Buligi an mga Tawo nga ‘Magmata Tikang ha Pagkaturog’
Buligi an mga Tawo nga ‘Magmata Tikang ha Pagkaturog’
“Hinbaroan ta na an panahon, nga oras na nga kamo igmamata tikang ha pagkaturog.”—ROMA 13:11.
MAISASAYSAY MO BA?
Kay ano nga importante nga an mga Kristiano magpabilin nga nagmamata ha espirituwal?
Ha ministeryo, kay ano nga sadang kita mamati ngan magin alerto?
Kay ano nga sadang kita magin buotan ngan malumo ha ministeryo?
1, 2. Ha ano nga paagi kinahanglan magmata an damu nga tawo?
KADA tuig, yinukot an namamatay kay ginpipiraw hira o nahingangaturog pa ngani samtang nagdadrayb. An iba napapaiwas ha trabaho kay atrasado na hira magmata salit nauurhi pagsulod ha trabaho o tungod kay nahingangaturog hira ha trabaho. Kondi mas peligroso gud an kahingaturog ha espirituwal. An Biblia nagpapahamangno ha aton mahitungod hini pinaagi ha pagsiring: “Bulahan an nag-aagma.”—Pah. 16:14-16.
2 Samtang nagtitikahirani an daku nga adlaw ni Jehova, an katawohan ha kabug-osan nangangaturog ha espirituwal. Gintatawag pa ngani han pipira nga lider han Kakristianohan an ira mga membro nga ‘nangangaturog nga mga higante.’ Ano an pagkaturog ha espirituwal? Kay ano nga importante nga an mga Kristiano magpabilin nga nagmamata? Paonan-o naton mabubuligan an iba nga magmata tikang ha pagkaturog ha espirituwal?
PAGKATUROG HA ESPIRITUWAL—ANO ITO?
3. Paonan-o mo ihuhulagway an tawo nga nakaturog ha espirituwal?
3 An mga tawo nga nakaturog kasagaran na nga waray ginhihimo. Ha kabaliktaran, an mga nakaturog ha espirituwal bangin damu an ginhihimo—pero waray kalabotan ha espirituwal nga mga butang. Bangin okupado hinduro hira ha adlaw-adlaw nga mga kabaraka, ha kaliawan, o ha pangalimbasog nga magin sikat o riko. Tungod hito, diri na importante ha ira an ira espirituwal nga panginahanglan. Pero an mga tawo nga nagmamata ha espirituwal maaram nga nagkikinabuhi na kita ha “urhi nga mga adlaw,” salit ginhihimo nira an ngatanan ha pagbuhat han kaburut-on han Dios.—2 Ped. 3:3, 4; Luk. 21:34-36.
4. Ano an karuyag sidngon ni Pablo han nagsagdon hiya: “Diri kita mangaturog, sugad han iba”?
4 Basaha an 1 Tesalonika 5:4-8. Dinhi hi apostol Pablo nagsagdon ha iya mga igkasi-tumuroo nga ‘diri mangaturog sugad han iba.’ Ano an iya karuyag sidngon? May duha nga paagi nga bangin ‘mangaturog’ kita. An usa amo an pagbalewaray han mga suruklan ni Jehova ha moral. An usa pa amo an pagbalewaray han kamatuoran nga hirani na bungkagon ni Jehova an magraot. Kinahanglan siguruhon naton nga diri kita maimpluwensyahan han panhunahuna ngan paggios han mga indibiduwal nga waray kahadlok ha Dios.
5. Ano an mga disposisyon han mga nangangaturog ha espirituwal?
5 May mga tawo nga naghuhunahuna nga waray Dios nga maghuhukom ha ira. (Sal. 53:1) An iba naghuhunahuna nga an Dios diri interesado ha aton salit waray pulos nga magin interesado kita ha iya. An iba liwat naabat nga magigin sangkay hira han Dios kon membro hira hin relihiyon. Hira ngatanan nangangaturog ha espirituwal. Kinahanglan hira magmata. Paonan-o naton hira mabubuligan?
