Pahayag 9:1-21
9 Ginpatunog han ikalima nga anghel an iya trumpeta. Ngan nakita ko an usa nga bitoon tikang ha langit nga nahulog ha tuna, ngan iginhatag ha iya an yawi han ganggang han kahiladman.
2 Gin-abrihan niya an ganggang han kahiladman, ngan ginawas tipaigbaw an asó tikang ha buho sugad hin asó tikang ha daku nga hudno; ngan an adlaw* nagsirom pati an hangin tungod han asó tikang ha buho.
3 Ngan tikang ha asó nagkagawas an mga duron ngada ha tuna; ngan gintagan hira hin awtoridad nga pariho han awtoridad han mga iskorpyon ha tuna.
4 Ginsidngan hira nga diri dauton an mga tanom ha tuna o an bisan ano nga berde nga banwa o an bisan ano nga kahoy, lugod an mga tawo la nga an ira agtang waray marka han panselyo han Dios.
5 Katapos, an mga duron gintagan hin awtoridad nga pasakitan hira hin lima ka bulan pero diri hira patayon, ngan an ira inabat nga kasakit pariho han kasakit han tawo nga gintukob hin iskorpyon.
6 Ngan hito nga panahon pamimilngon hito nga mga tawo an kamatayon pero diri nira ito hiaagian, ngan maghihingyap hira nga mamatay, pero an kamatayon mapalagiw ha ira.
7 An mga duron pariho hin mga kabayo nga andam na ha pakig-away. May-ada hira sugad hin korona nga bulawan ha ira ulo, ngan an ira nawong pariho hin nawong han mga tawo,
8 pero an ira buhok pariho hin buhok han kababayin-an, ngan an ira mga ngipon pariho hin kanan leon.
9 May sul-ot hira nga kutamaya nga pariho hin puthaw nga kutamaya, ngan an palapaka han ira mga pako pariho han aringasa han mga karuwahe nga gindadanas han mga kabayo nga nasulong ha pakig-away.
10 Ngan may mga ikog hira ngan mga sugod pariho han mga iskorpyon. An ira ikog may gahum ha pagpasakit ha mga tawo hin lima ka bulan.
11 May hadi hira, an anghel han kahiladman. Ha Hebreo an iya ngaran Abadon,* pero ha Griego an iya ngaran Apolyon.*
12 Natapos na an usa nga pagpahayag han kairo. Kitaa! Duha pa nga pagpahayag han kairo an maabot kahuman hini.
13 Ginpatunog han ikaunom nga anghel an iya trumpeta. Ngan tikang ha mga sungay ha bulawan nga halaran ha atubangan han Dios nabatian ko an usa nga tingog
14 nga nasiring ha ikaunom nga anghel nga may trumpeta: “Badbari an upat nga anghel nga nakagapos ha daku nga salog Euprates.”
15 Ngan ginbuhian an upat nga anghel, nga igin-andam para ha oras ngan adlaw ngan bulan ngan tuig, ha pagpatay han ikatulo nga bahin han mga tawo.
16 Nabatian ko an kadamu han mangangabayo nga kasundalohan: duha ka yinukot-yukot ka yinukot-yukot.*
17 Ha bisyon, sugad hini an nakita ko nga mga kabayo ngan mga nasakay hito: may sul-ot hira nga kutamaya nga pula sugad hin kalayo ngan asul sugad hin hasinto ngan dulaw sugad hin asupre. Ngan an ulo han mga kabayo pariho hin ulo han mga leon, ngan ha ira baba may nagawas nga kalayo, asó, ngan asupre.
18 Tungod hinin tulo nga peste nga amo an kalayo, asó, ngan asupre, nga nagkagawas ha ira baba, namatay an ikatulo nga bahin han katawohan.
19 Kay an gahum han mga kabayo aada ha ira baba ngan ikog, kay an ira ikog pariho hin halas ngan may ulo, ngan pinaagi hito nandadaot hira.
20 Pero an nahibibilin pa nga katawohan nga waray mamatay hini nga mga peste waray magbasol han ira mga buhat; waray nira bayai an pagsingba ha mga demonyo ngan ha mga dios-dios nga bulawan, silber, tumbaga, bato, ngan kahoy, nga diri nakakakita, diri nakakabati, ngan diri nakakalakat.
21 Ngan waray hira magbasol han ira pamatay, pagbuhat hin espiritismo, imoralidad,* ngan pangawat.
Mga footnote
^ O “sudang.”
^ Nangangahulogan nga “Kabungkagan.”
^ Nangangahulogan nga “Parabungkag.”
^ O “20,000 × 10,000,” karuyag sidngon, 200,000,000.
^ Kitaa an footnote ha Mat 5:32.
