Pahayag 20:1-15
20 Katapos, nakita ko nga nalusad tikang ha langit an usa nga anghel nga may yawi han kahiladman ngan may ginkakaptan nga daku nga kadena.
2 Gindakop niya an dragon, an orihinal nga halas nga amo an Yawa ngan Satanas, ngan gin-gapos hiya hin 1,000 ka tuig.
3 Iginlabog hiya han anghel ngadto ha kahiladman ngan gintrangkahan ito ngan ginselyohan an bawbaw hito, basi diri na niya malimbongan an mga nasud tubtob nga matapos an 1,000 ka tuig. Katapos hito kinahanglan buhian hiya hin madaliay.
4 Ngan nakakita ako hin mga trono, ngan an nangangalingkod hito gintagan hin awtoridad ha paghukom. Oo, nakita ko an mga kalag nga ginpamatay* tungod han ira pagpamatuod mahitungod kan Jesus ngan pagyakan mahitungod han Dios. Waray hira magsingba ha mapintas nga hayop o ha imahen hito ngan waray magpamarka ha ira agtang ngan ha ira kamot. Ngan nabuhi hira ngan nagmando sugad nga mga hadi kaupod han Kristo ha sulod hin 1,000 ka tuig.
5 Ini an una nga pagkabanhaw. (An iba nga mga patay waray mabanhaw tubtob nga diri pa tapos an 1,000 ka tuig.)
6 Malipayon ngan baraan an bisan hin-o nga kaupod ha una nga pagkabanhaw, kay an ikaduha nga kamatayon waray awtoridad ha ira. Lugod, magigin mga saserdote hira han Dios ngan han Kristo, ngan magmamando hira sugad nga mga hadi kaupod niya ha sulod hin 1,000 ka tuig.
7 Kon matapos na an 1,000 ka tuig, bubuhian hi Satanas ha iya prisohan,
8 ngan magawas hiya basi limbongan an mga nasud ha upat nga eskina han tuna, an Gog ngan Magog, basi tirukon hira para ha girra. Pariho hira kadamu han mga baras ha dagat.
9 Sinulong hira ha bug-os nga tuna ngan ginpalibotan an kampo han mga baraan ngan an hinigugma nga syudad. Pero may kalayo nga inabot tikang ha langit ngan ginlamoy hira.
10 Ngan an Yawa nga naglilimbong ha ira iginlabog ngadto ha linaw nga kalayo ngan asupre, nga ginlabogan han mapintas nga hayop ngan han buwa nga propeta. Didto pasasakitan* hira ha adlaw ngan gab-i ha waray kataposan.
11 Katapos, nakita ko an usa nga daku ngan busag nga trono ngan an nalingkod hito. Pinalagiw tikang ha iya atubangan an tuna ngan an langit, ngan waray na hira hiagii.
12 Nakita ko an mga patay, an mga prominente ngan mga ubos, nga naninindog ha atubangan han trono, ngan may ginbuklad nga mga linukot nga basahon. Pero may usa pa nga linukot nga basahon nga ginbuklad; ito an basahon han kinabuhi. Ngan sumala ha nakasurat ha mga linukot nga basahon, ginhukman an mga patay uyon ha ira mga buhat.
13 Ngan iginhatag han dagat an mga patay nga aada hito, ngan iginhatag han kamatayon ngan Hades* an mga patay nga aada ha ira, ngan ginhukman an kada indibiduwal uyon ha ira mga buhat.
14 Ngan an kamatayon ngan Hades iginlabog ngadto ha linaw nga kalayo. An linaw nga kalayo nangangahulogan han ikaduha nga kamatayon.
15 Dugang pa, an bisan hin-o nga waray mahisurat ha libro han kinabuhi iginlabog ngadto ha linaw nga kalayo.
Mga footnote
^ Ha literal, “ginpamatay pinaagi han atsa.”
^ O “kontrolado; priso.” An noun han Griego nga pulong nangangahulogan nga mga paragpriso.—Kitaa an Mat 18:34.
^ Kitaa an Apendise 8.