KITA MISMO KINAHANGLAN MAGPABILIN NGA NAGMAMATA
6. Kay ano nga an mga Kristiano kinahanglan magpabilin nga nagmamata ha espirituwal?
6 Mapupukaw la naton an iba kon kita mismo nagmamata. Salit paonan-o kita makakapabilin nga nagmamata? Kinahanglan likyan naton an paggawi han mga nangangaturog ha espirituwal. An Biblia nasiring nga hira nagbubuhat han “mga buhat han kasisidman”—maaringasa ngan masamok nga pagkalipay, paghubog, imoralidad, waray awod nga paggawi, araway, ngan pangabugho. (Basaha an Roma 13:11-14.) Bangin makuri an paglikay ha sugad nga paggawi. Importante gud an pagpabilin nga nagmamata. An usa nga drayber nga nagbabalewaray han peligro han kahingaturog samtang nagdadrayb mahimo madisgrasya ngan mamatay. Labi na gud nga sadang hinumdoman pirme han usa nga Kristiano nga an kahingaturog ha espirituwal mahimo magresulta hin kamatayon!
7. Paonan-o makakaapekto ha aton an pagkaada sayop nga panhunahuna ha mga tawo?
7 Pananglitan, bangin maghunahuna kita nga an ngatanan ha aton teritoryo diri nakarawat han maopay nga sumat ngan diri na magbabag-o. (Prob. 6:10, 11) Bangin mangatadongan kita, ‘Kon waray makarawat han maopay nga sumat, kay ano nga mangalimbasog pa man kita ha pagbulig ha mga tawo?’ Oo, bangin damu yana an nangangaturog ha espirituwal, pero puydi magbag-o an ira kahimtang ngan disposisyon. An iba nakakamata ngan nakarawat han maopay nga sumat. Ngan mabubuligan naton hira kon kita mismo nagpapabilin nga nagmamata. Pananglitan, puydi naton sarihan an bag-o nga mga paagi nga himoon nga makapainteres an aton pagpresenta han mensahe han Ginhadian. Nahiuupod liwat ha pagpabilin nga nagmamata an pagpahinumdom ha aton kalugaringon kon kay ano nga importante gud an aton ministeryo.
KAY ANO NGA IMPORTANTE GUD AN ATON MINISTERYO?
8. Kay ano nga importante gud an aton ministeryo?
8 Hinumdumi nga anoman an reaksyon han mga tawo yana, an aton pagsangyaw nagpapasidungog kan Jehova ngan may bahin ha pagtuman han iya katuyoan. Diri mag-iiha, bubungkagon han Dios adton diri nasunod ha maopay nga sumat. An reaksyon han mga tawo ha aton pagsangyaw magigin usa nga basihan ha paghukom ha ira. (2 Tes. 1:8, 9) Dugang pa, sayop gud an paghunahuna nga diri kita kinahanglan magmaduruto ha pagsangyaw kay “may pagkabanhaw han mga minatay han mga magtadong ngan diri man magtadong.” (Buh. 24:15) Hinbaroan naton ha Pulong han Dios nga an huhukman sugad nga mga “kanding” bubungkagon ha kadayonan. An aton pagsangyaw kapahayagan han kalooy han Dios kay naghahatag ito ha mga tawo hin higayon nga magbag-o ngan magkaada “kinabuhi nga waray kataposan.” (Mat. 25:32, 41, 46; Roma 10:13-15) Kon diri kita magsasangyaw, paonan-o hira magkakaada higayon nga makabati han mensahe nga mahimo makaluwas han ira kinabuhi?
9. Paonan-o an pagsangyaw han maopay nga sumat nagin mapulsanon ha imo ngan ha iba?
9 Kita liwat nagpapahimulos ha pagsangyaw han maopay nga sumat. (Basaha an 1 Timoteo 4:16.) Diri ba naobserbaran mo nga an pag-istorya mahitungod kan Jehova ngan han Ginhadian nagpaparig-on han imo pagtoo ngan gugma ha Dios? Diri ba nakakabulig ito ha imo nga magkultibar hin Kristiano nga mga kalidad? Diri ba nagigin mas malipayon ka kon imo iginpapakita an imo debosyon ha Dios pinaagi han pakigbahin ha ministeryo? Damu han nakapribilehiyo nga magtutdo han kamatuoran ha iba an nalipay ha pakakita nga an espiritu han Dios nabulig ha ira gintututdoan nga magkaada mas maopay nga kinabuhi.
