“Bakonka Umwana Wa Mpaanga”
“Bakonka Umwana Wa Mpaanga”
“Aba e bakonka Umwana wa mpaanga konse uko aya.”—UKUS. 14:4.
1. Bushe abasambi bene bene balemona shani ukulakonka Yesu?
BUSHIKU bumo, ninshi palipita imyaka nalimo ibili ne myeshi 6 ukutula apo Yesu atendekele umulimo wakwe pano isonde, “alesambilisha abalongene mu Kapernahumu.” Lintu bamwene ukuti amashiwi alandile ya-afya, “abasambi bakwe abengi babwelele ku fyo balecita kale, kabili balekele ukwenda nankwe.” Ilyo Yesu aipwishe abatumwa bakwe 12 nga ca kuti na bo balefwaya ukuya, Simone Petro ayaswike ati: “Mwe Shikulu, ni kuli nani twingaya? Ni mwe muli na mashiwi ya mweo wa muyayaya; kabili twalitetekela no kwishiba ukuti ni mwe Uwa Mushilo wa kwa Lesa.” (Yoh. 6:48, 59, 60, 66-69) Abasambi bene bene aba kwa Yesu tabalekele ukumukonka. Pa numa ya kusubwa no mupashi wa mushilo, batwalilile ukunakila ku butungulushi bwa kwa Yesu.—Imil. 16:7-10.
2. (a) Bushe “umusha wa cishinka kabili uwashilimuka,” nangu “kangalila wa cishinka” nani? (b) Bushe uyu musha alanga shani ukuti lyonse ‘alakonka Umwana wa mpaanga’?
2 Finshi twingasosa pa Bena Kristu basubwa aba muno nshiku? Ilyo Yesu alesesema pa fyo “tukeshibilako ukuti e po [ali] no kuti icalo cili ku mpela,” alandile pe bumba lya basambi bakwe abasubwa no mupashi pe sonde ukuti bali no kuba “umusha wa cishinka kabili uwashilimuka,” nangu “kangalila wa cishinka.” (Mat. 24:3, 45; Luka 12:42) Abengi sana ababa muli uyu musha balilanga pa nshita yalepa ukuti “bakonka Umwana wa mpaanga konse uko aya.” (Belengeni Ukusokolola 14:4, 5.) Ababa muli ili bumba ni banacisungu pantu tabaikowesha ku fisumino ne fibelesho fya muli “Babiloni Mukalamba,” e kutila ukupepa kwa bufi konse ukwa mu calo. (Ukus. 17:5) “Mu tunwa twabo” tamusangwa ifisambilisho fya bufi, kabili “tabakwata akalema” ukufuma ku calo ca kwa Satana. (Ukus. 14:5) Ku ntanshi, abasubwa abacili pe sonde ‘bakakonka’ Umwana wa mpaanga ukufika fye na ku muulu.—Yoh. 13:36.
3. Mulandu nshi cacindamina ukuti tucetekele umusha wa cishinka?
3 Yesu alisonta umusha wa cishinka kabili uwashilimuka ukwangalila “aba mu ng’anda yakwe,” e kutila ababa muli uyu wine musha, “pa kuti alebapeela ifya kulya fyabo pa nshita yalinga.” Alimusonta no kuba kangalila “pa fyuma fyakwe fyonse.” (Mat. 24:45-47) Pali ifi “fyuma” paba ne “bumba ilikalamba” ilya “mpaanga shimbi” ilileya lilekulilako fye. (Ukus. 7:9; Yoh. 10:16) Bushe ababa mwi bumba lya basubwa na ba mwi bumba lya “mpaanga shimbi” tabalingile ukucetekela umusha uo Yesu asonta ukubangalila? Fingi ifingalenga tucetekele uyu musha. Pali ifyo pali ifikalamba fibili: (1) Yehova alicetekela uyu musha. (2) Yesu na o wine alicetekela uyu musha. Natulande pa bushininkisho bulanga ukuti Yehova Lesa na Yesu Kristu balicetekela sana umusha wa cishinka kabili uwashilimuka.
