Pahayag 13:1-18
13 Nagtinindog ito* nga waray kiwa-kiwa ha baras han dagat.
Ngan nakita ko an usa nga mapintas nga hayop nga nahaw-as ha dagat, nga may napulo nga sungay ngan pito nga ulo, ngan ha mga sungay hito may napulo nga korona,* pero an mga ulo hito may mga ngaran nga nagpapasipara.
2 Ini nga mapintas nga hayop nga akon nakita pariho hin leopardo, pero an mga tiil hito pariho hin kanan oso, ngan an baba hito pariho hin kanan leon. Ngan an mapintas nga hayop gintagan han dragon hin gahum pati trono ngan daku nga awtoridad.
3 Katapos nakita ko nga an usa han mga ulo hito gintigbas nga puydi ikamatay. Pero bisan kon grabe ito nga samad, nag-opay ito. Ngan an bug-os nga tuna nagdayaw ha mapintas nga hayop ngan nagsunod hito.
4 Ira ginsingba an dragon kay gintagan hito hin awtoridad an mapintas nga hayop, ngan an mapintas nga hayop ira ginsingba nga nasiring: “Hin-o an pariho ha mapintas nga hayop, ngan hin-o an makakahimo pakig-away hito?”
5 Ngan gintagan ito hin baba nga nagyayakan hin dagku nga butang ngan mga pagpasipara, ngan gintagan ito hin awtoridad nga magbuhat ha sulod hin 42 ka bulan.
6 Ngan nagyakan ito hin mga pagpasipara kontra ha Dios, basi pasiparahan an iya ngaran ngan an iya urukyan, ngan an mga naukoy ha langit.
7 Gintugotan ito nga makiggirra ha mga baraan ngan pirdihon hira, ngan gintagan ito hin awtoridad ha tagsa nga tribo, katawohan, pinulongan, ngan nasud.
8 Ngan sisingbahon ito han ngatanan nga naukoy ha tuna. Tikang pa ha tinikangan han kalibotan, bisan usa ha ira waray mahisurat an ngaran ha basahon han kinabuhi han Kordero nga ginpatay.
9 An may talinga sadang mamati.
10 Kon may bisan hin-o nga kinahanglan bihagon, mabibihag hiya. Kon may bisan hin-o nga magpatay pinaagi hin espada, kinahanglan patayon hiya pinaagi hin espada. Nagkikinahanglan ini hin pagpailob ngan pagtoo han mga baraan.
11 Katapos, nakita ko an usa pa nga mapintas nga hayop nga nagawas tikang ha tuna, ngan may duha ito nga sungay pariho hin nati nga karnero, pero nagtikang ito pagyakan pariho hin dragon.
12 Ngan ginagamit hito an ngatanan nga awtoridad han una nga mapintas nga hayop ha atubangan hito. Ngan an tuna pati an mga umurukoy ha tuna ginpapasingba hito ha una nga mapintas nga hayop, nga may grabe nga samad nga nag-opay.
13 Nagbubuhat ito hin dagku nga tigaman, nakakapahulog pa ngani hin kalayo tikang ha langit nganhi ha tuna ha atubangan han katawohan.
14 Ginlilimbongan hito an mga umurukoy ha tuna, tungod han mga tigaman nga igintugot nga buhaton hito ha atubangan han mapintas nga hayop, samtang ginsisidngan hito an mga umurukoy ha tuna nga maghimo hin imahen han mapintas nga hayop nga may tinigbasan han espada pero nabuhi pa.
15 Gintugotan ito nga maghatag hin gininhawa ha imahen han mapintas nga hayop, basi an imahen han mapintas nga hayop makayakan ngan maipapatay an mga nadiri pagsingba ha imahen han mapintas nga hayop.
16 Ngan ginpipirit hito an ngatanan nga tawo, an mga ubos ngan mga prominente, an mga riko ngan mga pobre, an mga may kagawasan ngan mga uripon, nga markahan an ira too nga kamot o an ira agtang,
17 ngan waray bisan hin-o nga makakapalit o makakagbaligya labot la kon may marka hiya han ngaran han mapintas nga hayop o han numero han ngaran hito.
18 Nagkikinahanglan ini hin kinaadman: Sadang kwentahon han may hilarom nga pagsabot* an numero han mapintas nga hayop, kay numero ito hin tawo; ngan an numero hito 666.
Mga footnote
^ Karuyag sidngon, an dragon.
^ Kitaa an footnote ha Pah 12:3.
^ Ha literal, “hunahuna,” ha Griego nous.
