1 Mose 18:1-33

  • Ŋwɛibɔfoi etɛ basara Abraham (1-8)

  • Awo Sara shi akɛ ebaafɔ binuu; eŋmɔ (9-15)

  • Abraham kpa fai ehã Sodom (16-33)

18  No sɛɛ lɛ, Yehowa+ jie ehe kpo etsɔɔ lɛ yɛ Mamre tsei wuji+ lɛ ateŋ, be ni eta emama tsũ lɛ shinaa lɛ naa shwane ketekete lɛ.  Ewó ehiɛ nɔ ni ena hii etɛ komɛi damɔ shɔŋŋ.+ Be ni ena amɛ lɛ, esha foi kɛjɛ mama tsũ lɛ shinaa lɛ naa koni ekɛ amɛ ayakpe, ni ekoto shi.  Kɛkɛ ni ekɛɛ: “Yehowa, kɛji mihiɛ eba nyam yɛ ohiɛ lɛ, ofainɛ kaaho otsulɔ he otee.  Ofainɛ, hã akɛ nu fioo aba ní akɛfɔ nyɛnaji ahe;+ ní nyɛjɔɔ nyɛhe yɛ tso lɛ shishi.  Akɛni nyɛba nyɛtsulɔ ŋɔɔ yɛ biɛ hewɔ lɛ, hã mikɛ blodo fioo ko aba koni nyɛkɛwo nyɛtsui.* No sɛɛ lɛ, nyɛbaanyɛ nyɛtsa nyɛnyiɛmɔ lɛ nɔ.” Kɛkɛ ni amɛkɛɛ: “Yoo. Feemɔ bɔ ni okɛɛ lɛ.”  No hewɔ lɛ, Abraham he fee oya kɛtee Sara ŋɔɔ yɛ mama tsũ lɛ mli, ni ekɛɛ: “Ohe afee oya! Ŋɔɔ ashikishaŋ kpakpa susumɔnii* etɛ, kpɔtɔmɔ, ní okɛfee blodoi.”  No sɛɛ lɛ, Abraham sha foi kɛtee tsinai lɛ ateŋ ni eyamɔ tsinanuu* ni esako ni sa jogbaŋŋ. Ekɛ lɛ hã etsulɔ lɛ, ni etsulɔ lɛ he fee oya kɛsaa tsina lɛ.  Kɛkɛ ni eŋɔ bɔta kɛ mliki* kɛ tsinanuu* ní esaa lɛ, ni ekɛ niyenii lɛ bamamɔ amɛhiɛ. Ni edamɔ amɛmasɛi yɛ tso lɛ shishi be ni amɛyeɔ nii lɛ.+  Amɛkɛɛ lɛ akɛ: “Nɛgbɛ oŋa Sara+ yɔɔ?” Ehã hetoo akɛ: “Eyɛ mama tsũ lɛ mli yɛ biɛ.” 10  No hewɔ lɛ, amɛteŋ mɔ kome wie kɛtsa nɔ akɛ: “Bɔ fɛɛ bɔ ni fee lɛ, maku misɛɛ maba oŋɔɔ wɔsɛɛ afi nɛkɛ be mli pɛpɛɛpɛ, ni naa! oŋa Sara baaná binuu.”+ No mli lɛ, Sara miibo toi yɛ mama tsũ lɛ shinaa ní yɔɔ nuu lɛ sɛɛgbɛ lɛ naa. 11  Abraham kɛ Sara egbɔlɔ, ejaakɛ amɛdara yɛ afii amli.+ Sara efo fɔmɔ.*+ 12  No hewɔ lɛ, Sara bɔi ŋmɔɔ yɛ eyitsoŋ ekɛɛ: “Amrɔ nɛɛ ní mitsɔ yoomo ní minuŋtsɔ hu egbɔ nɛɛ, ani maye ŋɔɔmɔ nɛɛ lɛɛlɛŋ?”+ 13  Ni Yehowa kɛɛ Abraham akɛ: “Mɛni hewɔ Sara ŋmɔ ni ekɛɛ, ‘Ani mibafɔ lɛɛlɛŋ yɛ migbɔlɛ nɛɛ mli?’ lɛ. 14  Ani nɔ ko yɛ ni Yehowa nyɛŋ afee?+ Maku misɛɛ maba oŋɔɔ yɛ biɛ afi pɛpɛɛpɛ mli, ni Sara baaná binuu.” 15  Shi Sara tso, ni ekɛɛ, “Miŋmɔko!” ejaakɛ eeshe gbeyei. Kɛkɛ ni Nyɔŋmɔ kɛɛ: “Dabi! Oŋmɔ.” 16  Be ni hii lɛ te shi koni amɛya lɛ, amɛkwɛ Sodom+ ni yɔɔ jɔɔ mli gbɛ lɛ; Abraham kɛ amɛ nyiɛ kɛmiiya eyajie amɛ gbɛ. 17  Yehowa kɛɛ: “Ani mikɛ nɔ ni mibafee lɛ miitee Abraham?+ 18  Bɔ fɛɛ bɔ ni fee lɛ, Abraham baatsɔ jeŋmaŋ kpeteŋkpele ni he wa, ni enɔ abaatsɔ ajɔɔ shikpɔŋ lɛ nɔ jeŋmaji fɛɛ.