Yehova Alicetekela Umusha wa Cishinka
4. Mulandu nshi tushilingile ukutwishikila ifya kulya fya ku mupashi ifyo umusha wa cishinka kabili uwashilimuka atupekanishisha?
4 Tontonkanyeni pa cilenga ukuti umusha wa cishinka kabili uwashilimuka aletupekanishisha ifya kulya fya ku mupashi ifisuma pa nshita yalinga. Yehova atile “Nkakucenjesha no kukusambilisha inshila iyo ufwile ukuyamo.” E lyo asosele no kuti: “Nkakupanda amano ninshi na menso yandi yali pali iwe.” (Amalu. 32:8) Kanshi Yehova e utungulula umusha wa cishinka. E ico kuti twacetekela ifyo umusha atwafwa ukumfwikisha Amalembo e lyo ne fyo atutungulula ukulingana na Malembo.
5. Cinshi cilanga ukuti umupashi wa kwa Lesa ulapeela umusha wa cishinka amaka?
5 Yehova alapeela umusha umupashi wakwe uwa mushilo. Nangu ca kuti umupashi wa kwa Yehova taumoneka, ifyo wafwa abantu fyena filamoneka. Tontonkanyeni pa fyo umusha wa cishinka kabili uwashilimuka aabomba umulimo wa kushimikila pali Yehova Lesa, pa Mwana wakwe, na pa Bufumu mwi sonde lyonse. Bakapepa ba kwa Yehova balebila imbila ya Bufumu mu fyalo ukucila pali 230 na mu fishi fya pali babemba. Bushe ubo te bushininkisho bwabula no kutwishika ubwa kuti umupashi wa kwa Lesa ulapeela umusha wa cishinka amaka? (Belengeni Imilimo 1:8.) Pa kuti umusha wa cishinka apekanishishe abantu ba kwa Yehova mwi sonde lyonse ifya kulya fya ku mupashi, afwile ukupekanya bwino bwino ifya kubomba. Pa kucita ifyo no kushininkisha ukuti fyabomba, uyu musha alalanga ukutemwa, alaba uwatekanya, kabili alalanga ne fisabo fimbi ifya mupashi.—Gal. 5:22, 23.
6, 7. Bushe Yehova acetekela shani umusha wa cishinka?
6 Pa kuti mwingeshiba bwino ifyo Yehova acetekela umusha wa cishinka, tontontonkanyeni ifyo alaya ababa muli uyu musha. Umutumwa Paulo alembele ati: “Ipenga likalila, e lyo abafwa bakabuuka ne mibili iishibola, na ifwe tukaalulwa. Pantu uyu mubili uubola ukaalulwa ukuba uushibola, kabili uyu mubili uufwa ukaalulwa ukuba uushifwa.” (1 Kor. 15:52, 53) Abasambi ba kwa Kristu abasubwa ababombela Lesa mu busumino no kufwila mu mibili ya buntu iibola, ilyo bakabuushiwa tabakabe fye fibumbwa fya mupashi ifyakwata umweo wa muyayaya. Bakabapeela bumunshifwa, e kutila umweo wa muyayaya kabili teti bonaike. Kabili, bakabapeela imibili iishingabola kabili tabakaleshintilila pa cili conse ku kubapeela amaka. Ilembo lya Ukusokolola 4:4 lilondolola ukuti aba ababuushiwa kale balikala pa fipuna fya bufumu, balifwala ne fisote fya bufumu ifya golde pa mitwe yabo. Aba Bena Kristu basubwa bapembelela ukuba ishamfumu. Lelo kwaliba ubushininkisho na bumbi ubwa kuti Lesa alibacetekela.
7 Ilembo lya Ukusokolola 19:7, 8 litila: “Yafika inshita ya bwinga bwa Mwana wa mpaanga, no mukashi wakwe naipekanya. Kabili napeelwa insalu ishabuuta tuutu, isha busaka, ishawama ukuti afwale, pantu insalu ishawama e milimo yalungama iya ba mushilo.” Yehova alisala Abena Kristu basubwa ukwisaba nabwinga wa Mwana wakwe ku ntanshi. Ubupe ubo abapeela, ubwa kukanabola, bumunshifwa, ukuba ishamfumu, e lyo no kuba ‘nabwinga wa Mwana wa mpaanga,’ ala bupe bwawamisha icine cine! Bushininkisho bwine bwine ubwa kuti Lesa alicetekela abasubwa, “abakonka Umwana wa mpaanga konse uko aya.”
