Pahayag 10:1-11
10 Nakita ko an usa pa nga makusog nga anghel nga nalusad tikang ha langit ngan napuputos hin dampog, ngan may balangaw ha iya ulo, ngan an iya nawong pariho han adlaw, ngan an iya mga tiil pariho hin mga harigi nga kalayo.
2 May ginkakaptan hiya nga gutiay nga basahon nga nakabuklad. Ngan an iya too nga tiil natamak ha dagat, pero an iya wala nga tiil natamak ha tuna,
3 ngan nagsinggit hiya pariho hin nauwang nga leon. Pagsinggit niya, nabatian an mga tingog han pito nga dalugdog.
4 Pagyakan han pito nga dalugdog, magsusurat na unta ako, pero nakabati ako hin tingog tikang ha langit nga nasiring: “Selyuhi an ginyakan han pito nga dalugdog, ngan ayaw ito isurat.”
5 Ngan an anghel nga akon nakita nga natindog ha dagat ngan ha tuna nag-alsa han iya too nga kamot ngadto ha langit,
6 ngan nanumpa hiya ha ngaran han Dios nga nabubuhi ha waray kataposan, nga naghimo han langit ngan han mga butang nga aada hito ngan han tuna ngan han mga butang nga aada hito ngan han dagat ngan han mga butang nga aada hito: “Diri na gud hiya maghuhulat pa;
7 pero ha panahon nga patunugon na han ikapito nga anghel an iya trumpeta, sigurado nga matutuman na an sagrado nga tinago han Dios nga iginpahayag sugad nga maopay nga sumat ha iya mismo uripon nga mga propeta.”
8 Katapos, an tingog tikang ha langit nga nakikiistorya ha akon hinbatian ko utro nga nasiring: “Sige, kuhaa an nakabuklad nga basahon nga aada ha kamot han anghel nga natindog ha dagat ngan ha tuna.”
9 Hinirani ako ha anghel ngan nagsiring ha iya nga ihatag ha akon an gutiay nga basahon. Ngan nagsiring hiya ha akon: “Kuhaa ini ngan kaona, ngan magigin mapait ini ha imo tiyan, pero ha imo baba magigin matam-is ini pariho hin dugos.”
10 Ngan ginkuha ko an gutiay nga basahon ha kamot han anghel ngan ginkaon ito. Ha akon baba nagin matam-is ito pariho hin dugos; pero han gintulon ko na nagin mapait ito ha akon tiyan.
11 Ngan ginsidngan ako: “Kinahanglan magtagna ka utro may kalabotan han katawohan, mga nasud, mga pinulongan, ngan han damu nga hadi.”