MAGIN MAOBSERBARON
10, 11. (a) Paonan-o iginpakita ni Jesus ngan ni Pablo nga alerto hira ngan maobserbaron? (b) Paonan-o kita magigin alerto ngan maobserbaron ha aton ministeryo?
10 May iba-iba nga paagi nga mahihimo naton nga makapainteres ha mga tawo an maopay nga sumat. Salit kinahanglan magin alerto ngan maobserbaron kita. Hi Jesus an aton susbaranan. Tungod kay hingpit, maaram Hiya nga nasisina an usa nga Pariseo bisan kon waray hiya magyakan. Maaram liwat hi Jesus han tinuod nga pagbasol han usa nga babaye nga kilala nga makasasala ngan han pagsakripisyo han usa nga balo nga babaye. (Luk. 7:37-50; 21:1-4) Nabuligan ni Jesus an mga tawo tungod kay maaram hiya han ira panginahanglan. Pero diri naton kinahanglan magin hingpit basi makita an panginahanglan han iba. Hi apostol Pablo usa nga ehemplo hito. Iya iginpahiuyon an iya presentasyon basi mabuligan an iba-iba nga klase hin tawo.—Buh. 17:22, 23, 34; 1 Kor. 9:19-23.
11 Pinaagi ha pangalimbasog nga magin alerto ngan maobserbaron pariho kan Jesus ngan kan Pablo, hibabaroan naton an pinakamaopay nga paagi ha pagkuha han interes han mga tawo. Pananglitan, ha imo pagdaop ha mga indibiduwal, pag-obserbar hin mga butang nga magsusumat han ira kultura, mga hilig, o kon solo ba hira, inasaw-an, o may mga anak. Kitaa kon ano an ira ginbubuhat ngan matinalahuron nga unabiha ito ha imo pagtikang hin pakiistorya ha ira.
12. Samtang nakikigbahin ha ministeryo, ano an sadang naton hinumdoman mahitungod ha pakiistorya ha aton partner?
12 Kon alerto kita ha ministeryo, diri naton tutugotan an iba nga butang nga makawara han aton pokus hito. Bisan kon makaparig-on an pakiistorya ha aton partner, sadang naton hinumdoman nga an aton tuyo amo an pagsangyaw. (Ekles. 3:1, 7) Salit sadang kita mag-ikmat nga an pakiistorya ha aton partner diri makawara han aton atensyon ha ministeryo. Usa nga maopay nga paagi nga makakapokus kita ha ministeryo amo an pag-istorya mahitungod han mga punto nga karuyag naton isumat ha mga interesado. Sugad man, bisan kon an cellphone usahay nakakabulig ha aton nga magin epektibo ha ministeryo, sadang naton siguruhon nga an mga tawag diri makadisturbo ha aton pakiistorya ha tagbalay.
MAGPAKITA HIN PERSONAL NGA INTERES
13, 14. (a) Paonan-o naton hibabaroan kon ano an nakakapainteres ha usa nga tawo? (b) Paonan-o naton mabubuligan an mga tawo nga magin interesado ha espirituwal nga mga butang?
13 Importante nga mamati hin maopay ha imo nakakaistorya ha ministeryo. Ano an puydi mo ipakiana basi maaghat hiya nga isumat an iya inaabat? Nababaraka ba hiya ha pagtikadamu han mga relihiyon, ha kamadarahog nga nahitatabo ha ira lugar, o ha kapakyas han mga gobyerno? Puydi mo ba buligan an iba nga magin interesado ha espirituwal nga mga butang pinaagi ha pag-istorya mahitungod han makaruruyag nga disenyo han buhi nga mga butang o han pagin praktikal han mga sagdon han Biblia? An mga tawo ha haros ngatanan nga kultura, bisan an pipira nga ateyista, interesado ha pag-ampo. Damu an naghuhunahuna kon may namamati ba ha mga pag-ampo. An iba bangin naghuhunahuna han mga pakiana sugad hini: Namamati ba an Dios ha ngatanan nga pag-ampo? Kon diri, ano an sadang naton buhaton basi pamatian han Dios?