Umusha wa Cishinka Balimucetekela Kuli Yesu
8. Bushe Yesu alanga shani ukuti alicetekela abasambi bakwe abasubwa no mupashi?
8 Bushininkisho nshi ubulanga ukuti Yesu alicetekela sana abasambi bakwe abasubwa? Pa bushiku bwakwe ubwa kulekeleshako pe sonde, Yesu apangene icipangano na batumwa bakwe aba busumino 11. Abebele ati: “Ni mwe mwe batwalilila na ine mu fya kunjesha; kabili ndepangana na imwe icipangano, ifyo na Tata apangana na ine icipangano ca bufumu, ukuti mukalye no kunwa pe tebulo lyandi mu bufumu bwandi, no kwikala pa fipuna fya bufumu ku kupingula imikowa ikumi na ibili (12) iya kwa Israele.” (Luka 22:28-30) Icipangano ico Yesu apangene na batumwa 11 tacapelela fye ku batumwa beka lelo na Bena Kristu basubwa bonse 144,000 bakabamo. (Luka 12:32; Ukus. 5:9, 10; 14:1) Bushe Yesu kuti apangana na bo icipangano ca kulateka nankwe mu Bufumu bwakwe nga ca kuti tabacetekela?
9. Fyuma nshi fimbi ifyaba pa “fyuma [fya kwa Kristu] fyonse”?
9 Ukulunda pali ci cipangano, Yesu Kristu alisonta umusha wa cishinka kabili uwashilimuka ukuba kangalila pa “fyuma fyakwe fyonse,” e kutila fyonse ifya Bufumu pe sonde. (Mat. 24:47) Pali fi fya Bufumu paba na maofeshi yakalamba aya Nte sha kwa Yehova, amaofeshi yanono mu fyalo fyalekanalekana, Ifikuulwa fya Kulonganinamo ukulongana kukalamba na Mayanda ya Bufumu mwi sonde lyonse. E lyo paba no mulimo wa kushimikila pa Bufumu no kupanga abasambi. Bushe batini umuntu kuti aseekesha ifyuma fyakwe ku muntu uo ashacetekela no kumweba ukuti alefibomfya?
10. Cinshi cilanga ukuti Kristu aliba na basambi bakwe abasubwa?
10 Ilyo fye Yesu, uwali nabuushiwa pali ilya nshita ashilanina ukuya ku muulu, amonekele ku basambi bakwe aba busumino no kubalaya ati: “Moneni! nakulaba na imwe inshiku shonse mpaka na ku mpela ya calo.” (Mat. 28:20) Bushe Yesu alifikilisha ifi fine abalaile? Ukufuma mu 1993, ifilonganino fya Nte sha kwa Yehova mwi sonde lyonse fyalifulilako sana, ukufuma pali 70,000 ukufika kuli 100,000 no kucilapo. Basambi banga abapya abalundwako? Mu myaka yapita 15 abasambi ababatishiwe nalimo balafika kuli 4,500,000, nga kwakanyamo, kuti twatila ababatishiwa cila bushiku, balacila pali 800. Uku kufulilako sana ukwa bantu bushininkisho bwine bwine ubwa kuti Kristu alatungulula abasambi bakwe abasubwa pa kulongana kwa pa cilonganino kabili alabatungilila mu mulimo wa kupanga abasambi.
Umusha Aliba ne Cishinka Kabili Alishilimuka
11, 12. Finshi umusha wa cishinka acita ifilangilila ukuti wa cishinka kabili alishilimuka?
11 Apo Yehova Lesa na Yesu Kristu balicetekela umupwilapo umusha wa cishinka kabili uwashilimuka, bushe na ifwe tatufwile ukumucetekela? Na kabushe, umusha wa cishinka alilanga ukuti wa cishinka mu kubomba umulimo bamupeela. Ku ca kumwenako, magazini ya Ulupungu lwa kwa Kalinda yalilembwa pa myaka 130. Ukulongana kwa pa cilonganino, ukulongana kukalamba, no kulongana kwa citungu ukwa Nte sha kwa Yehova na nomba kucili kulatwafwa ukukuula icitetekelo cesu.
