ní ŋɔɔ kɛ blodo ni efee lɛ wo ebinuu Yakob dɛŋ.+ 18  No hewɔ lɛ, Yakob tee epapa ŋɔɔ, ni ekɛɛ: “Mipapa!” ni epapa kɛɛ: “Naa mi! Namɔ ji bo, mibinuu?” 19  Yakob kɛɛ epapa akɛ: “Miji Esau, okromɔbi lɛ.+ Mifee bɔ ni okɛɛ mi lɛ pɛpɛɛpɛ. Ofainɛ, tee shi ota shi, ní oye mijwɛiaŋ loo lɛ eko, koni ojɔɔ* mi.”+ 20  Kɛkɛ ni Isak kɛɛ ebinuu lɛ akɛ: “Mibinuu, te fee tɛŋŋ ni onine shɛ nɔ mra nɛkɛ?” Ehã hetoo akɛ: “Ejaakɛ Yehowa, o-Nyɔŋmɔ lɛ kɛ lɛ bahã mi.” 21  Kɛkɛ ni Isak kɛɛ Yakob akɛ: “Mibinuu, ofainɛ, tsi obɛŋkɛ mi ní matara ohe makwɛ, koni male kɛji bo ji mibinuu Esau lɛɛlɛŋ aloo jeee bo ni.”+ 22  No hewɔ lɛ, Yakob tsi ebɛŋkɛ epapa Isak, ni epapa tara ehe, ni no sɛɛ lɛ ekɛɛ: “Gbee lɛ, Yakob gbee ni, shi niji lɛ, Esau niji ni.”+ 23  Eyooo lɛ, ejaakɛ eniji ahe yɛ tsɔi tamɔ enyɛmi nuu Esau niji ahe. No hewɔ lɛ, ejɔɔ lɛ.+ 24  No sɛɛ lɛ, ebi akɛ: “Ani bo ji mibinuu Esau lɛɛlɛŋ?” ni ehã hetoo akɛ: “Mi ni.” 25  Kɛkɛ ni ekɛɛ: “Mibinuu, hã mi jwɛiaŋ loo lɛ eko maye, koni no sɛɛ lɛ majɔɔ* bo.” Kɛkɛ ni ekɛhã lɛ ni eye, ni ehã lɛ wain hu, ni enu. 26  Ni etsɛ Isak kɛɛ lɛ akɛ: “Mibinuu, ofainɛ, tsi obɛŋkɛ mi, ní obashɔ minaa.”+ 27  No hewɔ lɛ, etsi ebɛŋkɛ lɛ ni eshɔ enaa, ni Isak nu etadei lɛ amli ŋma lɛ.+ Kɛkɛ ni ejɔɔ lɛ ekɛɛ: “Naa, mibinuu lɛ he ŋma tamɔ shikpɔŋ* ní Yehowa ejɔɔ lɛ ŋma. 28  Anɔkwa Nyɔŋmɔ lɛ ahã bo ŋwɛi bɔ́+ kɛ shikpɔŋ ni yɔɔ frɔ̃frɔ̃,+ kɛ ŋmaa* kɛ wain hee babaoo hu.+ 29  Maji asɔmɔ bo, ni jeŋmaji akoto bo. Ye onyɛmimɛi lɛ anɔ nuŋtsɔ, ni omami bihii lɛ akoto bo.+ Alomɔ mɔ fɛɛ mɔ ni lomɔɔ bo lɛ, ni ajɔɔ mɔ fɛɛ mɔ ni jɔɔ bo lɛ.”+ 30  Agbɛnɛ, be ni Isak jɔɔ Yakob egbe naa, ní Yakob shi etsɛ Isak hiɛ nɔŋŋ pɛ kɛkɛ ni enyɛmi nuu Esau hu jɛ egbɔbimɔ lɛ eba.+ 31  Lɛ hu ehoo niyenii ni ŋɔɔ ni ekɛbahã epapa, ni ekɛɛ epapa akɛ: “Mipapa, tee shi ní oye mijwɛiaŋ loo lɛ eko, koni ojɔɔ* mi.” 32  Kɛkɛ ni etsɛ Isak kɛɛ lɛ akɛ: “Bo namɔ ni?” ni ekɛɛ: “Mi obinuu Esau, okromɔbi lɛ.”+ 33  Ni Isak he bɔi kpokpomɔ waa diɛŋtsɛ, no hewɔ lɛ ekɛɛ: “Belɛ, namɔ yatao jwɛiaŋ loo lɛ ni ekɛbahã mi lɛ mɔ? Miye momo dani obaa nɛɛ, ni mijɔɔ lɛ—ni abaajɔɔ lɛ lɛɛlɛŋ hu!” 34  Be ni Esau nu epapa wiemɔi lɛ, ebolɔ waa diɛŋtsɛ kɛ awerɛho, ni ekɛɛ epapa akɛ: “Jɔɔmɔ mi, hɛɛ, mi hu jɔɔmɔ mi, mipapa!”