1 Mose 2:1-25

  • Nyɔŋmɔ bɔi ehe jɔɔmɔ yɛ gbi ni ji kpawo lɛ nɔ (1-3)

  • Yehowa Nyɔŋmɔ ji ŋwɛi kɛ shikpɔŋ lɛ Feelɔ (4)

  • Nuu kɛ yoo yɛ Eden abɔɔ lɛ mli (5-25)

    • Akɛ sũ shɔ̃ gbɔmɔ (7)

    • Tso ni agu eyeli lɛ (15-17)

    • Abɔ yoo (18-25)

2  Ni agbe ŋwɛi kɛ shikpɔŋ lɛ kɛ nɔ fɛɛ nɔ ni yɔɔ amɛmli* lɛ naa.+  Ni be ni shɛɔ gbi ni ji kpawo lɛ, Nyɔŋmɔ egbe nɔ ni etsuɔ* lɛ naa, ni ebɔi ehe jɔɔmɔ yɛ gbi ni ji kpawo lɛ nɔ kɛjɛ nitsumɔi fɛɛ ni etsuɔ* lɛ amli.+  Ni Nyɔŋmɔ jɔɔ gbi ni ji kpawo lɛ ni efee lɛ krɔŋkrɔŋ, ejaakɛ nakai gbi lɛ nɔ Nyɔŋmɔ bɔi ehe jɔɔmɔ be ni egbe edebɔɔ nitsumɔi lɛ fɛɛ, nibii fɛɛ ní eto eyiŋ akɛ ebaafee lɛ naa lɛ.  Enɛ ji ŋwɛi kɛ shikpɔŋ lɛ he saji, be ni abɔ amɛ lɛ, yɛ gbi* ni Yehowa* Nyɔŋmɔ fee shikpɔŋ lɛ kɛ ŋwɛi lɛ nɔ.+  No mli lɛ, jwɛi ko bɛ shikpɔŋ lɛ nɔ, ni kwɛ̃ɛ nii ko hu bɔiko kwɛ̃ɛ, ejaakɛ Yehowa Nyɔŋmɔ hãko nugbɔ anɛ yɛ shikpɔŋ lɛ nɔ, ni gbɔmɔ ko hu bɛ ni baatsu shikpɔŋ lɛ nɔ nii.  Shi afua teɔ shi kɛjɛɔ shikpɔŋ lɛ nɔ, ni eshwieɔ shikpɔŋ muu lɛ fɛɛ nɔ nu.  Ni Yehowa Nyɔŋmɔ kɛ shikpɔŋ sũ*+ shɔ̃ gbɔmɔ, ni emu wala mumɔ+ ewo egugɔ mli, ni gbɔmɔ lɛ batsɔ gbɔmɔ* ni hiɛ kã.+  Agbɛnɛ hu, Yehowa Nyɔŋmɔ fee abɔɔ ko yɛ Eden,+ yɛ bokãgbɛ; ni ekɛ gbɔmɔ lɛ ni eshɔ̃ lɛ yawo jɛmɛ.+  No hewɔ lɛ, Yehowa Nyɔŋmɔ hã tsei fɛɛ ni kɛ́ akwɛ lɛ amɛyɛ akɔnɔ, ní amɛhi hã yeli hu kwɛ̃ kɛjɛ shikpɔŋ, kɛ wala tso+ lɛ hu yɛ abɔɔ lɛ teŋ, kɛ ekpakpa kɛ efɔŋ lee tso+ lɛ. 10  Agbɛnɛ, faa ko jɛɔ Eden ni eshwieɔ abɔɔ lɛ nɔ nu, ni kɛjɛ jɛmɛ lɛ, emli gbála etsɔ fai ejwɛ.* 11  Klɛŋklɛŋ nɔ lɛ gbɛ́i ji Pishon; no ji nɔ ni bɔleɔ Havila shikpɔŋ muu lɛ fɛɛ, he ni shika tsuru yɔɔ lɛ. 12  Nakai shikpɔŋ lɛ nɔ shika tsuru lɛ hi jogbaŋŋ. Bedola ama* kɛ onike tɛ hu yɛ jɛmɛ. 13  Faa ni ji enyɔ lɛ gbɛ́i ji Gihon; no ji nɔ ni bɔleɔ Kush shikpɔŋ muu lɛ fɛɛ lɛ. 14  Faa ni ji etɛ lɛ gbɛ́i ji Hidekel;*+ no ji nɔ ni yaa Asiria+ bokãgbɛ lɛ. Ni faa ni ji ejwɛ lɛ ji Yufrate.+ 15  Yehowa Nyɔŋmɔ kɛ gbɔmɔ lɛ yawo Eden abɔɔ lɛ mli koni etsu mli nii ní ekwɛ nɔ.+ 16  Agbɛnɛ hu, Yehowa Nyɔŋmɔ wo gbɔmɔ lɛ kitã nɛɛ ekɛɛ: “Ye tsei fɛɛ ni yɔɔ abɔɔ lɛ mli lɛ anɔ yibii lɛ bɔ ni osumɔɔ.+ 17  Shi ekpakpa kɛ efɔŋ lee tso lɛ, kaaye enɔ yibii lɛ eko, ejaakɛ gbi nɔ ni obaaye eko lɛ, bɔ fɛɛ bɔ ni fee lɛ, obaagbo.”+ 18  Kɛkɛ ni Yehowa Nyɔŋmɔ kɛɛ: “Ehiii akɛ gbɔmɔ lɛ kome yaa nɔ ehiɔ shi. Mafee yelikɛbualɔ mahã lɛ, akɛ hefatalɔ ni sa lɛ.”+ 19  No mli lɛ, Yehowa Nyɔŋmɔ kɛ shikpɔŋ sũ eshɔ̃ ŋa mli kooloi kɛ bɔɔ nii fɛɛ ni filikiɔ yɛ ŋwɛi, ni ekɛ amɛ ba gbɔmɔ lɛ ŋɔɔ koni ekwɛ bɔ ni ebaatsɛ amɛteŋ eko fɛɛ eko; ni bɔ ni gbɔmɔ lɛ tsɛ bɔɔ nii* ni hiɛ kamɔ lɛ ateŋ eko fɛɛ eko lɛ, no batsɔ egbɛ́i.+ 20  No hewɔ lɛ, gbɔmɔ lɛ wo shĩa kooloi lɛ fɛɛ kɛ bɔɔ nii ni filikiɔ yɛ ŋwɛi lɛ fɛɛ kɛ ŋa mli kooloi lɛ fɛɛ gbɛ́i, shi gbɔmɔ lɛ, ebɛ yelikɛbualɔ ko akɛ hefatalɔ ni sa lɛ. 21  No hewɔ lɛ, Yehowa Nyɔŋmɔ hã gbɔmɔ lɛ wɔ vii, ni be ni ewɔ lɛ, ejie eŋmawutsei lɛ ekome, ni no sɛɛ lɛ, etsĩ he ni ejie ŋmawutso lɛ kɛjɛ lɛ. 22  Ni Yehowa Nyɔŋmɔ kɛ ŋmawutso ni ejie kɛjɛ nuu lɛ mli lɛ fee yoo, ni ekɛ lɛ bahã nuu lɛ.+ 23  Kɛkɛ ni nuu lɛ kɛɛ: “Agbɛnɛ, wu ni jɛ miwui lɛ amliKɛ heloo ni jɛ miheloo mli nɛ. Abaatsɛ mɔ nɛ Yoo,*Ejaakɛ nuu mli ajie lɛ kɛjɛ.”+ 24  No hewɔ ni nuu baashi epapa kɛ emami ni ebaakpɛtɛ eŋa he,* ni amɛbaatsɔ heloo kome lɛ.+ 25  Ni amɛyi enyɔ lɛ fɛɛ, nuu lɛ kɛ eŋa lɛ, tee nɔ amɛhiɛ amɛhe folo;+ kɛ̃lɛ efeee amɛ hiɛgbele.

