1 Mose 3:1-24

  • Bɔ ni fee ni gbɔmɔ bɔi esha feemɔ (1-13)

    • Klɛŋklɛŋ malemɔ (4, 5)

  • Yehowa kojo atuatselɔi lɛ (14-24)

    • Agba yoo lɛ seshi lɛ he sane afɔ̃ shi (15)

    • Ashwie amɛ kɛje Eden (23, 24)

3  Onufu+ ji kooloo ko ni hiɛ tɛ̃* fe ŋa mli kooloi fɛɛ ni Yehowa Nyɔŋmɔ efee lɛ. No hewɔ lɛ, ekɛɛ yoo lɛ akɛ: “Ani eji anɔkwale akɛ Nyɔŋmɔ kɛɛ nyɛkaye abɔɔ lɛ mli tsei lɛ eko fɛɛ eko yibii?”+  Kɛkɛ ni yoo lɛ kɛɛ onufu lɛ akɛ: “Wɔbaanyɛ wɔye abɔɔ lɛ mli tsei lɛ ayibii lɛ eko.+  Shi Nyɔŋmɔ wie tso ni ma abɔɔ+ lɛ teŋ lɛ nɔ yibii lɛ he akɛ: ‘Nyɛkayea eko, dabi, nyɛkataa he; kɛjeee nakai lɛ nyɛbaagboi.’”  Kɛkɛ ni onufu lɛ kɛɛ yoo lɛ akɛ: “Nyɛgboiŋ kɔkɔɔkɔ.+  Ejaakɛ Nyɔŋmɔ le akɛ gbi tuuntu nɔ ni nyɛbaaye eko lɛ, nyɛhiŋmɛii baagbele, ni nyɛbaatsɔmɔ tamɔ Nyɔŋmɔ, nyɛbaale ekpakpa kɛ efɔŋ.”+  Ni yoo lɛ na akɛ tso lɛ hi hã yeli, ni efeɔ hiŋmɛii lɛ akɔnɔ, hɛɛ, tso lɛ yɛ fɛo waa. No hewɔ lɛ, etse enɔ yibii lɛ eko ni ebɔi yeli.+ No sɛɛ be ni ewu lɛ yɔɔ emasɛi lɛ, ehã lɛ hu eko ni ebɔi yeli.+  Kɛkɛ ni amɛyi enyɔ lɛ fɛɛ amɛhiŋmɛii gbele, ni amɛyɔse akɛ amɛhiɛ amɛhe folo. No hewɔ lɛ, amɛkpɛ agbami bai kɛtsara, ni amɛkɛha amɛshishigbɛ.+  Sɛɛ mli aaafee be ni gbɛkɛnaashi kɔɔyɔɔ tswaa lɛ,* nuu lɛ kɛ eŋa lɛ nu Yehowa Nyɔŋmɔ gbee be ni enyiɛ* abɔɔ lɛ mli lɛ, ni amɛyatee amɛhe yɛ abɔɔ lɛ mli tsei lɛ ateŋ koni Yehowa Nyɔŋmɔ akana amɛ.  Ni Yehowa Nyɔŋmɔ tsɛ nuu lɛ shii abɔ ekɛɛ: “Nɛgbɛ bo yɔɔ?” 10  Naagbee mli lɛ, nuu lɛ kɛɛ: “Minu ogbee yɛ abɔɔ lɛ mli, shi mishe gbeyei ejaakɛ mihiɛ mihe folo, no hewɔ lɛ, miyatee mihe.” 11  Kɛkɛ ni ekɛɛ: “Namɔ kɛɛ bo akɛ ohiɛ ohe folo?+ Tso lɛ ni miwo bo he kitã akɛ okaye enɔ yibii lɛ eko lɛ, ani oye eko?”+ 12  Nuu lɛ kɛɛ: “Yoo lɛ ni okɛ lɛ hã mi akɛ mikɛ lɛ ahi shi lɛ, lɛ ehã mi tso lɛ nɔ yibii lɛ eko, ni miye.” 13  Kɛkɛ ni Yehowa Nyɔŋmɔ kɛɛ yoo lɛ akɛ: “Mɛni ofee nɛɛ?” Yoo lɛ hã hetoo akɛ: “Onufu lɛ laka mi, ni miye.”