Pahayag 14:1-20
14 Katapos, nakita ko an Kordero nga natindog ha Bukid Sion, ngan kaupod niya an 144,000 nga may nakasurat ha ira agtang nga iya ngaran ngan ngaran han iya Amay.
2 Ngan nakabati ako hin tunog tikang ha langit nga pariho hin haganas han damu nga katubigan ngan pariho hin tunog han makusog nga dalugdog; ngan an tunog nga akon hinbatian pariho han kanan mga magkaranta nga nagkakanta samtang nagpapatunog han ira mga arpa.
3 Baga hin bag-o nga kanta an ira ginkakanta ha atubangan han trono ngan ha atubangan han upat nga kerubin ngan han mga tigurang; ngan waray iba nga maaram hito nga kanta labot la han 144,000 nga ginpalit tikang ha tuna.
4 Ini hira an waray maghugaw han ira kalugaringon pinaagi hin mga babaye; ha pagkamatuod, pariho hira hin mga birhen. Hira an padayon nga nasunod ha Kordero bisan diin hiya kumadto. Hira an ginpalit tikang ha katawohan sugad nga una nga mga bunga ngadto ha Dios ngan ha Kordero,
5 ngan waray kabuwaan dida ha ira baba; waray hira hugaw.
6 Nakakita ako hin usa pa nga anghel nga nalupad ha kabutngaan han langit ngan tuna, ngan may maopay nga sumat hiya nga ipapasamwak ha mga naukoy ha tuna, ha tagsa nga nasud, tribo, pinulongan, ngan katawohan,
7 nga nasiring ha daku nga tingog: “Kahadluki niyo an Dios ngan himayaa hiya, kay inabot na an oras han iya paghukom, salit singbaha an Dios nga naghimo han langit ngan han tuna, han dagat ngan han mga burabod han tubig.”
8 Sinunod an ikaduha nga anghel nga nasiring: “Narumpag na hiya! An Babilonya nga Gamhanan narumpag na, hiya nga nagpainom han ngatanan nga nasud han bino han makusog nga hingyap* han iya imoralidad!”*
9 Ngan sinunod ha ira an ikatulo nga anghel nga nasiring ha daku nga tingog: “Kon may bisan hin-o nga nagsisingba ha mapintas nga hayop ngan ha imahen hito, ngan nagpapamarka ha iya agtang o ha iya kamot,
10 mainom liwat hiya han waray-salakot nga bino han kasina han Dios nga igin-ipis ha kopa han iya kangalas, ngan pasasakitan hiya ha kalayo ngan asupre ha atubangan han baraan nga mga anghel ngan han Kordero.
11 Ngan an asó han pagpasakit ha ira nagpapadayon ha waray kataposan, ngan waray kapahuwayan ha adlaw ngan gab-i an mga nagsisingba ha mapintas nga hayop ngan ha imahen hito ngan an bisan hin-o nga nagpapamarka han ngaran hito.
12 Kinahanglan magpailob an mga baraan nga nagtutuman han mga sugo han Dios ngan marig-on nga natoo kan Jesus.”
13 Katapos, nakabati ako hin tingog tikang ha langit nga nasiring: “Isurat ini: Malipayon an mga namamatay tikang yana nga kahiusa han Ginoo. Oo, siring han espiritu, papahuwaya hira ha ira buruhaton, kay diri nangangalimtan an ira mga ginbuhat.”
14 Ngan may nakita ako nga busag nga dampog, ngan nalingkod dida ha dampog an usa nga pariho hin anak han tawo, nga may bulawan nga korona ha iya ulo ngan matarom nga garab ha iya kamot.
15 Ngan usa pa nga anghel an ginawas tikang ha santuaryo han templo, nga nasiring ha daku nga tingog ha usa nga nalingkod ha dampog: “Gamita an imo garab ngan pag-ani, kay oras na han pag-ani, kay hinog na gud an aranihon ha tuna.”
16 Ngan iginlabyog han nalingkod ha dampog an iya garab ngada ha tuna, ngan gin-ani an mga aranihon ha tuna.
17 Katapos, usa pa nga anghel an ginawas tikang ha santuaryo han templo ha langit; may-ada liwat hiya matarom nga garab.
18 Usa pa nga anghel an ginawas tikang ha halaran, ngan may awtoridad hiya ha kalayo. Ginuliat hiya ha anghel nga may matarom nga garab: “Gamita an imo garab ngan tiroka an mga urapong han ubas ha tuna, kay hinog na an mga bunga hito.”
19 Salit iginlabyog han anghel an iya garab ngada ha tuna ngan gintirok an mga ubas ha tuna, ngan iya iginlabog ito ha daku nga purog-an han kasina han Dios.
20 Ngan an purog-an han ubas gintamak-tamakan ha gawas han syudad, ngan an dugo nga nag-awas tikang ha purog-an inabot tubtob ha mga renda han kakabayohan, ha kahirayo nga mga 300 ka kilometro.*
Mga footnote
^ Ha literal, “kasina.”
^ Kitaa an footnote ha Mat 5:32.
^ O “haros 200 ka milya.” Ha literal, “1,600 ka stadia.” An usa ka stadion mga 600 ka piye (190 ka metros).
