Pahayag 15:1-8
15 Katapos, nakita ko ha langit an usa pa nga tigaman nga daku ngan urusahon, pito nga anghel nga may dara nga pito nga peste. Ini an kataposan nga mga peste, kay pinaagi hini matatapos an kasina han Dios.
2 Ngan nakakita ako hin dagat nga pariho hin salaming nga may salakot nga kalayo, ngan nakita ko an mga nagdadaog kontra ha mapintas nga hayop ngan ha imahen hito ngan ha numero han ngaran hito. Natindog hira hirani ha dagat nga pariho hin salaming, ngan may ginkakaptan nga mga arpa han Dios.
3 Nagkakanta hira han kanta ni Moises nga uripon han Dios, ngan han kanta han Kordero:
“Dagku ngan urusahon an imo mga buhat, Jehova nga Dios nga Makagarahum-ha-ngatanan. Matadong ngan masasarigan an imo mga paagi, Hadi ha kadayonan.
4 Hin-o an diri mahahadlok ha imo, Jehova, ngan maghihimaya han imo ngaran? Kay ikaw la an maunungon! An ngatanan nga nasud makanhi ngan magsisingba ha imo atubangan, kay an imo matadong nga kasugoanan iginpahayag na.”
5 Katapos hito, nakita ko nga gin-abrihan ha langit an santuaryo han tolda han pamatuod,
6 ngan ginawas ha santuaryo an pito nga anghel nga may dara nga pito nga peste. An ira bado malimpyo ngan mainggat, ngan may bulawan nga paha nga iginsangbod ha ira dughan.
7 Ngan an usa han upat nga kerubin naghatag ha pito nga anghel hin pito nga bulawan nga yahong nga puno han kasina han Dios, nga nabubuhi ha waray kataposan.
8 Ngan an santuaryo napuno hin asó tungod han himaya han Dios ngan tungod han iya gahum, ngan waray nakasulod ha santuaryo tubtob nga natapos an pito nga peste han pito nga anghel.
