Pahayag 17:1-18
17 Katapos inabot an usa han pito nga anghel nga may pito nga yahong ngan nagsiring ha akon: “Kadi, ipapakita ko ha imo an paghukom ha gamhanan nga puta nga nalingkod ha damu nga katubigan,
2 nga an mga hadi ha tuna nagkaada imoral nga relasyon ha iya, ngan an mga umurukoy ha tuna ginhubog han bino han iya imoralidad.”*
3 Pinaagi han gahum han espiritu gindara ako han anghel ngadto ha kamingawan. Ngan nakita ko an usa nga babaye nga nasakay ha pula nga mapintas nga hayop nga puno hin nagpapasipara nga mga ngaran ngan may pito nga ulo ngan napulo nga sungay.
4 An babaye may sul-ot nga purpura* ngan pula nga bado, mga alahas nga bulawan, ngan marahalon nga bato ngan mga perlas, ngan may ginkakaptan hiya nga bulawan nga kopa nga puno hin mangil-ad ngan mahugaw nga mga butang han iya imoralidad.
5 Ha iya agtang may nakasurat nga ngaran, usa nga misteryo: “Babilonya nga Gamhanan, an iroy han mga puta ngan han mangil-ad nga mga butang ha tuna.”
6 Ngan nakita ko nga an babaye hubog han dugo han mga baraan ngan han dugo han mga testigo ni Jesus.
Nahipausa gud ako han pakakita ko ha iya.
7 Ngan an anghel nagsiring ha akon: “Kay ano nga nahipausa ka? Isusumat ko ha imo an misteryo mahitungod han babaye ngan han iya ginsasakyan nga mapintas nga hayop nga may pito nga ulo ngan napulo nga sungay:
8 An mapintas nga hayop nga imo nakita nakanhi hadto, pero waray na yana, kondi diri mag-iiha magawas ito tikang ha kahiladman, katapos bubungkagon ito. Ngan an mga umurukoy ha tuna—nga an mga ngaran waray mahisurat ha basahon han kinabuhi tikang pa ha tinikangan han kalibotan—mahipapausa kon makita nira an mapintas nga hayop nga nakanhi hadto, pero waray na yana, kondi makanhi utro.
9 “Nagkikinahanglan ini hin hunahuna nga may kinaadman: An pito nga ulo nangangahulogan hin pito nga bukid nga ha bawbaw hito nalingkod an babaye.
10 Ngan may pito nga hadi: an lima nahulog na, an usa nagmamando yana, an usa waray pa umabot, pero pag-abot niya diri hiya mag-iiha.
11 Ngan an mapintas nga hayop nga nakanhi hadto pero waray na yana, ito liwat an ikawalo nga hadi, kondi tikang ito ha pito, ngan mabubungkag ito.
12 “An napulo nga sungay nga imo nakita nangangahulogan hin napulo nga hadi nga waray pa makakarawat hin ginhadian, pero makarawat hira hin awtoridad sugad nga mga hadi ha sulod hin usa ka oras upod han mapintas nga hayop.
13 Nagkakaurosa an ira hunahuna, salit ira iginhahatag ha mapintas nga hayop an ira gahum ngan awtoridad.
14 Makikig-away hira ha Kordero, pero tungod kay hiya an Ginoo han mga ginoo ngan Hadi han mga hadi, pipirdihon hira han Kordero. Ito liwat an bubuhaton han iya mga kaupod nga tinawag ngan pinili ngan matinumanon.”
15 Katapos nagsiring hiya ha akon: “An katubigan nga imo nakita nga ginlilingkoran han puta, nangangahulogan hin mga katawohan, mga grupo hin mga tawo, mga nasud, ngan mga pinulongan.
16 Ngan an napulo nga sungay nga imo nakita, ngan an mapintas nga hayop, masisina gud ha puta ngan pagtitikasan ngan paghuhuboan hiya, kakaunon an iya unod ngan bug-os nga susunugon hiya ha kalayo.
17 Kay iginbutang ito han Dios ha ira kasingkasing basi matuman an iya panhunahuna, oo, basi matuman an ira nagkakaurosa nga panhunahuna nga ihatag ha mapintas nga hayop an ira ginhadian, tubtob nga matuman an mga pulong han Dios.
18 Ngan an babaye nga imo nakita nagsisimbolo han daku nga syudad nga may ginhadian nga nakakasakop ha mga hadi han tuna.”
