Pahayag 7:1-17
7 Katapos hito, nakakita ako hin upat nga anghel nga naninindog ha upat nga eskina han tuna. Ginpupugngan nira an upat nga hanginan han tuna basi waray hangin nga humuyop ha tuna o ha dagat o ha bisan ano nga kahoy.
2 Ngan nakita ko an usa pa nga anghel nga nasaka tikang ha sinirangan nga may selyo han buhi nga Dios; ngan nagsiring hiya ha daku nga tingog ha upat nga anghel nga gintagan hin awtoridad ha pagdaot han tuna ngan dagat:
3 “Ayaw pagdaota an tuna o an dagat o an mga kahoy, tubtob nga matapos namon an pagmarka ha agtang han mga uripon han aton Dios.”
4 Katapos, hinbatian ko nga an kadamu han mga ginmarkahan 144,000, tikang ha tagsa nga tribo han mga anak ni Israel:
5 Tikang ha tribo ni Juda 12,000 an ginmarkahan;tikang ha tribo ni Ruben 12,000;tikang ha tribo ni Gad 12,000;
6 tikang ha tribo ni Aser 12,000;tikang ha tribo ni Neptali 12,000;tikang ha tribo ni Manases 12,000;
7 tikang ha tribo ni Simeon 12,000;tikang ha tribo ni Levi 12,000;tikang ha tribo ni Isacar 12,000;
8 tikang ha tribo ni Sebulon 12,000;tikang ha tribo ni Jose 12,000;ngan tikang ha tribo ni Benjamin 12,000 an ginmarkahan.
9 Katapos hito akon nakita an daku nga grupo, nga waray bisan hin-o an nakaihap, tikang ha ngatanan nga nasud, tribo, katawohan, ngan pinulongan. Natindog hira ha atubangan han trono ngan ha atubangan han Kordero, ngan nakasul-ot hira hin hilaba ngan busag nga bado; may dara hira nga mga dahon han palma.
10 Ngan padayon hira nga nasiring ha daku nga tingog: “An katalwasan utang naton ha aton Dios, nga nalingkod ha trono, ngan ha Kordero.”
11 Natindog ha palibot han trono an ngatanan nga anghel, an mga tigurang, ngan an upat nga kerubin, ngan yinukbo hira ha atubangan han trono ngan nagsingba ha Dios,
12 nga nasiring: “Amen! Dios namon, takos ka han pagdayaw, himaya, kinaadman, pagpasalamat, dungog, gahum, ngan kusog ha kadayonan. Amen.”
13 Ngan usa han mga tigurang an nagsiring ha akon: “Ito nga mga nakasul-ot hin hilaba ngan busag nga bado, hin-o hira ngan diin hira tikang?”
14 Binaton dayon ako ha iya: “Ginoo ko, ikaw an maaram.” Ngan nagsiring hiya: “Hira an nakatalwas ha daku nga kasakitan, ngan ira ginlabhan an ira hilaba nga bado ngan ginpabusag ito ha dugo han Kordero.
15 Amo nga aada hira ha atubangan han trono han Dios; ngan nagbubuhat hira hin sagrado nga pag-alagad ha iya ha adlaw ngan gab-i ha iya templo. Ngan an Dios nga nalingkod ha trono magbubuklad hin tolda para ha ira.
16 Diri na gud hira gugutumon ngan uuhawon, diri na liwat hira mag-aantos han malanit nga kapaso han adlaw o hin bisan ano nga sobra nga kapaso,
17 kay an Kordero nga aada hirani ha trono mag-aataman* ha ira ngan maggigiya ha ira ngadto ha mga burabod han tubig han kinabuhi. Ngan papahiron han Dios an mga luha ha ira mga mata.”
Mga footnote
^ Kitaa an “Paraataman” ha Glossary.
