1, 2. ?Wanem i soemaot se Jehova i givim presen long gladhat blong hem?

JEHOVA i givim presen long gladhat blong hem. Evri samting we yumi gat i kamaot long hem. Ol gudgudfala samting blong wol ya oli blong hem nomo, mo hem i yusum olgeta blong givhan long ol laef samting. (Ol Sam 104:13-15; Hagae 2:8) Baebol i tokbaot olsem wanem Jehova i save yusum ol gudfala samting ya blong mekem merikel, blong givim samting we ol man blong hem oli nidim.

² Traem tingbaot neson blong Isrel, taem oli stap wokbaot 40 yia long draeples. Jehova i mekem merikel blong givim mana mo wota long olgeta. (Eksodas 16:35) Oli no sot long wan samting. (Nehemaea 9:20, 21) Sem mak long taem blong profet Elisa. Jehova i givim paoa long hem, blong i mekem smol oel blong wan wido i kam plante. Nao wido ya i save salem oel ya blong pem ol kaon blong hem, mo i gat naf mane i stap blong pem ol samting we hem mo tufala boe blong hem oli nidim. (2 King 4:1-7) Jehova i givim paoa long Jisas tu  blong i mekem ol merikel. Samtaem Jisas i givim kakae long ol man, mo wanwan taem i givim mane tu.—Matiu 15:35-38; 17:27.

3. ?Long stadi ya, bambae yumi tokbaot wanem?

³ Jehova i save yusum eni samting we hem i wantem, blong givhan long ol man blong hem. Be hem i askem long olgeta tu blong oli givim samting we oli naf blong givim, blong sapotem ogenaesesen blong hem. (Eksodas 36:3-7; ridim Ol Proveb 3:9.) ?From wanem Jehova i wantem se yumi givimbak sam sas samting blong yumi long hem? ?Ol man blong Jehova bifo oli givim wanem blong givhan long wok blong hem? ?Tede, ogenaesesen i yusum presen mane olsem wanem? Long stadi ya, bambae yumi tokbaot ansa blong ol kwestin ya.

4. ?From wanem yumi givim samting blong sapotem wok blong Jehova?

⁴ Yumi givim samting long Jehova from we yumi lavem hem mo yumi wantem talem tangkiu. Taem yumi tingbaot evri samting we Jehova i mekem blong yumi, yumi harem se hem i gud tumas. King Deved i gat sem tingting taem hem i tokbaot ol samting we bambae oli nidim blong wokem haos tempol. Hem i talem se evri samting we yumi gat i kamaot long Jehova fastaem, taswe eni samting we yumi givimbak long hem, i kamaot long hem nomo.—Ridim 1 Kronikel 29:11-14.

5. ?Olsem wanem Baebol i tijim yumi se taem yumi wosipim Jehova, yumi mas givim presen long hem?

⁵ Taem yumi givim samting long Jehova, hemia wan fasin blong wosipim hem. Long wan vison we aposol Jon i luk, hem i harem ol man blong Jehova long heven oli talem se: “Jehova, God blong mifala. Yu yu gat bigfala paoa, mo yu mekem olgeta samting. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli ona long yu.” (Revelesen 4:11) Tru ya, i stret nomo we yumi ona long Jehova mo leftemap nem blong hem. Taswe, yumi wantem givim ol nambawan samting blong yumi long hem. Jehova i talem long Moses se, taem neson blong Isrel i mekem lafet tri taem evri yia blong wosipim hem, oli mas givim presen long hem tu, i se: “Olgeta man evriwan oli mas karem presen i kam.” (Dutronome 16:16) Tede tu, taem yumi wosipim Jehova, yumi mas givim presen long gladhat blong yumi. Long fasin ya, yumi soemaot se yumi glad tumas long wok we ogenaesesen blong Jehova i mekem, mo yumi wantem sapotem.

6. ?From wanem i gud yumi givim presen? (Yu luk pija long stat blong stadi.)

