Pahayag 12:1-17
12 Katapos, may nakita ha langit nga daku nga tigaman, usa nga babaye nga napapanaptonan han adlaw, ngan an bulan nakada ha ilarom han iya mga tiil, ngan nakakorona hiya hin 12 nga bitoon,
2 ngan burod hiya. Naguliat hiya tungod han kaul-ol ngan sobra nga kasakit ha pagpanganak.
3 Usa pa nga tigaman an nakita ha langit. Kitaa! May daku nga dragon nga pula an kolor, nga may pito nga ulo ngan napulo nga sungay ngan an pito nga ulo hito may korona.*
4 Ngan gindadanas han ikog hito an ikatulo nga bahin han mga bitoon ha langit, ngan ginhulog hito ha tuna an mga bitoon. Ngan an dragon padayon nga nagtinindog ha atubangan han babaye nga tipag-aranak na, basi pag-anak niya, malamoy hito an bata.
5 Ngan nag-anak hiya hin bata nga lalaki, usa nga lalaki, nga magmamando han ngatanan nga nasud gamit an tungkod nga puthaw. Ngan an iya anak gin-agaw ngadto ha Dios ngan ha iya trono.
6 Katapos, an babaye pinalagiw ngadto ha kamingawan, diin may lugar nga igin-andam an Dios para ha iya, ngan ira pakakaunon hiya didto ha sulod hin 1,260 ka adlaw.
7 Katapos, nagkaada girra ha langit: Hi Miguel ngan an iya mga anghel nakig-away ha dragon, ngan an dragon ngan an mga anghel hito nakig-away ha ira.
8 Pero waray ito magdaog,* ngan waray na lugar para ha ira didto ha langit.
9 Salit iginlabog an daku nga dragon, an orihinal nga halas, an gintatawag nga Yawa ngan Satanas, nga nanlilimbong ha bug-os nga inuukyan nga tuna. Iginlabog hiya ha tuna, ngan an iya mga anghel iginlabog upod niya.
10 Ngan nakabati ako hin tingog ha langit nga nasiring:
“Yana nahitabo na an katalwasan, ngan an pagpakita han gahum, ngan an kaestablisar han Ginhadian han aton Dios, ngan an paggamit han awtoridad han iya Kristo, kay iginlabog na an parag-akusar ha aton kabugtoan, nga nag-aakusar ha ira ha adlaw ngan gab-i ha atubangan han aton Dios!
11 Napirdi nira hiya tungod han dugo han Kordero ngan tungod han ira pulong ha pagpamatuod, ngan waray nira higugmaa an ira kalag* bisan pa ha atubangan han kamatayon.
12 Tungod hito magkalipay kamo, kamo nga mga langit ngan kamo nga naukoy dida! Kairo han tuna ngan han dagat, kay an Yawa linusad ha iyo nga may daku nga kasina, kay maaram hiya nga halipot na la an iya panahon.”
13 Pakasantop han dragon nga iginlabog na hiya ha tuna, gintimaraot hito an babaye nga nag-anak han bata nga lalaki.
14 Pero iginhatag ha babaye an duha nga pako han daku nga agila, basi hiya makalupad ngadto ha iya lugar ha kamingawan hirayo ha halas. Didto pakakaunon hiya ha sulod hin usa ka panahon ngan mga panahon ngan tunga hin panahon.*
15 Katapos, nagbuga an halas hin tubig nga pariho hin salog tikang ha baba hito ngadto ha babaye basi malumos hiya ha salog.
16 Kondi an tuna binulig ha babaye, ngan iginbuka han tuna an baba hito ngan ginlamoy an salog nga iginbuga han dragon tikang ha baba hito.
17 Ngan an dragon nasina gud ha babaye, ngan binaya basi makiggirra ha mga nanhibilin han binhi han babaye, nga nagtutuman han mga sugo han Dios ngan may buruhaton nga pagpamatuod mahitungod kan Jesus.
Mga footnote
^ Ha literal, “diadema.” Posible nga pariho han turban ha ulo han hadi.
^ O “napirde ito [an dragon].”
^ O “kinabuhi.”
^ Karuyag sidngon, tulo ngan tunga ka panahon.