12 Apo umusha wa cishinka alishilimuka, ali-icefya, tatangilila Yehova, kabili ico Lesa alefwaya ukuti cicitwe nga nacishibikwa bwino bwino talekapo fye. Ku ca kumwenako, ilyo bashimapepo ba mu macalici basuulako fye nangu ukusuminisha imibele ya bukaitemwe, iishili ya bukapepa iya bantu ba mu calo, umusha wa cishinka ena alatusoka ukuti tulecenjela ku fiteyo fyaba mu calo cabipa ica kwa Satana. Icilenga ukuti umusha wa cishinka aletupanda amano no kutusoka pa nshita yalinga ni co Yehova Lesa na Yesu Kristu balamupaala. Kanshi tufwile ukucetekela sana umusha wa cishinka. Nomba, finshi twingacita pa kulanga ukuti twamulicetekela?
‘Kabiyeni’ Pamo na Basubwa Ilyo Balekonka Umwana wa Mpaanga
13. Ukulingana no kusesema kwa kwa Sekaria, kuti twalanga shani ukuti twalicetekela umusha wa cishinka kabili uwashilimuka?
13 Ibuuku lya mu Baibolo ilya kwa Sekaria lilanda pa “bantu 10” abaya ku “muYuda umo” no kumweba abati: “Tuleya na imwe.” (Belengeni Sekaria 8:23.) Apo uyu “muYuda” bamwita abati “imwe,” tabatile “iwe,” ninshi te muntu umo, bengi. Muno nshiku, emininako Abena Kristu bashalapo abasubwa no mupashi—ababa muli “Israele wa kwa Lesa.” (Gal. 6:16) “Abantu 10 aba mu ndimi shonse isha nko,” bemininako ibumba likalamba ilya mpaanga shimbi. Nga filya fine fye Abena Kristu basubwa bakonka Yesu konse uko aleya, aba mwi bumba likalamba na bo ‘balaya,’ nangu ukwendela pamo no musha wa cishinka kabili uwashilimuka. Aba mwi bumba likalamba tabafwile ukumfwa insoni ukuishibisha ukuti banabo ba balya “baitwa mu muulu.” (Heb. 3:1) Yesu tomfwa insoni ukwita abasubwa ati “bamunyinane.”—Heb. 2:11.
14. Ni shila nshi isho twingatungililamo bamunyina ba kwa Kristu?
14 Yesu Kristu amona abatungilila bamunyina ne cishinka ukuti baletungilila ena. (Belengeni Mateo 25:40.) Nomba, ni mu nshila nshi umo abakwata isubilo lya kwikala pe sonde bengatungililamo bamunyina ba kwa Kristu abasubwa no mupashi? Inshila ikalamba ya kubafwilisha mu mulimo wa kushimikila Ubufumu. (Mat. 24:14; Yoh. 14:12) Impendwa ya basubwa abacili pe sonde yalicepelako mu kupita kwa myaka, lelo impendwa ya mpaanga shimbi yena yalikulilako. Ilyo abakwata isubilo lya pe sonde balebombako umulimo wa kushimikila, nga cingacitika no kuba bakashimikila ba nshita yonse, ninshi baletungilila abasubwa no mupashi ilyo balebomba umulimo bapeelwa uwa kupanga abasambi. (Mat. 28:19, 20) Cimbi ico tatufwile ukulabako lishuko lya kutungilila uyu mulimo ukupitila mu kusangwilako indalama mu nshila shapusanapusana.
15. Bushe Umwina Kristu umo umo afwile ukucita shani pa fya kulya fya ku mupashi ifya pa nshita yalinga ififuma ku musha e lyo na pa fyo umusha apingula mu kuteyanya?