⁶ I nogud yumi kasem samting nomo, be yumi mas givim samting tu. Hemia i mekem i gud long yumi. (Ridim Ol Proveb 29:21.) Traem tingbaot wan pikinini, we Papa mo Mama i givim smol presen mane long hem. Nao pikinini i yusum haf mane blong pem wan presen blong  tufala. ?Tufala i harem olsem wanem? Tufala i glad we i glad. Mo traem tingbaot wan yangfala paenia we i stap yet wetem papa mo mama blong hem. Hem i givim smol mane long tufala blong givhan blong pem renhaos mo kakae. Tufala i no talem long hem se i mas mekem olsem, be tufala i akseptem presen ya. ?From wanem? From we, hemia wan rod blong yangfala i talem tangkiu long tufala from ol samting we tufala i mekem blong hem. Long sem fasin, Jehova i save se taem yumi givimbak sam sas samting blong yumi long hem olsem presen, hemia i mekem i gud long yumi.

7, 8. ?Olsem wanem ol man blong Jehova bifo oli soemaot gudfala eksampol, taem oli givim presen (1) blong ol spesel projek? (2) blong sapotem wok blong hem?

⁷ Baebol i talem se ol man blong Jehova bifo oli givim plante presen blong sapotem wok blong hem. Samtaem oli givim presen blong sapotem wan spesel projek. Olsem long taem we oli stap wokem haos tapolen blong God, Moses i askem long ol man Isrel blong oli givim presen. Biaen, King Deved i mekem sem samting blong wokem haos tempol blong God. (Eksodas 35:5; 1 Kronikel 29:5-9) Taem Joas i king, ol pris oli yusum presen mane we ol man oli givim, blong fiksimap haos tempol. (2 King 12:4, 5) Taem ol fas Kristin oli harem nius se i no gat kakae long Judia, oli mekem desisen blong sanem presen we olgeta wanwan oli naf blong givim, i go long ol brata we oli sot long kakae.—Ol Wok 11:27-30.

⁸ Mo tu, ol man blong Jehova bifo oli givim smol mane long olgeta we oli lidim wok blong hem, olsem ol Livaet. Folem Loa blong Moses, ol Livaet oli no kasem wan graon olsem ol narafala laen. Ale, ol man Isrel oli givim wan hip blong ol ten hip blong ol samting we oli gat, i go long olgeta. Hemia i mekem se ol Livaet oli save putum tingting i go nomo long ol wok blong olgeta long haos tapolen. (Namba 18:21) Long sem fasin, ol woman oli givim samting we oli naf blong givim, long Jisas mo ol aposol.—Luk 8:1-3.

9. Long taem bifo, ?ol presen oli kam wea?

⁹ Ol presen ya oli kam long ol defdefren ples. Presen we ol man Isrel oli givim blong bildim haos tapolen, maet oli karem taem oli aot long Ijip. (Eksodas 3:21, 22; 35:22-24) Sam long ol Kristin bifo oli salem sam samting blong olgeta, olsem graon mo haos, nao oli karem mane ya i go long ol aposol, blong givhan long ol brata mo sista we oli gat nid. (Ol Wok 4:34, 35) Sam narafala Kristin oli putum smol mane i stap oltaem, nao oli givim blong sapotem wok blong prij. (1 Korin 16:2) Taswe, nating se man i rij o i pua, be evriwan oli save givim samting.—Luk 21:1-4.

10, 11. (1) ?Yumi save mekem wanem folem eksampol blong ol man blong Jehova bifo? (2) ?Wanem tingting blong yu long janis ya blong sapotem wok blong Kingdom?

¹⁰ Tede tu, maet oli askem long yumi blong yumi givim presen mane blong  wan spesel projek. Ating kongregesen i stap mekem plan blong wokem gud Haos Kingdom bakegen, o blong wokem wan niuwan. Maet oli stap wokem gud branj ofis bakegen. Mo tu, yumi save givhan blong pem ol samting blong wan asembli. Maet i gat disasta long wan narafala ples, nao ol brata oli nidim help. Presen mane blong yumi i stap givhan tu long ol misinari, ol spesel paenia, ol eria elda, mo olgeta we oli wok long wol hedkwota mo ol branj ofis. Mo tu, maet kongregesen i stap sanem presen mane i go oltaem, blong givhan blong bildim ol Haos Asembli mo ol Haos Kingdom long ol defren ples long wol.

