Bushe Ulubatisho ni Cinshi?
Icasuko ca mu Baibolo
Ulubatisho kutumpika umuntu mu menshi no kumufumyamo. * Ici calilenga twaishiba icalengele ukuti Yesu aye abatishiwe mu mumana uukalamba. (Mateo 3:13, 16) Na kabili, ilyo umwaume umwina Etiopia alombele ukuti abatishiwe, ena na Filipi “batentemukile mu menshi.”—Imilimo 8:36-40.
Umwalola ukubatishiwa
Baibolo ilinganya ukubatishiwa ku kushikwa. (Abena Roma 6:4; Abena Kolose 2:12) Ukubatishiwa mu menshi kulangilila ukuti umuntu afwa ku mibele iyo akwete kale kabili atendeka imikalile iipya ngo Mwina Kristu uwaipeela kuli Lesa. Uwabikako ulubatisho e lyo ne fyo umuntu afwile ukucita pa kuti afikepo ukubatishiwa ni Lesa, pantu ifi filalenga twaba na kampingu iisuma iyashimpwa pe lambo lya kwa Yesu Kristu. (1 Petro 3:21) Na kuba Yesu alilandile ukuti abasambi bakwe bafwile ukubatishiwa.—Mateo 28:19, 20.
Bushe ulubatishio lwa mu menshi lulasamba ulubembu?
Awe. Baibolo isambilisha ukuti mulopa fye uwa kwa Yesu e wingatusangulula ku lubembu lonse. (Abena Roma 5:8, 9; 1 Yohane 1:7) Pa kuti umuntu anonkelemo mwi lambo lya kwa Yesu, afwile ukucetekela Yesu, ukwaluka no kutendeka ukucita ifintu ukulingana ne fyo Yesu alesambilisha, e lyo no kubatishiwa.—Imilimo 2:38; 3:19.
Bushe Baibolo isambilisha ukuti tufwile ukubatisha utunya?
Awe. Tapaba apo Baibolo yalanda pa kubatisha utunya. Amacalici yamo yalakwata ukusefya apo kuba no “kubatisha” akanya (balasansa amenshi nelyo ukwitulwila amenshi pa mutwe wa kanya) no kukapeela ishina. Umuntu pa kubatishiwa no kuba Umwina Kristu afwile ukuba umukalamba uwingomfwikisha no kusumina “imbila nsuma iya bufumu bwa kwa Lesa.” (Imilimo 8:12) Pa kuti umuntu abatishiwe afwile ukumfwikisha Icebo ca kwa Lesa, ukusumina ifyo cilanda, no kulapila. Akanya te kuti kacite ifi fintu.—Imilimo 2:22, 38, 41.
Na kabili, Baibolo ilanda pa bana ba Bena Kristu ukuti ba mushilo, nelyo balisanguluka mu menso ya kwa Lesa pa mulandu wa citetekelo ca bafyashi babo. (1 Abena Korinti 7:14) Nga ca kuti utunya tufwile ukubatishiwa, ninshi aba bana tabalingile ukuba aba mushilo pa mulandu wa bafyashi babo. *
Ifyo abantu balanda pa lubatisho lwa Bwina Kristu ifishili fya cine
Ubufi: Calibafye bwino ukusansa nelyo ukwitulwila umuntu amenshi pa mutwe mu cifulo ca kumwibisha umubili onse mu menshi.
Icine: Ulubatisho lonse ulo Baibolo yalandapo lulanda pa kwibisha umuntu mu menshi. Ku ca kumwenako, ilyo umusambi Filipi alebatisha umwaume umwina Etiopia, “batentemukile mu menshi.” Lyena pa numa “bafumine mu menshi.”—Imilimo 8:36-39. *
Ubufi: Filya Baibolo ibomfya amashiwi ya kuti aba mu ng’anda bonse balibatishiwe filangilila ukuti no tunya twalebatishiwa. Ku ca kumwenako, ilanda pali kalinda wa cifungo uwali mu Filipi ukuti: ‘Ena na ba mu ng’anda yakwe bonse balibatishiwe.’—Imilimo 16:31-34.
Icine: Ilyashi ililanda pali kalinda wa cifungo lilangilila ukuti ababatishiwe balyumfwikishe “icebo ca kwa Yehova” kabili ‘balisekelele apakalamba.’ (Imilimo 16:32, 34) Ifi fishinka filenga twaishiba ukuti nga ca kuti mwali utunya mu ng’anda ya kwa kalinda wa cifungo ninshi tatwabatishiwe, pantu utunya te kuti tumfwikishe icebo ca kwa Yehova.
Ubufi: Yesu alisambilishe pa kubatisha utunya ilyo alandile ukuti Ubufumu bwa mu muulu bwa bantu ababa nga bana abanono.—Mateo 19:13-15; Marko 10:13-16.
Icine: Yesu talesambilisha pa lubatisho ilyo alandile aya mashiwi. Lelo alesambilisha ukuti pa kuti umuntu afikepo ukwingila mu Bufumu bwa kwa Lesa afwile ukuicefya no kulafwaya ukusambilila nga filya abana abanono baba.—Mateo 18:4; Luka 18:16, 17.
^ Ishiwi lya kuti “ukubatisha” lyafuma kwi shiwi lya ciGriki ilyalola mu kuti “ukutumpika.” Moneni citabo citila Theological Dictionary of the New Testament, Volume I, ibula 529.
^ Icitabo ca The International Standard Bible Encyclopedia, citila “tapaba nangu pamo mu Cipingo Cipya apo bandapo pa kubatisha utunya.” Ici citabo calandile no kuti icalengele abantu balebatisha utunya “mulandu ne fyo abantu balelanda kabili ifyo balelumbilisha pa lubatisho ifishili fya cine,” ifya kuti ulubatisho lulasamba imembu.—Volume 1, amabula 416-417.
^ Icitabo ca New Catholic Encyclopedia pa mutwe uutila “Baptism (in the Bible),” catile: “Cali-ilanga apabuuta tutu ukuti mwi Calici lya kubalilapo pa kubatisha umuntu balemutumpika mu menshi.”—Volume 2, ibula 59.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Imipepele Yonse Yaba Fye Cimo Cine? Bushe Yonse Ilalenga Twapalama Kuli Lesa?
Ifintu fibili ifyo Baibolo yalandapo ifyasuka icipusho.
AMASUKO KU MEPUSHO YA MU BAIBOLO
Kuti Naishiba Shani Icilonganino ca Mapepo ica Cine?
Bushe ifyo ng’umfwa e fyalenga nashininikisha ukuti mipepele ya cine’?
AMASAMBILISHO YA MU BAIBO AYACINDAMA
Bushe Lesa Alitemwa Imipepele Yonse?
Abantu bengi bamona kwati caliba fye bwino ukupepa ukuli konse.
AMASAMBILISHO YA MU BAIBOLO
Tendekeni ukusambilila Baibolo ne Nte sha kwa Yehova
Tendekeni ukusambilila baibolo ne Nte sha kwa Yehova ukwabula ukulipila.