1 Mose 50:1-26
50 Ni Yosef ho egbee epapa nɔ+ ni efó eshwie enɔ ni eshɔ enaa.
2 No sɛɛ lɛ, Yosef fã etsuji, ni ji helatsalɔi lɛ ní amɛwo epapa tsofa.+ No hewɔ lɛ, helatsalɔi lɛ wo Israel tsofa,
3 ni amɛkɛ gbii 40 wo lɛ tsofa lɛ, ejaakɛ nakai ji gbii abɔ ni akɛwoɔ gbonyo tsofa, ni Ejiptbii lɛ tee nɔ amɛfó lɛ gbii 70.
4 Be ni gbii ni akɛyeɔ ehe awerɛho lɛ ba naagbee lɛ, Yosef kɛɛ Farao shĩabii* lɛ akɛ: “Kɛ́ mihiɛ eba nyam yɛ nyɛhiɛ lɛ, nyɛyakɛa Farao akɛ:
5 ‘Mipapa hã mikã lɛ kitã,+ ekɛɛ: “Naa! miigbo.+ Mifuuhe ni mikpɛ́ yɛ Kanaan shikpɔŋ lɛ nɔ lɛ,+ jɛmɛ oyafu mi yɛ.”+ Ofainɛ, ŋmɛɛ mi gbɛ ní makwɔ kɛya ní mayafu mipapa, ni no sɛɛ lɛ, maku misɛɛ maba.’”
6 Farao kɛɛ akɛ: “Yaa ní oyafu opapa, tamɔ bɔ ni ehã okã lɛ kitã lɛ.”+
7 No hewɔ lɛ, Yosef kwɔ kɛtee koni eyafu epapa, ni Farao tsuji lɛ fɛɛ kɛ lɛ tee, eshĩa onukpai+ lɛ kɛ Ejipt shikpɔŋ lɛ nɔ onukpai lɛ fɛɛ,
8 kɛ Yosef shĩabii lɛ fɛɛ kɛ enyɛmimɛi hii lɛ kɛ epapa shĩabii lɛ.+ Amɛbii bibii lɛ kɛ amɛtoi kɛ amɛtsinai lɛ kɛkɛ amɛshi yɛ Goshen shikpɔŋ lɛ nɔ.
9 Shwiilii+ kɛ okpɔŋɔnɔtaralɔi hu kɛ lɛ kwɔ kɛtee, ni kuu lɛ yi fa babaoo diɛŋtsɛ.
10 Kɛkɛ ni amɛbashɛ Atad ŋmaagbeemɔhe ní yɔɔ Yordan kpokpaa lɛ nɔ lɛ, ni amɛye awerɛho babaoo ni amɛfó waa yɛ jɛmɛ, ni etee nɔ eye epapa he awerɛho gbii kpawo.
11 Ni shikpɔŋ lɛ nɔ bii, ni ji Kanaanbii lɛ na akɛ amɛmiiye awerɛho yɛ Atad ŋmaagbeemɔhe lɛ, ni amɛbolɔ akɛ: “Enɛ lɛ Ejiptbii lɛ miiye awerɛho waa diɛŋtsɛ!” No hewɔ ni amɛwo jɛmɛ gbɛ́i akɛ Abel-mizraim* lɛ, ni eyɛ Yordan kpokpaa lɛ nɔ.
12 No hewɔ lɛ, Yakob bihii lɛ fee bɔ ni efã amɛ lɛ pɛpɛɛpɛ amɛhã lɛ.+
13 Ebihii lɛ wó lɛ kɛtee Kanaan shikpɔŋ lɛ nɔ, ni amɛyafu lɛ yɛ tɛkplo ni yɔɔ Makpela shikpɔŋ lɛ nɔ lɛ mli, shikpɔŋ ni yɔɔ Mamre hiɛ ní Abraham hé yɛ Hitnyo Efron dɛŋ ní ekɛfee fuuhe lɛ.+