¹¹ Yumi evriwan i save givim samting blong sapotem wok blong ogenaesesen blong Jehova long ol las dei ya. Bighaf blong ol presen mane, i no gat man i save hu i givim. Mo taem yumi putum presen mane long ol bokis long Haos Kingdom o yumi givim tru long jw.org, yumi no talemaot long narafala hamas mane yumi givim. ?Be olsem wanem sipos yu harem se presen mane blong yu i smol tumas? Blong talem stret, bighaf blong ol presen mane we ogenaesesen i kasem, i kam long ol smosmol mane we plante man oli givim, be i no long bigfala mane we sam man nomo oli givim. Ol brata we oli no gat plante mane oli folem eksampol blong ol Kristin long Masedonia bifo. Olgeta oli “pua tumas,” be oli askem oltaem sipos oli save givim presen mane, mo oli givim long gladhat blong olgeta.—2 Korin 8:1-4.

12. ?Olsem wanem ogenaesesen i yusum ol presen mane long nambawan fasin?

¹² Hed Kampani i yusum ol presen mane long fasin we i stret mo i waes. (Matiu 24:45) Oli prea blong oli save mekem ol gudfala desisen, mo oli plan gud olsem wanem blong yusum mane ya. (Luk 14:28) Long Baebol, ol man we oli lukaot long ol presen mane, oli meksua se oli yusum blong sapotem wosip blong Jehova nomo. Traem tingbaot Esra we i karem ol sas samting, wetem gol mo silva we king blong Pesia i givim, oli kambak long Jerusalem. Tede, praes blong ol samting ya i bitim 10 bilian vatu. Esra i tingbaot ol presen ya olsem samting blong givim long Jehova. Taswe, hem i talem klia olsem wanem blong lukaot gud long ol presen ya, taem oli pastru long ol ples we oli denja. (Esra 8:24-34) Plante yia afta, aposol Pol i kasem presen mane blong givhan long ol brata long Judia. Nao hem i meksua se olgeta we oli karem mane ya i go, oli “mekem evri samting i stret long fes blong Jehova, mo long fes blong ol man tu.” (Ridim 2 Korin 8:18-21.) Tede, ogenaesesen blong yumi i folem eksampol blong Esra mo Pol, blong yusum gud ol presen mane.

13. ?From wanem ogenaesesen i mekem sam jenis long ol yia we oli jes pas?

¹³ Samtaem wan famle i jenisim fasin blong spenem mane, blong mekem se i no gat kaon. Maet oli mekem se laef blong olgeta i no fasfas, blong oli save spenem moa taem long wok blong Jehova. Sem mak long ogenaesesen blong Jehova. Long ol yia we oli jes pas, i gat plante niufala projek, we oli nidim moa mane i bitim mane we yumi gat. Taswe, ogenaesesen i olsem famle ya we i lukaot rod blong sevem mane mo mekem wok i isi moa. Olsem nao, hem i save yusum ol presen mane blong yumi blong mekem plante moa wok.

14-16. (1) ?Presen mane blong yumi i givhan blong mekem wanem? (2) Yu talem olsem wanem ol projek ya oli givhan long yu.

¹⁴ Plante we oli stap longtaem long trutok oli stap talem se naoia, ogenaesesen blong Jehova i givim plante moa presen i bitim bifo. I gat jw.org mo JW Brodkasting. Niu Wol Translesen Baebol i kamaot long plante moa lanwis. Mo long 2014, yumi mekem intenasnal asembli ya blong tri dei, “!Yumi Obei Long Kingdom Fastaem!” long ol bigbigfala stadium long 14 taon long wol. !Evriwan we oli joen long asembli ya oli glad we oli glad!