Shishigbɛ Niŋmaa

Hebri sht. ŋm., “kɛ amɛsraafoi lɛ fɛɛ.”
Loo “efeɔ.”
Loo “kɛjɛ nibii fɛɛ ni efeɔ.”
Gbi nɛɛ kɔɔ gbii ekpaa lɛ fɛɛ ni akɛbɔ nibii lɛ ahe.
Biɛ ji he klɛŋklɛŋ ni Nyɔŋmɔ diɛŋtsɛ gbɛ́i, יהוה (YHWH) lɛ je kpo yɛ. Kwɛmɔ Saji Krokomɛi A4 lɛ.
Hebri sht. ŋm., “mulu.”
Loo “susuma.” Hebri mli lɛ, neʹphesh, ni eshishi ji, “bɔɔ nɔ ni muɔ.” Kwɛmɔ Wiemɔi Titrii Amligbalamɔ lɛ, “susuma.”
Hebri sht. ŋm., “etsɔ yitsei ejwɛ.”
Bedola ama ji ama ko ni jeɔ ŋma ni anáa kɛjɛɔ tsei bibii komɛi ni kwɛ̃ɔ yɛ hei ni hulu tsoɔ waa yɛ lɛ amli.
Loo “Tigris.”
Loo “susumai.”
Bɔ ni atsɛɔ ‘nuu’ kɛ ‘yoo’ yɛ Hebri mli lɛ je amɛhe. ‘Nuu,’ Hebri mli lɛ, ʼishʹ; ‘Yoo,’ Hebri mli lɛ, ʼishshahʹ.
Loo “ebaaya nɔ ekɛ eŋa ahi shi.”