+ 14  Ni Yehowa Nyɔŋmɔ kɛɛ onufu+ lɛ akɛ: “Akɛni ofee enɛ hewɔ lɛ, alomɔ bo yɛ shĩa kooloi fɛɛ kɛ ŋa mli kooloi fɛɛ ateŋ. Obaanyiɛ omusu nɔ, ni obaaye mulu owala gbii abɔ fɛɛ. 15  Ni mikɛ nyɛɛ*+ baaŋmɛ bo+ kɛ yoo+ lɛ teŋ, kɛ oseshi*+ kɛ eseshi*+ teŋ. Ebaajwara oyitso,*+ ni bo hu obaatswa enanetsitsi nɔ.”*+ 16  Ekɛɛ yoo lɛ akɛ: “Mahã ohe ajara bo waa yɛ ohɔhiɛmɔ mli; hejaramɔ mli obaafɔ bii yɛ, ni obaashwe owu lɛ waa, ni ebaaye onɔ.” 17  Ni Adam* lɛ, ekɛɛ lɛ akɛ: “Akɛni obo oŋa lɛ gbee toi ni oye tso lɛ ni miwo bo he kitã+ nɛɛ akɛ, ‘Kaaye enɔ yibii lɛ eko’ hewɔ lɛ, alomɔ shikpɔŋ lɛ yɛ ohewɔ.+ Hejaramɔ mli obaaye enɔ nii yɛ, owala gbii abɔ fɛɛ.+ 18  Ebaawo ŋmeii kɛ jwɛi ni ŋmei yɔɔ he ehã bo, ni ŋa nɔ bai obaaye. 19  Ohiɛ latsa mli obaaye nii* yɛ kɛyashi obaaku osɛɛ kɛya shikpɔŋ, ejaakɛ no mli ajie bo kɛjɛ.+ Ejaakɛ sũ* ji bo, ni sũ* mli obaaku osɛɛ kɛya.”+ 20  Enɛ sɛɛ lɛ, Adam wo eŋa lɛ gbɛ́i akɛ Hawa,* ejaakɛ lɛ ebaatsɔ hiɛkãalɔi fɛɛ anyɛ.+ 21  Ni Yehowa Nyɔŋmɔ kɛ kooloi ahewoji fee atadei kakadaji ehã Adam kɛ eŋa lɛ koni amɛwo.+ 22  Ni Yehowa Nyɔŋmɔ kɛɛ: “Naa, gbɔmɔ lɛ etsɔ tamɔ wɔteŋ mɔ kome, ele ekpakpa kɛ efɔŋ.+ Agbɛnɛ, bɔ ni afee ni ekakpã enine mli etse wala tso+ lɛ hu nɔ yibii lɛ eko eye, ní ehi shi kɛtee naanɔ lɛ,—” 23  Enɛ hewɔ lɛ, Yehowa Nyɔŋmɔ jie lɛ kɛjɛ Eden abɔɔ+ lɛ mli, koni eyatsu shikpɔŋ lɛ ni ajie lɛ kɛjɛ mli lɛ nɔ nii.+ 24  No hewɔ lɛ, eshwie gbɔmɔ lɛ kɛje jɛmɛ, ni ekɛ kerubim+ kɛ klante ko ni miitso kɛ la, ní miibɔle ehe to Eden abɔɔ lɛ bokãgbɛ, koni ekɛbu gbɛ ni yaa wala tso lɛ he lɛ he.

Shishigbɛ Niŋmaa

Loo “le ehenɔ kwɛmɔ jogbaŋŋ; le ŋaa.”
Loo “gbi lɛ mli be ni kɔɔyɔɔ tswaa lɛ.”
Ni ji, Nyɔŋmɔ.
Loo “mpleshii.”
Hebri sht. ŋm., “odumɔwu.”
Hebri sht. ŋm., “edumɔwu.”
Loo “ebaapila oyitso; ebaatswa oyitso nɔ.”
Loo “obaapila enanetsitsi; obaajwara enanetsitsi.”
Eshishi ji, “Shikpɔŋ Lɛ Nɔ Gbɔmɔ; Adesa; Gbɔmɔ.”
Hebri sht. ŋm., “blodo.”
Hebri sht. ŋm., “mulu.”
Hebri sht. ŋm., “mulu.”
Eshishi ji, “Mɔ Ni Hiɛ Kã.”