Pahayag 4:1-11
4 Katapos hito, nakakita ako hin abrido nga purtahan ha langit. Ngan an siyahan nga tingog nga akon nabatian pariho hin tunog han trumpeta, ngan nagsiring ha akon: “Saka ngadi, ngan ipapakita ko ha imo an mga butang nga kinahanglan mahitabo.”
2 Kahuman hito, nahiilarom dayon ako han gahum han espiritu: ngan kitaa, may trono ha langit, ngan may nalingkod hito nga trono.
3 Ngan an nalingkod hito pariho pagkit-on hin bato nga haspe ngan hin presyoso nga pula* nga bato, ngan ha palibot han trono may balangaw nga pariho pagkit-on hin esmeralda.
4 An trono napapalibotan hin 24 nga trono, ngan hito nga mga trono nakita ko nga nalingkod an 24 nga tigurang nga nakasul-ot hin busag nga pantungbaw nga mga panapton, ngan an ira ulo may bulawan nga korona.
5 Ngan tikang ha trono nagawas an mga kidlat ngan mga tingog ngan mga dalugdog; ngan may pito nga dagku nga lampara nga naglalaga ha atubangan han trono, ngan nangangahulogan ini han pito nga espiritu han Dios.
6 Ha atubangan han trono may sugad hin dagat nga pariho hin salaming, nga sugad hin kristal.
Ha butnga nahimumutang an trono, ngan ha palibot han trono may upat nga kerubin* nga puno hin mga mata ha atubangan ngan ha likod.
7 An una nga kerubin pariho hin leon, an ikaduha nga kerubin pariho hin nati nga baka nga lalakí, an ikatulo nga kerubin pariho hin tawo an nawong, ngan an ikaupat nga kerubin pariho hin agila nga nalupad.
8 An tagsa han upat nga kerubin may unom nga pako nga puno hin mga mata. Ngan ha adlaw ngan gab-i padayon hira nga nasiring: “Baraan, baraan, baraan hi Jehova nga Dios, an Makagarahum-ha-ngatanan, an amo gihapon nga Dios hadto ngan yana ngan ha tidaraon.”
9 Kon an mga kerubin naghahatag hin himaya, dungog, ngan pasalamat ha Dios nga nalingkod ha trono ngan nabubuhi ha waray kataposan,
10 an 24 nga tigurang nayukbo ha atubangan han Dios nga nalingkod ha trono ngan nagsisingba ha Iya nga nabubuhi ha waray kataposan, ngan ira gin-iitsa an ira mga korona ha atubangan han trono, nga nasiring:
11 “Jehova nga amon Dios, takos ka ha pagkarawat han himaya, dungog, ngan gahum, kay ikaw an naghimo han ngatanan nga butang, ngan tungod han imo kaburut-on ineksister hira ngan ginpanhimo.”