14 Mahibabaro kita kon paonan-o magtitikang hin pakiistorya pinaagi ha pag-obserbar ha eksperyensyado nga mga magwarali. Obserbari kon paonan-o hira nagpapakiana nga diri baga hin nag-iimbistigar o nanginginlabot ha personal nga kinabuhi han tagbalay. Paonan-o an tono han ira tingog ngan ekspresyon han ira nawong nagpapakita nga interesado hira nga hibaroan an iya panhunahuna?—Prob. 15:13.
MAGIN BUOTAN NGAN MAABTIK
15. Kay ano nga sadang kita magin buotan ha aton pagsangyaw?
15 Naruruyag ka ba kon ginpupukaw ka nga maopay an imo katurog? Damu an nasisina kon tigda hira nga ginpupukaw. Kasagaran na nga karuyag nira nga hinay-hinayon la hira pagpukaw. Sugad liwat hito an kahimtang kon nangangalimbasog ka nga pukawon an mga tawo tikang ha pagkaturog ha espirituwal. Pananglitan, kon an tagbalay nag-iisog ha imo pagbisita, ano an maopay buhaton? Magin buotan ngan ipakita nga ginrirespeto mo an iya inaabat, pasalamati hiya ha pagsumat hito, ngan kalmado nga bumaya. (Prob. 15:1; 17:14; 2 Tim. 2:24) An imo pagkabuotan bangin makapagios ha iya nga bag-uhon an iya pagtratar ha sunod nga may Saksi nga bumisita ha iya.
16, 17. Paonan-o naton maipapakita an maopay nga pagturotimbang ha aton ministeryo?
16 Ha iba nga kahimtang, mahimo mo malamposan an negatibo nga reaksyon ha imo pagsangyaw. Bangin may sumiring, “Ha iba na la. May relihiyon na ako” o , “Diri ako interesado” tungod la kay baga hin ito an pinakamasayon nga paagi basi maundang an pag-istorya. Pero pinaagi han kaabtik ngan pagkabuotan, bangin may maibangon ka nga maopay nga pakiana nga makakabulig ha tagbalay nga magin interesado ha mensahe han Biblia.—Basaha an Kolosas 4:6.
17 Usahay kon may nakakaistorya kita nga nasiring nga damu hinduro an ira ginbubuhat, mas maopay nga magin matinalahuron ngan bumaya. Kondi ha iba nga higayon bangin maturotimbang mo nga puydi ka makahatag hin halipot ngan mapulsanon nga mensahe. Pananglitan, may mga kabugtoan nga nakakapresenta hin mensahe ha Biblia nga diri naabot hin usa ka minuto. An ira halipot nga presentasyon usahay nakakapukaw gud han interes han tagbalay salit nasasantop niya nga may panahon ngay-an hiya para ha halipot nga pakiistorya. Kay ano nga diri sarihan ito kon igintutugot han kahimtang?
18. Ano an puydi naton himoon basi magin mas epektibo ha diri pormal nga pagsangyaw?
18 Kon andam kita para ha diri pormal nga pagsangyaw, mabubuligan naton an mga tawo nga aton iginkikita kada adlaw nga magin interesado ha maopay nga sumat. Damu nga kabugtoan an nagbubutang hin mga literatura ha ira bulsa o bag. Bangin andam liwat hira nga magbasa hin teksto kon may higayon. Mahimo ka magpabulig ha paramangno han pag-alagad o ha mga payunir ha iyo kongregasyon kon paonan-o mag-aandam ha pagbuhat hito.
MAHIGUGMAON NGA BULIGI AN IMO MGA PARYENTE NGA MAGMATA
19. Kay ano nga diri kita sadang umundang ha pangalimbasog nga buligan an aton mga paryente?
19 Natural la nga karuyag naton buligan an aton mga paryente nga karawaton an maopay nga sumat. (Jos. 2:13; Buh. 10:24, 48; 16:31, 32) Kon waray maglampos an aton siyahan nga pangalimbasog, bangin mawad-an kita hin kadasig nga magsari utro. Bangin maghunahuna kita nga anoman an aton hihimoon o isisiring, diri na magbabag-o an ira hunahuna. Pero bangin may mahitabo nga bangin makagbag-o han ira kinabuhi o panhunahuna. O bangin nag-uswag na an imo abilidad ha pagsaysay han kamatuoran, salit bangin magkaada na maopay nga resulta.
20. Paonan-o naton maipapakita nga ginrirespeto naton an mga pagbati han aton mga paryente kon nakikiistorya kita ha ira?