+ 35  Shi ekɛɛ: “Onyɛmi nuu lɛ ba kɛ lakamɔ ni ebahe jɔɔmɔ ni kulɛ obaaná lɛ kɛtee.” 36  Kɛkɛ ni ekɛɛ: “Ani jeee egbɛ́i Yakob* lɛ he nii etsuɔ lɛ, ejaakɛ eshɔ̃ mihegbɛ kɛje midɛŋ shii enyɔ nɛɛ fɛɛ?+ Eŋɔ mikromɔbi gbɛnaa lɛ momo,+ ni amrɔ nɛɛ ebahe mijɔɔmɔ lɛ hu!”+ Ni ekɛɛ kɛfata he akɛ: “Ani oshiko jɔɔmɔ ko ohãko mi?” 37  Shi Isak hã Esau hetoo akɛ: “Naa, miwo lɛ onɔ nuŋtsɔ,+ ni mikɛ enyɛmimɛi lɛ fɛɛ ehã lɛ akɛ etsuji, ni mikɛ ŋmaa kɛ wain hee ehã lɛ.+ Mɛni dɔŋŋ eshwɛ ní mafee mahã bo, mibinuu?” 38  Esau kɛɛ epapa akɛ: “Mipapa, ani jɔɔmɔ kome pɛ oyɔɔ? Jɔɔmɔ mi, hɛɛ, mi hu jɔɔmɔ mi, mipapa!” Kɛkɛ ni Esau bo waa, ni ejwa yaafo.+ 39  No hewɔ lɛ, etsɛ Isak hã lɛ hetoo akɛ: “Naa, obaahi shikpɔŋ ni bɛ frɔ̃frɔ̃ nɔ, kɛ he ni ŋwɛi bɔ́ hu enyɔɔɔ yɛ.+ 40  Ni oklante naa obaahi wala mli yɛ,+ ni obaasɔmɔ onyɛmi nuu lɛ.+ Shi kɛ́ onyɛɛɛ naa odamɔ dɔŋŋ* lɛ, obaaku ekɔɔŋtso lɛ kɛje okuɛ.”+ 41  Shi Esau bɛ Yakob ewo emli yɛ jɔɔmɔ ni epapa jɔɔ Yakob lɛ hewɔ,+ ni Esau tee nɔ ekɛɛ yɛ etsui mli akɛ: “Eshwɛ fioo ni mipapa baagbo.*+ No sɛɛ lɛ, magbe minyɛmi nuu Yakob.” 42  Be ni abakɛɛ Rebeka ebinukpa Esau wiemɔi lɛ, amrɔ lɛ, etsu ayatsɛ ebinuu fioo Yakob abahã lɛ ni ekɛɛ lɛ akɛ: “Naa! Onyɛmi nuu Esau miitao etɔ ehe owele yɛ onɔ ní egbe bo.* 43  Amrɔ nɛɛ, mibinuu, feemɔ nɔ ni makɛɛ bo lɛ. Tee shi ní ojo foi kɛya minyɛmi nuu Laban ŋɔɔ yɛ Haran.+ 44  Yaahi eŋɔɔ fioo kɛyashi onyɛmi nuu lɛ mlila lɛ naa baaba shi, 45  kɛyashi be ní onyɛmi nuu lɛ mli ní efu bo lɛ naa baaba shi, ní ehiɛ baakpa nɔ ni ofee lɛ lɛ nɔ. Kɛkɛ lɛ, matsu ni abaŋɔ bo kɛjɛ jɛmɛ kɛba. Mɛni hewɔ esa akɛ nyɛyi enyɔ lɛ fɛɛ nyɛŋmɛɛ mi gbi kome?” 46  No sɛɛ lɛ, Rebeka tee nɔ ekɛɛ Isak akɛ: “Mishihilɛ eje mitsine yɛ Hit yei lɛ ahewɔ.+ Kɛ́ Yakob hu ŋɔ yoo kɛjɛ Hit yei lɛ ateŋ akɛ eŋa tamɔ yei nɛɛ ni jɛ shikpɔŋ nɛɛ nɔ lɛ, belɛ, mɛɛ sɛɛnamɔ yɔɔ mishihilɛ he?”+

Shishigbɛ Niŋmaa

Loo “misusuma ajɔɔ.”
Loo “osusuma ajɔɔ.”
Loo “misusuma ajɔɔ.”
Loo “ŋa.”
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Loo “osusuma ajɔɔ.”
Eshishi ji, “Mɔ Ni Mɔɔ Mɔ Ko Nanetsitsi Mli; Mɔ Ni Shɔ̃ɔ Mɔ Ko Hegbɛ.”
Loo “kɛ́ ohe ejɔɔɔ bo.”
Loo “Gbii ni akɛbaaye mipapa he awerɛho lɛ miibɛŋkɛ.”
Loo “miisusu eyiŋ akɛ ebaagbe bo, ni ekɛ no miihã ehe tsui.”