*+ 19  Ejaakɛ mitsi mibɛŋkɛ lɛ* bɔ ni afee ní efã ebihii kɛ eshĩabii ní baaba yɛ esɛɛ lɛ ní amɛnyiɛ Yehowa gbɛ lɛ nɔ, ní amɛfee nɔ ni hi kɛ nɔ ni ja,+ koni Yehowa ahã shi ni ewo yɛ Abraham he lɛ aba mli.” 20  Kɛkɛ ni Yehowa kɛɛ: “Nibii ni awieɔ ashiɔ Sodom kɛ Gomora lɛ fa tsɔ,+ ni amɛhe esha lɛ tsii waa.+ 21  Makpeleke shi mayakwɛ kɛji nibii ní awieɔ ashiɔ amɛ ní minuɔ lɛ, amɛmiifee nakai lo. Ni kɛjeee nakai lɛ, maná male.”+ 22  Ni hii lɛ shi jɛmɛ ni amɛyi Sodom gbɛ, shi Yehowa+ tee nɔ ehi Abraham masɛi. 23  Kɛkɛ ni Abraham tsi ebɛŋkɛ lɛ ni ekɛɛ: “Ani obaabɛɛ jalɔ kɛ mɔ fɔŋ fɛɛ oshwie lɛɛlɛŋ?+ 24  Ŋɔɔ lɛ akɛ, jalɔi 50 yɛ maŋ lɛ mli. Ani obaabɛɛ amɛ fɛɛ oshwie, ni okɛ maŋ lɛ he ekeŋ lɛ yɛ jalɔi 50 ni yɔɔ mli lɛ ahewɔ? 25  Ebaŋ lɛ nakai kɔkɔɔkɔ akɛ obaafee nɛkɛ nɔ ko, akɛ obaagbe jalɔ kɛ mɔ fɔŋ fɛɛ shi kome, koni jalɔ lɛ kɛ mɔ fɔŋ lɛ fɛɛ naagbee afee pɛpɛɛpɛ!+ Ebaŋ lɛ nakai kɔkɔɔkɔ yɛ ogbɛfaŋ.+ Ani shikpɔŋ lɛ fɛɛ Kojolɔ lɛ efeŋ nɔ ni ja?”+ 26  Ni Yehowa kɛɛ: “Kɛji miná jalɔi 50 yɛ Sodom maŋ lɛ mli lɛ, mikɛ maŋ muu lɛ fɛɛ he baake lɛ yɛ amɛhewɔ.” 27  Shi Abraham wie ekoŋŋ akɛ: “Ofainɛ, mikɔ mifɔ̃ minɔ akɛ mikɛ Yehowa baawie, tsɛbelɛ sũ* kɛ lamulu ji mi. 28  Ŋɔɔ lɛ akɛ, shwɛ mɛi enumɔ ní aná jalɔi 50 lɛ. Ani mɛi enumɔ lɛ ahewɔ lɛ, obaakpãtã maŋ muu lɛ fɛɛ hiɛ?” Kɛkɛ ni ekɛɛ: “Mikpãtãŋ maŋ lɛ hiɛ kɛji miná mɛi 45.”+ 29  Shi Abraham kɛ lɛ wie ekoŋŋ ekɛɛ: “Ŋɔɔ lɛ akɛ, aná mɛi 40 yɛ jɛmɛ.” Ehã hetoo akɛ: “Mikpãtãŋ maŋ lɛ hiɛ yɛ mɛi 40 lɛ ahewɔ.” 30  Shi Abraham wie kɛtsa nɔ akɛ: “Yehowa, ofainɛ, omli akawo la,+ shi hã maya nɔ mawie: Ŋɔɔ lɛ akɛ, aná mɛi 30 pɛ yɛ jɛmɛ.” Ehã hetoo akɛ: “Mikpãtãŋ maŋ lɛ hiɛ kɛji miná mɛi 30 yɛ jɛmɛ.” 31  Shi Abraham tsa nɔ ekɛɛ: “Ofainɛ, mikɔ mifɔ̃ minɔ akɛ mikɛ Yehowa baawie: Ŋɔɔ lɛ akɛ, aná mɛi 20 pɛ yɛ jɛmɛ.” Ehã hetoo akɛ: “Mikpãtãŋ maŋ lɛ hiɛ yɛ mɛi 20 lɛ ahewɔ.” 32  Naagbee lɛ, Abraham kɛɛ: “Yehowa, ofainɛ, omli akawo la, shi hã mawie shi kome nɛɛ kɛkɛ: Ŋɔɔ lɛ akɛ, aná mɛi nyɔŋma pɛ yɛ jɛmɛ.” Ehã hetoo akɛ: “Mikpãtãŋ maŋ lɛ hiɛ yɛ mɛi nyɔŋma lɛ ahewɔ.” 33  Be ni Yehowa kɛ Abraham wie egbe naa lɛ, eyiŋ etee,+ ni Abraham ku esɛɛ etee he ni eyɔɔ lɛ.

Shishigbɛ Niŋmaa

Hebri sht. ŋm., “nyɛkɛwo nyɛtsui hewalɛ.”
Hebri sht. ŋm., “sia susumɔnii.” Sia kome feɔ litai 7.33 (kwat 6.66). Kwɛmɔ Saji Krokomɛi B14 lɛ.
Loo “tsina oblanyo.”
Loo “fufɔ.”
Loo “tsina oblanyo.”
Hebri sht. ŋm., “Bɔ ni feɔ yei lɛ, Sara nɔ lɛ sɛɛ efo.”
Loo “enɔ shikpɔŋ lɛ nɔ jeŋmaji fɛɛ baatsɔ aná jɔɔmɔ amɛhã amɛhe.”
Hebri sht. ŋm., “mibale lɛ.”
Hebri sht. ŋm., “mulu.”