Pahayag 11:1-19
11 Katapos, gintagan ako hin tangbo nga pariho hin tungkod* samtang nasiring hiya: “Buhát ngan sukla an santuaryo han templo han Dios, ngan an halaran, ngan an mga nagsisingba didto.
2 Pero ayaw na pagsukla an bungsaran ha gawas han santuaryo han templo, kay iginhatag ito ha mga nasud, ngan pagtatamakan nira an baraan nga syudad hin 42 ka bulan.
3 Ngan pagigiuson ko an akon duha nga saksi nga managna sulod hin 1,260 ka adlaw nga nakasul-ot hin sako nga panapton.”
4 Ginsisimbolohan hira han duha nga kahoy nga olibo ngan han duha nga burutangan han lampara, ngan natindog hira ha atubangan han Ginoo han tuna.
5 Kon may bisan hin-o nga karuyag magdaot ha ira, nagawas ha ira baba an kalayo ngan ginlalamoy an ira mga kaaway. Ha sugad hito nga paagi papatayon an bisan hin-o nga karuyag magdaot ha ira.
6 May awtoridad hira nga sadhan an langit basi diri umuran ha panahon han ira panagna, ngan may awtoridad hira nga himoon nga dugo an katubigan ngan magpadapat ha tuna han ngatanan nga klase hin peste sugad kaagsob han ira karuyag.
7 Katapos nira magpamatuod, an mapintas nga hayop nga nagawas tikang ha kahiladman makikig-away ha ira, ngan pipirdihon hira ngan papatayon.
8 Ngan an ira patay nga lawas makikita ha haluag nga kalye han daku nga syudad nga ha espirituwal nga kahulogan gintatawag nga Sodoma ngan Ehipto, diin iginraysang ha kahoy an ira Ginoo.
9 Ngan tikang ha mga katawohan, mga tribo, mga pinulongan, ngan mga nasud, may mga magkikita han ira patay nga lawas ha sulod hin tulo ngan tunga ka adlaw, ngan diri hira matugot nga iglubong ha lubnganan an ira patay nga lawas.
10 An mga naukoy ha tuna nalilipay tungod ha ira ngan nagsiselebrar, ngan magpapadara hira ha usa kag usa hin mga regalo, kay an mga naukoy ha tuna ginpasakitan hito nga duha nga propeta.
11 Katapos han tulo ngan tunga ka adlaw, an espiritu han kinabuhi tikang ha Dios sinulod ha ira, ngan nanindog hira, salit nahadlok gud an mga nakakita ha ira.
12 Ngan nakabati hira hin daku nga tingog tikang ha langit nga nasiring ha ira: “Saka kamo ngadi.” Salit sinaka hira ha langit ha sulod han dampog, ngan nakita hira han ira mga kaaway.
13 Hito nga oras nagkaada daku nga linog, ngan narumpag an ikanapulo nga bahin han syudad; ngan 7,000 ka tawo an namatay tungod han linog, ngan an nanhibilin nahadlok gud ngan naghimaya ha Dios han langit.
14 Natapos na an ikaduha nga pagpahayag han kairo. Kitaa! Madagmit nga naabot an ikatulo nga pagpahayag han kairo.
15 Ginpatunog han ikapito nga anghel an iya trumpeta. Ngan nagkaada makusog nga mga tingog ha langit nga nasiring: “An ginhadian han kalibotan nagin Ginhadian han aton Ginoo ngan han iya Kristo, ngan maghahadi hiya ha waray kataposan.”
16 Katapos, an 24 nga tigurang nga nalingkod ha ira trono ha atubangan han Dios nanyukbo ngan nagsingba ha Dios,
17 nga nasiring: “Nagpapasalamat kami ha imo, Jehova nga Dios nga Makagarahum-ha-ngatanan, an amo gihapon nga Dios yana ngan hadto, kay gin-gamit mo an imo daku nga gahum ngan nagtikang ka pagmando sugad nga hadi.
18 Pero nangalas gud an mga nasud, ngan inabot an imo mismo kangalas. Ngan inabot an itinanda nga panahon ha paghukom ha mga patay, ha pagbalos ha imo surugoon nga mga propeta pati ha mga baraan nga nahahadlok ha imo ngaran, ha mga ubos ngan ha mga prominente, ngan ha pagbungkag ha mga nagbubungkag han tuna.”
19 Katapos, naabrihan an santuaryo han templo han Dios ha langit, ngan nakita ha santuaryo han templo an iya arka han kasabotan. Ngan nagkaada mga kidlat, mga tingog, mga dalugdog, linog, ngan inuran hin dagku nga yelo.
Mga footnote
^ O “pansukol nga tungkod.”
