Pahayag 5:1-14
5 Nakita ko ha too nga kamot han Dios nga nalingkod ha trono an usa nga linukot nga basahon nga may surat ha paluyoluyo, nga ginselyohan hin maopay hin pito nga selyo.
2 Ngan nakita ko an usa nga makusog nga anghel nga nagpapahibaro ha daku nga tingog: “Hin-o an takos magbuklad han linukot nga basahon ngan magtangtang han mga selyo hito?”
3 Pero waray bisan hin-o ha langit o ha tuna o ha ilarom han tuna an nakabuklad han linukot nga basahon o nakakita han sulod hito.
4 Tungod kay waray bisan hin-o nga takos magbuklad han linukot nga basahon o makakita han sulod hito, nagtinangis gud ako.
5 Pero an usa han mga tigurang nagsiring ha akon: “Ayaw na pagtinangis. Kitaa! An Leon ha tribo ni Juda, an gamot ni David, nagdaog ha pakig-away salit takos hiya magbuklad han linukot nga basahon ngan magtangtang han pito nga selyo hito.”
6 Ha butnga han hinmumutangan han trono ngan han upat nga kerubin ngan ha butnga han mga tigurang, nakita ko an usa nga kordero* nga natindog nga baga hin ginpatay, nga may pito nga sungay ngan pito nga mata. An pito nga mata hito nangangahulogan han pito nga espiritu han Dios nga ginpakanhi ha bug-os nga tuna.
7 Ngan an Kordero kinadto ngan ginkuha dayon an linukot nga basahon ha too nga kamot han Dios nga nalingkod ha trono.
8 Pagkuhaa niya han linukot nga basahon, an upat nga kerubin ngan an 24 nga tigurang yinukbo ha atubangan han Kordero, ngan an tagsa ha ira may arpa ngan bulawan nga yahong nga puno han insenso. (An insenso nangangahulogan han mga pag-ampo han mga baraan.)
9 Ngan nagkanta hira hin bag-o nga kanta, nga nasiring: “Takos ka ha pagkuha han linukot nga basahon ngan pagtangtang han mga selyo hito, kay ginpatay ka ngan pinaagi han imo dugo pumalit ka hin mga tawo para ha Dios tikang ha tagsa nga tribo, pinulongan, katawohan, ngan nasud,
10 ngan imo hira ginhimo nga usa nga ginhadian ngan mga saserdote han aton Dios, ngan magmamando hira sugad nga mga hadi ha bug-os nga tuna.”
11 Nakita ko ngan hinbatian an tingog han damu nga anghel ha palibot han trono ngan han mga kerubin ngan han mga tigurang, ngan an ira kadamu yinukot-yukot ka yinukot-yukot* ngan yinukot ka yinukot,
12 ngan nagsiniring hira ha daku nga tingog: “An Kordero nga ginpatay takos ha pagkarawat han gahum, karikohan, kinaadman, kusog, dungog, himaya, ngan pagdayaw.”
13 Hinbatian ko an tagsa nga hinimo han Dios ha langit, ha tuna, ha ilarom han tuna, ngan ha dagat, ngan an ngatanan nga aada hito nga nasiring: “Makarawat unta han Dios nga nalingkod ha trono ngan han Kordero an pagdayaw, dungog, himaya, ngan gahum ha kadayonan.”
14 Ngan an upat nga kerubin nagsiniring: “Amen!” ngan an mga tigurang yinukbo ngan nagsingba.
Mga footnote
^ O “nati nga karnero.”
^ O “napuplo ka yinukot nga ginmultiplikar hin napuplo ka yinukot ka beses.”
