Pahayag 16:1-21
16 Katapos, nakabati ako hin daku nga tingog tikang ha santuaryo nga nasiring ha pito nga anghel: “Kadto na, ngan itakbo ngadto ha tuna an pito nga yahong han kasina han Dios.”
2 Ngan kinadto an una nga anghel ngan gintakbo an iya yahong ngadto ha tuna. Salit an mga tawo nga may marka han mapintas nga hayop ngan nagsisingba ha imahen hito nag-antos hin kasakit tungod han mangutngot ngan grabe nga samad.
3 Sunod, gintakbo han ikaduha nga anghel an iya yahong ngadto ha dagat. Ngan nagin dugo ito nga pariho han kanan patay nga tawo, ngan namatay an ngatanan nga buhi nga kalag ha dagat.
4 Katapos gintakbo han ikatulo nga anghel an iya yahong ngadto ha mga salog ngan mga burabod han tubig. Ngan nagin dugo ito ngatanan.
5 Nabatian ko an anghel nga may awtoridad ha katubigan nga nasiring: “Ikaw an maunungon nga Dios, an amo gihapon nga Dios yana ngan hadto; matadong ka, kay iginpadapat mo ini nga mga paghukom,
6 tungod kay ginpaagay nira an dugo han mga baraan ngan han mga propeta, ngan gintagan mo hira hin dugo nga maiinom; ito an angay ha ira.”
7 Ngan nabatian ko an halaran nga nasiring: “Oo, Jehova nga Dios nga Makagarahum-ha-ngatanan, masasarigan ngan matadong an imo mga desisyon ha paghukom.”
8 Ngan gintakbo han ikaupat nga anghel an iya yahong ngadto ha adlaw,* ngan gintugotan an adlaw nga sunugon an mga tawo han kalayo.
9 Salit an mga tawo nasunog han sobra nga kapaso, pero ginpasiparahan nira an ngaran han Dios nga may awtoridad hito nga mga peste, ngan waray hira magbasol ngan maghatag hin kadayawan ha iya.
10 Ngan gintakbo han ikalima nga anghel an iya yahong ngadto ha trono han mapintas nga hayop. Ngan nagsirom an ginhadian hito, ngan ira ginkagat an ira mga dila tungod han ira kasakit,
11 pero ira ginpasiparahan an Dios han langit tungod han ira kasakitan ngan mga samad, ngan waray hira magbasol han ira mga buhat.
12 Katapos gintakbo han ikaunom nga anghel an iya yahong ngadto ha daku nga salog Euprates, ngan hinubas an tubig hito, basi an dalan maiandam para ha mga hadi tikang ha ginsisirangan han adlaw.
13 Katapos nakakita ako hin tulo nga mahugaw nga giniyahan nga kapahayagan nga pariho hin mga pakla nga nagawas ha baba han dragon ngan ha baba han mapintas nga hayop ngan ha baba han buwa nga propeta.
14 Ha pagkamatuod mga kapahayagan ito nga giniyahan han mga demonyo ngan nagbubuhat ito hin mga tigaman, ngan napakadto ito ha mga hadi ha bug-os nga inuukyan nga tuna, basi tirukon hira ha pakiggirra ha daku nga adlaw han Dios nga Makagarahum-ha-ngatanan.
15 “Kitaa! Makanhi ako pariho hin kawatan. Malipayon an padayon nga nagmamata ngan nakasul-ot han iya pantungbaw nga mga panapton, basi diri hiya maglakat nga hubo ngan diri makita han mga tawo an iya kaarawdan.”
16 Katapos gintirok hira ngadto ha lugar nga ha Hebreo gintatawag nga Armagedon.*
17 Ngan gintakbo han ikapito nga anghel an iya yahong ngadto ha hangin. Tungod hini may daku nga tingog nga ginawas ha santuaryo tikang ha trono, nga nasiring: “Natapos na!”
18 Ngan may mga kidlat, mga tingog, mga dalugdog, ngan makusog nga linog nga waray pa kapariho tikang nga nagkaada mga tawo ha tuna. Haluag gud an lukop hito nga linog ngan makusog gud ito.
19 Salit an daku nga syudad nabahin ha tulo, ngan narumpag an mga syudad han mga nasud; ngan nahinumdoman han Dios an Babilonya nga Gamhanan, nga tagan hiya han kopa han bino han Iya kangalas.
20 Sugad man, an ngatanan nga isla nawara, ngan waray na makita an kabukiran.
21 Ngan tikang ha langit nagkahudlog ha mga tawo an dagku nga yelo nga mga usa ka talanton* an kabug-aton. Tungod han peste nga uran nga yelo, ginpasiparahan han mga tawo an Dios kay waray gud kapariho ito nga peste.
