Pahayag 8:1-13
8 Han iya gintangtang an ikapito nga selyo, nagmingaw ha langit hin mga tunga ka oras.
2 Ngan nakita ko an pito nga anghel nga natindog ha atubangan han Dios, ngan gintagan hira hin pito nga trumpeta.
3 Usa pa nga anghel nga may ginkakaptan nga bulawan nga surudlan hin insenso an inabot ngan tinindog ha may halaran; ngan gintagan hiya hin damu nga insenso basi ighalad didto ha bulawan nga halaran ha atubangan han trono samtang nag-aampo an ngatanan nga baraan.
4 Ngan an asó han insenso tikang ha kamot han anghel nagtipaigbaw ha atubangan han Dios samtang nag-aampo an mga baraan.
5 Ginbutangan dayon han anghel an surudlan han insenso hin kalayo tikang ha halaran ngan iginlabog an kalayo ha tuna. Ngan nagkaada mga dalugdog, mga tingog, mga kidlat, ngan linog.
6 Katapos, an pito nga anghel nga may pito nga trumpeta nag-andam ha pagpatunog hito.
7 Ginpatunog han una nga anghel an iya trumpeta. Ngan nag-uran ha tuna hin yelo ngan kalayo nga may salakot nga dugo; ngan an ikatulo nga bahin han tuna nasunog, ngan an ikatulo nga bahin han kakahoyan nasunog, ngan an ngatanan nga berde nga tanom nasunog.
8 Ginpatunog han ikaduha nga anghel an iya trumpeta. Ngan iginlabog ha dagat an pariho hin daku nga bukid nga nasusunog ha kalayo. Ngan nagin dugo an ikatulo nga bahin han dagat,
9 ngan namatay an ikatulo nga bahin han mga may kinabuhi* ha dagat, ngan nabungkag an ikatulo nga bahin han mga barko.
10 Ginpatunog han ikatulo nga anghel an iya trumpeta. Ngan nahulog tikang ha langit an usa nga daku nga bitoon nga nagdidilaab sugad hin sulô,* ngan nahulog ito ha ikatulo nga bahin han mga salog ngan han mga burabod han katubigan.
11 An ngaran han bitoon Mapait nga Tanom. Ngan nagpait an ikatulo nga bahin han katubigan, ngan nagkamatay an damu nga tawo kay nagin mapait an katubigan.
12 Ginpatunog han ikaupat nga anghel an iya trumpeta. Ngan nadaot an ikatulo nga bahin han adlaw ngan an ikatulo nga bahin han bulan ngan an ikatulo nga bahin han mga bitoon salit nagsirom an ikatulo nga bahin han tagsa hito, ngan nagdulom an ikatulo nga bahin han kaadlawon ngan han kagab-ihon.
13 Katapos, nakita ko an usa nga agila nga nalupad ha kabutngaan han langit ngan tuna ngan hinbatian ko nga nasiring ha daku nga tingog: “Kairo, kairo, kairo han mga naukoy ha tuna tungod han nahibibilin pa nga pagpatunog han mga trumpeta han tulo pa nga anghel nga hirani na magpatunog han ira mga trumpeta!”
