Icasuko ca mu Baibolo

Baibolo ilatwafwa ukwishiba ubupusano bwaba pa kupepa kwa cine no kwa bufi. Itila: “Mukabeshibila ku fisabo fyabo. Bushe abantu kuti basaba imyangashi ku myunga nelyo amakunyu kuli bacilasa?” (Mateo 7:16) Filya fine mwingeshiba ubupusano bwaba pa muti wa myangashi no muti wa myunga ilyo mwamona fisabo fitweleko, e fyo mwingeshiba no bupusano bwaba pa kupepa kwa cine no kwa bufi nga mwamona ifyo bacita. Fimo pa fyo mwingeshibilako ni ifi.

  1. Ifyo ababa mu kupepa kwa cine basambilisha fifuma muli Baibolo, te mano ya bantunse iyo. (Yohane 4:24; 17:17) Fimo ifyo basambilisha fintu Baibolo yalanda pa mweo na pa kwikala umuyayaya muli paradaise pano calo. (Amalumbo 37:29; Esaya 35:5, 6; Esekiele 18:4) Na kabili tabatiina ukulanda pa fya bufi ifyo abantu basambilisha mu mipepele yabo.—Mateo 15:9; 23:27, 28.

  2. Ababa mu kupepa kwa cine balafwa abantu ukwishiba Lesa ne shina lyakwe ilya kuti Yehova. (Amalumbo 83:18; Esaya 42:8; Yohane 17:3, 6) Tabasambilisha ukuti abantu te kuti beshibe Lesa, lelo basambilisha ukuti Lesa afwaya baba ifibusa fyakwe.—Yakobo 4:8.

  3. Ababa mu kupepa kwa cine basambilisha ukuti Lesa akatupusushisha muli Yesu Kristu. (Imilimo 4:10, 12) Ababa mu kupepa kwa cine balakonka ifyo Yesu alandile kabili balamupashanya.—Yohane 13:15; 15:14.

  4. Ababa mu kupepa kwa cine baishiba ukuti Ubufumu bwa kwa Lesa e bwingapwisha fye amafya ya bantunse. Na kabili balebako bambi pali ubu Ubufumu.—Mateo 10:7; 24:14.

  5. Ababa mu kupepa kwa cine balitemwana. (Yohane 13:35) Ifyo basambilisha filalenga abantu ukucindikana nangu ca kuti baba intambi, indimi, inkanda, ne nkulilo ishapusanapusana. (Imilimo 10:34, 35) Apo balitemwana, tabalwako inkondo.—Mika 4:3; 1 Yohane 3:11, 12.

  6. Ababa mu kupepa kwa cine tabakwata bashimapepo abo bafolesha, kabili tabapeela amalumbo ya bushimapepo ku uuli onse.—Mateo 23:8-12; 1 Petro 5:2, 3.

  7. Ababa mu kupepa kwa cine tabaitumpa mu fikansa fya calo. (Yohane 17:16; 18:36) Na lyo line, ababamo balicindika aba mu buteko nga fintu Baibolo ilanda. Itila: “Peeleni ifya kwa Kaisare kuli Kaisare [aba mu buteko], ne fya kwa Lesa kuli Lesa.”—Marko 12:17; Abena Roma 13:1, 2.

  8. Ababa mu kupepa kwa cine balacita ifyo basambilila lyonse, tabaficita fye ilyo bali pa mapepo. Balakonka ifyo Baibolo ilanda muli fyonse ifyo balecita. (Abena Efese 5:3-5; 1 Yohane 3:18) Ilyo balecita ifi, tababa no bulanda, lelo balaba ne nsansa pantu bapepa “Lesa wa nsansa.”—1 Timote 1:11.

  9. Ababa mu kupepa kwa cine tabafula sana. (Mateo 7:13, 14) Ababa mu kupepa kwa cine balabasuula ku bantu, balabapumya, kabili balabacusha pali filya bomfwila Lesa.—Mateo 5:10-12.

Ifyo ng’umfwa te fingalenga naishiba nampo ukupepa nasalapo kwa cine nelyo kwa bufi

Ifyo tumfwa te fingalenga twaishiba nampo ukupepa twasala kwa cine nelyo iyo. Baibolo yalisobele ukuti kukaba inshita ilyo abantu “bakailonganikila bakasambilisha [bashimapepo] aba kubeba ifyo abene balefwaya ukumfwa.” (2 Timote 4:3) Lelo Baibolo yena itweba ukuti tulingile ukuba mu “mipepele iyasanguluka kabili iishakowela mu menso ya kwa Lesa wesu kabili Shifwe,” nangu ca kuti abengi tabatemwa iyo mipepele.—Yakobo 1:27; Yohane 15:18, 19.