¹⁵ Plante oli talem bigfala tangkiu from ol presen ya we ogenaesesen blong Jehova i givim. Wan brata wetem woman blong hem we tufala i stap prij long Esia, i se: “Mitufala i stap long wan taon we i no bigfala tumas. Samtaem, mitufala i harem se i gat mitufala nomo, mo i isi blong fogetem se wok blong Jehova i stap gohed long olgeta ples long wol. Be taem mitufala i wajem JW Brodkasting, mitufala i tingbaot se mitufala i gat wan bigfala famle blong ol brata mo sista long fulwol. Long kantri ya, ol brata mo sista oli glad tumas blong wajem JW Brodkasting evri manis. Oli harem se oli kam klosap moa long ol brata long Hed Kampani, mo oli glad moa blong stap long ogenaesesen blong Jehova.”

¹⁶ I gat klosap 2,500 Haos Kingdom long wol, we ol brata oli stap bildim o wokem gud bakegen. Long wan kongregesen long Honduras, ol brata mo sista oli talem se niufala Haos Kingdom blong olgeta i olsem wan drim we i kamtru. Oli talem se: “Mifala i glad tumas blong stap long bigfala famle we Jehova i gat long heven mo long wol, mo blong harem gud long kampani blong bigfala famle blong ol brata mo sista long wol ya.” Plante narafala oli talem sem toktok taem oli kasem Baebol mo ol narafala buk long prapa lanwis blong olgeta, o taem wan disasta i kasem  olgeta nao ol brata mo sista oli givhan, o taem oli luk gudfala frut we i kamaot long wok blong prij long pablik ples.

17. ?Wanem i soemaot se Jehova i stap givhan long ogenaesesen blong hem tede?

¹⁷ Plante man we oli no Witnes blong Jehova oli sapraes bigwan long ol bigfala wok we yumi mekem wetem presen mane nomo. Bos blong wan bigfala kampani i kam luk faktri blong yumi blong printim ol buk. Hem i sapraes se ol wokman oli no kasem pei, yumi yusum presen mane nomo, mo yumi no mekem fanresing. Hem i talem se wok we yumi mekem i bigwan tumas, ol man nomo oli no naf blong mekem. !I tru ya! Yumi save se ol wok ya oli gohed nomo from we Jehova nao i givhan long yumi.—Job 42:2.

18. (1) ?Yumi kasem wanem blesing taem yumi sapotem wok blong Kingdom? (2) ?Olsem wanem blong tijim ol pikinini blong yumi mo ol niuwan?

¹⁸ Jehova i givim janis long yumi blong sapotem wok blong Kingdom, mo hemia wan bigfala ona. Taem yumi mekem olsem, hem i blesem yumi. (Malakae 3:10) Hem i promes se sipos yumi givim presen long hem, bambae yumi kasem ol samting we yumi nidim. (Ridim Ol Proveb 11:24, 25.) Mo tu, bambae yumi glad, from we ‘man i harem gud moa taem hem i givim samting, i bitim we hem i kasem samting.’ (Ol Wok 20:35) Ol tok mo aksen blong yumi oli save tijim ol pikinini blong yumi mo ol niuwan, se olgeta tu oli save givim presen mo kasem plante blesing.

19. ?Stadi ya i pulum yu blong mekem wanem?

¹⁹ Olgeta samting we yumi gat oli kamaot long Jehova. Taem yumi givimbak samting long hem, yumi soemaot se yumi lavem hem, mo yumi talem tangkiu long hem. (1 Kronikel 29:17) Taem ol man Isrel oli givim presen blong wokem haos tempol, ‘oli givim long gladhat blong olgeta nomo, mo oli glad we oli glad from we oli givim ol samting ya long Jehova.’ (1 Kronikel 29:9) I gud yumi tu, yumi harem gud blong givimbak sam samting we Jehova i givim long yumi finis.