Pahayag 1:1-20
1 Ini an iginpahayag ni Jesu-Kristo nga iginhatag ha iya han Dios, basi ipakita ha iya mga uripon an mga butang nga hirani na gud mahitabo. Ginsugo niya an iya anghel ngan pinaagi hin mga simbolo iginpakita ito ha iya uripon nga hi Juan,
2 nga nagtestigo han pulong nga iginhatag han Dios ngan han pamatuod ni Jesu-Kristo, oo, han ngatanan nga iya nakita.
3 Malipayon an nagbabasa ha daku nga tingog ngan namamati han mga pulong hini nga tagna, ngan nagtutuman han mga iginsurat dida hini; kay hirani na an itinanda nga panahon.
4 Ako, hi Juan, nagsusurat ha pito nga kongregasyon ha distrito han Asia:
Makarawat unta niyo an diri-matupngan nga pagkabuotan ngan kamurayawan tikang ha “amo gihapon nga Dios yana ngan hadto ngan ha tidaraon,” ngan tikang ha pito nga espiritu ha atubangan han iya trono,
5 ngan tikang kan Jesu-Kristo, “an Matinumanon nga Saksi,” “An suhag tikang ha mga patay,” ngan “An Magmarando han mga hadi ha tuna.”
Ha iya nga nahigugma ha aton ngan nagtalwas ha aton tikang ha aton mga sala pinaagi han iya kalugaringon nga dugo—
6 ngan ginhimo kita niya nga usa nga ginhadian, mga saserdote han iya Dios ngan Amay—oo, magin iya unta an himaya ngan an gahum ha kadayonan. Amen.
7 Kitaa! Mapakanhi hiya upod han mga dampog, ngan an tagsa nga mata makakakita ha iya, upod na an mga nagbuno ha iya; ngan an ngatanan nga tribo ha tuna magpupukpok han ira dughan ha kasubo tungod ha iya. Oo, mahitatabo gud ini. Amen.
8 “Ako an Alpha ngan an Omega,”* siring ni Jehova nga Dios, “an amo gihapon nga Dios yana ngan hadto ngan ha tidaraon, an Makagarahum-ha-ngatanan.”
9 Ako hi Juan nga iyo bugto ngan igkasi-umarangbit ha kasakitan ngan ha ginhadian ngan ha pag-antos tungod ha pagin kaupod ni Jesus. Gindara ako ha isla nga tinatawag nga Patmos tungod han pagpahayag mahitungod han Dios ngan pagtestigo mahitungod kan Jesus.
10 Pinaagi han baraan nga espiritu gindara ako ngadto ha adlaw han Ginoo, ngan hinbatian ko ha akon luyo an makusog nga tingog nga pariho han tunog han trumpeta,
11 nga nasiring: “Isurat ha linukot nga basahon an imo nakikita ngan ipadara ito ha pito nga kongregasyon, ha Efeso, Smirna, Pergamo, Tiatira, Sardis, Filadelfia, ngan Laodicea.”
12 Liningi ako basi kitaon kon hin-o an nakikiistorya ha akon, ngan paglingi ko nakakita ako hin pito nga bulawan nga burutangan han lampara,
13 ngan ha butnga han burutangan han lampara may usa nga pariho han anak han tawo, nga an bado tubtob ha mga tiil ngan may bulawan nga paha nga iginsangbod ha iya dughan.
14 Dugang pa, an iya ulo ngan an iya buhok pariho kabusag han barahibo han karnero ngan han niebe, ngan an iya mga mata pariho hin nagdidilaab nga kalayo;
15 ngan an iya mga tiil pariho hin puro nga tumbaga* nga nag-iinggat ha hudno; ngan an iya tingog pariho hin haganas han damu nga katubigan.
16 Ha iya too nga kamot may pito nga bitoon, ngan ha iya baba may ginawas nga espada nga matarom, hilaba, ngan paluyoluyo an tarom, ngan an iya bayhon pariho hin sirak han adlaw ha kaudtuhon.
17 Han nakita ko hiya, natumba ako sugad hin patay ha iya tiilan.
Ngan igintungbaw niya ha akon an iya too nga kamot ngan nagsiring: “Ayaw kahadlok. Ako an Una ngan an Urhi,
18 ngan an usa nga buhi; ngan namatay ako, pero kitaa, buhi ako tubtob ha kadayonan, ngan aadi ha akon an mga yawi han kamatayon ngan Hades.*
19 Salit isurat an mga butang nga imo nakita, ngan an mga butang nga nahitatabo yana ngan an mga butang nga mahitatabo katapos hini.
20 Ini an kahulogan han sagrado nga tinago may kalabotan han pito nga bitoon nga imo nakita ha akon too nga kamot, ngan han pito nga bulawan nga burutangan han lampara: An pito nga bitoon nangangahulogan han mga anghel han pito nga kongregasyon, ngan an pito nga burutangan han lampara nangangahulogan hin pito nga kongregasyon.
Mga footnote
^ O “an A ngan an Z.” An Alpha ngan Omega amo an siyahan ngan kataposan nga mga letra han Griego nga alpabeto.
^ Ha English, copper.
^ Kitaa an Apendise 8.
