Pahayag 19:1-21
19 Katapos hito, nakabati ako hin sugad hin makusog nga tingog han daku nga grupo ha langit. Nagsiring hira: “Dayawa niyo hi Jah!* An katalwasan, an himaya, ngan an gahum kanan aton Dios,
2 kay masasarigan ngan matadong an iya mga paghukom. Ginhukman niya an gamhanan nga puta nga naglimbong han tuna pinaagi han iya imoralidad.* Ngan binulos an Dios tungod han dugo han iya mga uripon nga nakada ha kamot han puta.”
3 Ha ikaduha nga higayon nagsiring dayon hira: “Dayawa niyo hi Jah! Ngan an asó tikang ha iya* nagpapadayon ha waray kataposan.”
4 Ngan an 24 nga tigurang ngan an upat nga kerubin yinukbo ngan nagsingba ha Dios nga nalingkod ha trono, ngan hira nagsiring: “Amen! Dayawa niyo hi Jah!”
5 May tingog liwat tikang ha trono nga nagsiring: “Dayawa an aton Dios, ngatanan kamo nga iya uripon nga nahahadlok ha iya, an mga ubos ngan mga prominente.”
6 Katapos, nakabati ako hin sugad hin tingog han daku nga grupo ngan sugad hin haganas han damu nga katubigan ngan pariho hin makusog nga mga dalugdog. Nagsiring hira: “Dayawa niyo hi Jah, kay hi Jehova nga aton Dios nga Makagarahum-ha-ngatanan nagtikang na paghadi.
7 Magkalipay kita ngan magrayhak ngan maghimaya ha iya, kay inabot na an kasal han Kordero ngan an iya maarasawa andam na.
8 Oo, gintugotan hiya nga magsul-ot hin bado nga mainggat, limpyo, ngan maopay an klase han tela, kay an maopay nga klase hin tela nagsisimbolo han matadong nga mga buhat han mga baraan.”
9 Ngan nagsiring hiya ha akon: “Isurat ini: Malipayon an mga gin-imbitar ha panihapon ha kasal han Kordero.” Nagsiring liwat hiya ha akon: “Ini an masasarigan nga mga pulong han Dios.”
10 Salit yinukbo ako ha iya tiilan basi magsingba ha iya. Pero nagsiring hiya ha akon: “Ayaw pagbuhat hito! Igkasi-uripon mo la ako ngan han imo kabugtoan nga nagpapamatuod mahitungod kan Jesus. Singbaha an Dios, kay an pagpamatuod mahitungod kan Jesus amo an katuyoan han tagna.”
11 Katapos, nakita ko nga naabrihan an langit. Kitaa! usa nga busag nga kabayo, ngan an nasakay hito gintatawag nga Matinumanon ngan Totoo. Naghuhukom hiya ngan nakikiggirra uyon ha katadongan.
12 An iya mga mata sugad hin naglalaga nga kalayo, ngan may damu nga korona* ha iya ulo. May nakasurat ha iya nga ngaran nga waray iba nga maaram han kahulogan kondi hiya la,
13 ngan an iya sul-ot nga pantungbaw nga panapton may mga tapsik han dugo, ngan ginngaranan hiya nga, An Pulong han Dios.
14 Ngan an kasundalohan ha langit nga nakasakay ha busag nga mga kabayo nagsinunod ha iya, ngan an ira sul-ot nga bado busag, limpyo, ngan maopay an klase han tela.
15 Ha iya baba nagawas an matarom ngan hilaba nga espada nga gagamiton niya ha pag-atake ha mga nasud. Mamandoan niya hira gamit an tungkod nga puthaw. Sugad man, iya tatamaktamakan an purog-an han ubas han duro nga kasina han Dios nga Makagarahum-ha-ngatanan.
16 Ngan ha iya pantungbaw nga panapton, oo, dapit ha iya paa, nakasurat an ngaran nga Hadi han mga hadi ngan Ginoo han mga ginoo.
17 Nakita ko liwat an usa nga anghel nga natindog ha adlaw,* ngan ginuliat hiya ngan nagsiring ha ngatanan nga tamsi nga nagkakalupad ha kabutngaan han langit ngan tuna: “Kadi, pagkatirok kamo para ha daku nga panihapon han Dios,
18 basi niyo kaunon an unod han mga hadi, an unod han mga kumander ha militar, an unod han magkusog nga kalalakin-an, an unod han mga kabayo ngan han mga sakay hito, an unod han ngatanan, han mga tawo nga may kagawasan sugad man han mga uripon, ngan han mga ubos ngan mga prominente.”
19 Katapos, nakita ko an mapintas nga hayop ngan an mga hadi ha tuna ngan an ira kasundalohan nga nagkatirok basi makiggirra ha iya nga nasakay ha kabayo ngan ha iya kasundalohan.
20 Ngan nadakop an mapintas nga hayop pati an buwa nga propeta nga nagbuhat ha atubangan hito hin mga tigaman nga iya gin-gamit ha paglimbong ha mga may marka han mapintas nga hayop ngan ha mga nagsisingba ha imahen hito. Samtang buhi pa, iginlabog hira nga duha ha linaw nga kalayo nga nagdidilaab tungod han asupre.
21 Pero an iba ginpamatay pinaagi han hilaba nga espada nga ginawas tikang ha baba han usa nga nasakay ha kabayo. Ngan an ngatanan nga tamsi nabusog han ira mga unod.
Mga footnote
^ O “Hallelujah.” An Jah amo an ginpahalipot nga ngaran ni Jehova.
^ Kitaa an footnote ha Mat 5:32.
^ Karuyag sidngon, tikang ha Babilonya.
^ Kitaa an footnote ha Pah 12:3.
^ O “sudang.”