20 Kinahanglan respetuhon naton an mga pagbati han aton mga paryente. (Roma 2:4) Diri ba sadang magin buotan an aton pakiistorya ha ira sugad han aton pakiistorya ha mga tawo ha teritoryo? Magin malumo ngan matinalahuron. Diri liwat kinahanglan nga pirme ka magsangyaw ha imo mga paryente. Pinaagi han imo paggawi, maipapakita mo kon paonan-o nakabulig ha imo an kamatuoran. (Efe. 4:23, 24) Ipakita ha ira nga nagin mas maopay an imo pagkinabuhi tungod han pagtutdo ni Jehova. (Isa. 48:17) Pinaagi han imo susbaranan, ipakita ha imo mga paryente kon paonan-o sadang magkinabuhi an usa nga Kristiano.
21, 22. Pag-unabi hin eksperyensya nga nagpapakita nga importante gud an padayon nga pangalimbasog ha pagbulig ha mga paryente nga mahibaro mahitungod kan Jehova.
21 Usa nga sister an nagsurat: “Pirme ako nangangalimbasog pagsangyaw ha akon 13 nga kabugtoan pinaagi ha akon pagyakan ngan paggawi. Kada tuig ginsusuratan ko an tagsa ha ira. Kondi ha sulod hin 30 ka tuig, ako la an Saksi ha amon pamilya.”
22 Hiya padayon nga nagsiring: “Usa ka adlaw, gintawagan ko an usa ko nga bugto nga babaye nga naukoy hirayo ha amon. Nagsumat hiya nga ginhangyo niya an lider han ira relihiyon nga tutdoan hiya ha Biblia, pero waray gud hiya tutdui. Han nagsiring ako nga bubuligan ko hiya, hiya nagsiring: ‘Sige, pero susumatan ko ikaw nga daan: Diri gud ako magsa-Saksi.’ Ginpadad-an ko hiya han libro nga Ano Gud ba an Igintututdo han Biblia?, ngan gintatawagan ko hiya kada pipira ka adlaw. Kondi waray la gihap niya abrihi an libro. Ha urhi, ginhangyo ko hiya nga kuhaon an iya libro, ngan ha sulod hin mga 15 minutos, ginbasa ngan ginhisgotan namon ha telepono an pipira nga ginkotar nga teksto. Katapos han pipira pa nga tawag, karuyag na niya mag-aram hin sobra 15 minutos. Katapos, hiya na an natawag ha akon basi mag-aram, usahay antes pa ngani ako bumuhát ha higdaan ha aga ngan usahay duha ka beses ha usa ka adlaw. Han sumunod nga tuig nagpabawtismo hiya, ngan paglabay hin usa ka tuig, nagpayunir hiya.”
23. Kay ano nga kinahanglan padayon nga mangalimbasog kita pagbulig ha mga tawo nga makamata tikang ha pagkaturog ha espirituwal?
23 Kinahanglan magin maabtik kita ngan padayon nga mangalimbasog ha pagbulig ha mga tawo nga makamata tikang ha pagkaturog ha espirituwal. Damu pa gihapon an nakarawat han maopay nga sumat. Kada bulan may aberids nga sobra 20,000 nga nagpapabawtismo sugad nga mga Saksi ni Jehova. Salit sundon naton an sagdon ni Pablo kan Arkipo: “Bantayan mo an pagkaministro nga kinarawat mo ha Ginoo, nga pagtumanon mo adto.” (Kol. 4:17) An sunod nga artikulo mabulig ha aton ngatanan nga masabtan an kahulogan han pagsangyaw nga may pag-abat hin pagkaapurado.
[Mga Pakiana]
[Kahon ha pahina 13]
KON PAONAN-O MAGPAPABILIN NGA NAGMAMATA
▪ Magpabilin nga sagipo ha pagbuhat han kaburut-on han Dios
▪ Likyi an mga buhat han kasisidman
▪ Hinumdumi an peligro han pagkaturog ha espirituwal
▪ Pirme ipakita an tinuod nga personal nga interes ha mga tawo ha iyo teritoryo
▪ Sarihi an bag-o nga mga paagi ha pagsangyaw
▪ Hinumdumi an pagkaimportante han imo ministeryo