15 Bushe ifwe pa lwesu umo umo, tumona shani ifya kulya fya ku mupashi ifya pa nshita yalinga ifyo umusha wa cishinka atupekanishisha ukupitila mu mpapulo shilanda pa fya mu Baibolo no kupitila mu kulongana kwa Bwina Kristu? Bushe tulalya ifi fya kulya no kutasha e lyo no kukonka ifyo tusambilila? Bushe tucita shani nga ca kuti umusha wa cishinka ayalulako fimo mu kuteyanya? Ukuitemenwa ukukonka ubutungulushi tupeelwa, cilangililo ca kuti twalicetekela inshila Yehova acitilamo ifintu.—Yako. 3:17.
16. Mulandu nshi Abena Kristu bonse bafwile ukumfwila bamunyina ba kwa Kristu?
16 Yesu atile: “Impaanga shandi shilomfwa ishiwi lyandi, na ine nalishiishiba, na sho shilankonka.” (Yoh. 10:27) Ifyo fine e fyaba Abena Kristu basubwa. Inga balya ‘abaya’ na bo? Na bo bafwile ukumfwila Yesu. E lyo bafwile no kumfwila bamunyina ba kwa Kristu. Pantu na kuba, umulimo ukalamba uwa kutungulula no kusakamana abantu ba kwa Lesa mu fya ku mupashi wapeelwa ku basubwa. Finshi fimbi ifyaba mu kumfwila bamunyina ba kwa Kristu?
17. Bushe ukukutika ku musha wa cishinka kusanshamo na finshi?
17 Ilelo, umusha wa cishinka kabili uwashilimuka emininwako ne Bumba Litungulula, abatungulula no kwampanya umulimo wa kushimikila pa Bufumu mwi sonde lyonse. Ababa mwi Bumba Litungulula ni baeluda abasubwa no mupashi, abaishiba sana ukubomba ifintu. Aba e bo twingalanda ati ‘abaletutungulula.’ (Heb. 13:7) Apo basakamana bakasabankanya ba Bufumu ukufika kuli 7,000,000 mwi sonde lyonse mu filonganino 100,000 no kucilapo, aba bakangalila basubwa baba “abacincila pe mu mulimo wa kwa Shikulu.” (1 Kor. 15:58) Ukukutika ku musha wa cishinka cipilibula ukubombela pamo ne Bumba Litungulula.
Abakutika ku Musha wa Cishinka Balapaalwa
18, 19. (a) Bushe abakutika ku musha wa cishinka kabili uwashilimuka bapaalwa shani? (b) Cinshi tufwile ukupampaminapo ukucita?
18 Ukutula fye apo uyu musha wa cishinka kabili uwashilimuka bamusontela, ‘alaleta abengi ku bulungami.’ (Dan. 12:3) Pali aba abo aleta ku bulungami paba na balya abasubila ukupusuka ilyo cino calo cikonaulwa. Ala ukuba abalungama pa ntanshi ya kwa Lesa lipaalo icine cine!
19 Ku ntanshi, ilyo ‘umusumba wa mushilo, Yerusalemu Mupya [uwapangwa na ba 144,000], ukeka mu muulu ukufuma kuli Lesa kabili uwapekanishiwa kwati ni nabwinga uwapuulamikilwa umulume wakwe,’ cikaba shani kuli balya abaleumfwa kwi shiwi lya musha wa cishinka? Baibolo itila: “Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.” (Ukus. 21:2-4) E ico kanshi, shi natulekutika kuli Kristu na kuli bamunyina abo acetekela abasubwa no mupashi.
Finshi Musambilile?
• Bushininkisho nshi twakwata ubwa kuti Yehova alicetekela umusha wa cishinka kabili uwashilimuka?
• Finshi filangilila ukuti Yesu Kristu alicetekela umusha wa cishinka umupwilapo?
• Mulandu nshi tulingile ukucetekela uyu kangalila wa cishinka?
• Finshi twingacita pa kulanga ukuti twalicetekela umusha wa cishinka?
[Amepusho]
[Icikope pe bula 25]
Bushe mwalishiba abo Yehova asala ukuba nabwinga wa Mwana wakwe ku ntanshi?
[Ifikope pe bula 26]
Yesu Kristu aliseekesha
“ifyuma” fyakwe ku musha
wa cishinka kabili uwashilimuka
[Icikope pe bula 27]
Nga tulebombako umulimo wa kushimikila, ninshi tuletungilila abasubwa no mupashi