14 Be ni Yosef fu epapa egbe naa lɛ, lɛ kɛ enyɛmimɛi hii lɛ kɛ mɛi fɛɛ ní kɛ lɛ tee yafu epapa lɛ ku amɛsɛɛ kɛtee Ejipt.
15 Be ni Yosef nyɛmimɛi hii lɛ na akɛ amɛpapa egbo lɛ, amɛkɛɛ: “Ekolɛ Yosef ebɛ wɔ ewo emli, ni ebaato wɔ najiaŋ yɛ efɔŋ fɛɛ ni wɔfee lɛ lɛ hewɔ.”+
16 No hewɔ lɛ, amɛtsu ayakɛɛ Yosef akɛ: “Opapa kɛ famɔ nɛɛ hã dani egbo:
17 ‘Nɔ ni nyɛkɛa Yosef nɛ: “Ofainɛ, miikpa bo fai, okɛ onyɛmimɛi hii lɛ atɔmɔ* kɛ esha ní amɛfee, ní amɛkɛye bo awui tamɔ nɛkɛ lɛ ake amɛ.”’ Agbɛnɛ, ofainɛ, okɛ otsɛ Nyɔŋmɔ lɛ tsuji lɛ atɔmɔ* lɛ ake amɛ.” Ni Yosef fó be ni amɛkɛ lɛ wie lɛ.
18 Kɛkɛ ni enyɛmimɛi hii lɛ hu ba ni amɛbabumɔ shi yɛ ehiɛ ni amɛkɛɛ: “Naa, onyɔji ji wɔ!”+
19 Yosef kɛɛ amɛ akɛ: “Nyɛkashea gbeyei. Ani miji Nyɔŋmɔ ní makojo nyɛ?*
20 Eyɛ mli akɛ, nyɛto nyɛyiŋ akɛ nyɛbaaye mi awui moŋ,+ shi Nyɔŋmɔ hã etsɔ nɔ kpakpa, bɔ ni afee ni abaa mɛi babaoo ayi, tamɔ bɔ ni efeɔ ŋmɛnɛ lɛ.+
21 No hewɔ lɛ, agbɛnɛ, nyɛkashea gbeyei. Maya nɔ mahã nyɛ kɛ nyɛbii bibii lɛ niyenii.”+ Ni eshɛje amɛmii, ni ekɛ amɛ wie bɔ ni hã amɛtsui nyɔ amɛmli.
22 Ni Yosef tee nɔ ehi Ejipt, lɛ kɛ epapa shĩabii lɛ, ni Yosef ye afii 110.
23 Yosef na Efraim nabii,*+ kɛ Manase binuu Makir+ bihii lɛ hu. Afɔ amɛ ashwie Yosef nakutsei anɔ.*
24 Be kplaŋŋ sɛɛ lɛ, Yosef kɛɛ enyɛmimɛi hii lɛ akɛ: “Miigbo, shi bɔ fɛɛ bɔ ni fee lɛ, Nyɔŋmɔ baagbala ejwɛŋmɔ kɛba nyɛnɔ,+ ni ebaajie nyɛ kɛje shikpɔŋ nɛɛ nɔ, ni ekɛ nyɛ baakwɔ kɛya shikpɔŋ ní ekã Abraham, kɛ Isak, kɛ Yakob kitã yɛ he lɛ nɔ.”+
25 No hewɔ lɛ, Yosef hã Israel bii lɛ kã lɛ kitã, ekɛɛ: “Bɔ fɛɛ bɔ ni fee lɛ, Nyɔŋmɔ baagbala ejwɛŋmɔ kɛba nyɛnɔ. Esa akɛ nyɛloo miwui lɛ kɛje biɛ kɛkwɔ kɛya.”+
26 Ni Yosef gbo be ni eye afii 110, ni amɛwo lɛ tsofa,+ ni akɛ lɛ wo gbonyo adeka mli yɛ Ejipt.
Shishigbɛ Niŋmaa
^ Loo “shĩa.”
^ Eshishi ji, “Ejiptbii Lɛ Awerɛhoyeli.”
^ Loo “amlatɔmɔ.”
^ Loo “amlatɔmɔ.”
^ Loo “Ani manyɛ maŋɔ Nyɔŋmɔ gbɛhe?”
^ Loo “Efraim bihii lɛ abihii.”
^ Ni tsɔɔ akɛ, ahiɛ amɛ tamɔ Yosef bihii, ni ashwɛɛɛ amɛhe kwraa.
