Ang Hunahuna sa Bibliya

Unsa man Gayod ang Diyos?

“ANG Diyos maoy Espiritu, ug silang magasimba kaniya kinahanglan nga magasimba uban sa espiritu ug sa kamatuoran,” matod sa Bibliya. Gipadayag niining mga pulonga kon unsa gayod ang Diyos​—siya maoy espiritu! (Juan 4:19-24) Bisan pa niana, siya gihubit sa Bibliya ingong usa ka persona. Ang iyang ngalan maoy Jehova.​—Salmo 83:18.

Nalibog ang ubang mga magbabasa sa Bibliya kon unsa gayod ang Diyos. Kon ang Diyos dili makita, nganong daghang beses man siyang gihisgotan sa Bibliya nga dunay mata, dunggan, ilong, kasingkasing, bukton, kamot, tudlo, ug tiil? a Ang uban tingali moingon nga ang Diyos dunay lawas nga sama nianang sa tawo kay ang Bibliya nag-ingon nga ang tawo gibuhat sumala sa iyang dagway. Atong susihon pag-ayo ang giingon sa Bibliya aron matin-awan kita niini.​—Genesis 1:26.

Nganong Gihubit ang Diyos nga Dunay Tawhanong Kinaiyahan?

Aron masabtan sa tawo kon unsa gayod ang Diyos, giinspirar niya ang mga magsusulat sa Bibliya sa paggamit ug tawhanong kinaiyahan kon maghisgot bahin sa Labing Gamhanan. Gitawag kini sa mga eskolar ug anthropomorphic, nga nagkahulogang “gihubit o giisip nga dunay tawhanong dagway o hiyas.” Kini nagpakita lang nga limitado ang pinulongan sa tawo sa paghubit sa matuod nga Diyos, si Jehova. Gihimo kini aron sa pagpatin-aw sa kinaiyahan sa Diyos sa paagi nga masabtan sa tawo. Wala kini magpasabot nga ato kining sabton sa literal nga paagi maingon nga dili nato sabtong literal ang paghubit sa Bibliya sa Diyos ingong “Bato,” “adlaw,” o “taming.”​—Deuteronomio 32:4; Salmo 84:11.

Sa susama, sa pagpatin-aw nga ang tawo sa limitadong paagi dunay mga hiyas nga sama nianang nabatonan ni Jehova sa hingpit nga sukod, ang Bibliya nag-ingon nga ang tawo gilalang sumala sa dagway sa Diyos. Tin-aw nga wala kana magpasabot nga ang tawo espiritu o nga ang Diyos tawhanon ug dagway.

Ang Diyos ba Lalaki o Babaye?

Kay dili man literal nga dunay tawhanong dagway ang Diyos, dili usab literal ang paghubit sa Diyos ingong lalaki. Ang paggamit ug pulong  nga lalaki o babaye mapadapat lang sa tawo ug mananap ug ang paggamit niini nagpakita lang nga limitado ang bokabularyo sa tawo sa paghubit kon unsa gayod ang Diyos nga Labing Gamhanan, si Jehova.

Gigamit sa Bibliya ang titulong “Amahan” aron kita makasabot nga ang atong Maglalalang ikatandi sa usa ka mahigugmaon, mapanalipdanon, ug mahunahunaon nga tawhanong amahan. (Mateo 6:9) Wala kini magpasabot nga atong isipon ang Diyos o ang ubang espiritung mga linalang sa langit ingong lalaki o babaye. Walay lalaki o babaye kanila. Makaiikag, ang Bibliya nag-ingon nga kadtong gipanawag nga mahimong kaubang mga manununod ni Kristo sa iyang langitnong Gingharian dili magpabiling lalaki o babaye sa dihang mahimo na silang espiritung mga anak sa Diyos. Gipahinumdoman sila ni apostol Pablo nga “walay lalaki ni babaye” kanila sa dihang mahimo na silang espiritung mga anak sa Diyos. Sila mahulagwayong gihubit usab ingong “ang pangasaw-onon” sa Kordero, si Jesu-Kristo. Kining tanan nagpakita nga ang tawhanong dagway nga gigamit sa paghubit sa Diyos​—maingon man sa iyang bugtong Anak nga si Jesus, ug sa ubang espiritung mga linalang—​dili gayod angayng sabtong literal.​—Galacia 3:26, 28; Pinadayag 21:9; 1 Juan 3:1, 2.

Kay tukmang nakasabot sa papel sa lalaki, gihubit sa mga magsusulat sa Bibliya ang Diyos ingong lalaki. Sila nahibalo nga ang lalaki nga nagsunod sa mga prinsipyo sa Diyos maoy tukmang larawan sa mahigugmaon, inamahan nga pagtagad ni Jehova sa iyang tawhanong mga anak.​—Malaquias 3:17; Mateo 5:45; Lucas 11:11-13.

Kinalabwang Hiyas sa Diyos

Bisag espiritu, ang labawng Soberano dili gayod maniglain, dili misteryoso, ug siya makigkomunikar gayod. Ang iyang pagka-espirituhanon dili babag alang niadtong sinserong mga tawo nga gustong makakat-on bahin kaniya, sa iyang gugma, iyang gahom, iyang kaalam, ug sa iyang hustisya, nga naghubit kon unsa gayod Siya ug nga makita diha sa kalalangan.​—Roma 1:19-21.

Apan sa katibuk-an, ang kinalabwang hiyas sa Diyos nga gugma nagpaila kon unsa gayod Siya. Talagsaon kining hiyasa kay ang Bibliya nag-ingon nga ang Diyos gugma. (1 Juan 4:8) Nalangkob niini nga hiyas ang uban pa niyang mga hiyas, sama sa pagkamaluluy-on, pagkamapinasayloon, ug pagkamainantoson. (Exodo 34:6; Salmo 103:8-14; Isaias 55:7; Roma 5:8) Si Jehova maoy usa gayod ka mahigugmaong Diyos nga nagdapit kanato sa pagpakigsuod kaniya.​—Juan 4:23.

[Footnote]

NAKAPAMALANDONG KA BA?

◼ Unsay ngalan sa Diyos?​—Salmo 83:18.

◼ Asa nato makita ang mga ebidensiya sa mga hiyas sa Diyos?​—Roma 1:19-21.

◼ Unsa ang kinalabwang hiyas sa Diyos?​—1 Juan 4:8.