Pahayag 2:1-29
2 “Ha anghel han kongregasyon ha Efeso, isurat ini: An nagkakapot han pito nga bitoon ha iya too nga kamot, nga naglalakat ha butnga han pito nga bulawan nga burutangan han lampara, nasiring,
2 ‘Maaram ako han imo mga buhat ngan maduruto nga pagtrabaho ngan han imo pagpailob, ngan maaram ako nga diri mo ginkukonsinter an magraot nga tawo, ngan imo ginsasarihan an mga nasiring nga mga apostol hira pero ha pagkamatuod diri, ngan imo hinbaroan nga mga buwaon hira.
3 Nagpapakita ka liwat hin pagpailob ngan nagpapadayon ka tungod han akon ngaran ngan diri nanluluya.
4 Pero, may nadidirian ako ha imo, kay ginbayaan mo an imo gugma ha tinikangan.
5 “ ‘Salit hinumdumi kon diin ka kahulog, ngan pagbasol ngan buhata an imo mga ginbuhat ha tinikangan. Kay kon diri, makada ako ha imo ngan kukuhaon ko an imo burutangan han lampara ha hinmumutangan hito, kon diri ka magbasol.
6 Pero tama an imo ginbubuhat nga nasisina ka ha mga buhat han sekta ni Nicolas, nga nasisinahan ko liwat.
7 An may talinga sadang mamati ha ginsisiring han espiritu ha mga kongregasyon: An nagdadaog ha pakig-away pakakaunon ko han bunga han kahoy han kinabuhi nga aada ha paraiso han Dios.’
8 “Ha anghel han kongregasyon ha Smirna, isurat ini: Hiya nga amo ‘an Una ngan an Urhi,’ nga namatay ngan nabanhaw, nasiring,
9 ‘Maaram ako han imo kasakitan ngan kapobrehan—pero riko* ka—ngan han pagpasipara han mga nasiring nga Judio hira pero ha pagkamatuod diri, lugod sinagoga hira ni Satanas.
10 Ayaw kahadlok han hirani mo na antuson. Kitaa! An Yawa padayon nga magpipriso han iba ha iyo basi bug-os nga sarihan kamo, ngan basi mag-agi kamo hin kasakitan ha sulod hin napulo ka adlaw. Pamatud-i nga matinumanon ka bisan pa ha kamatayon, ngan ihahatag ko ha imo an korona nga kinabuhi.
11 An may talinga sadang mamati ha ginsisiring han espiritu ha mga kongregasyon: An nagdadaog ha pakig-away diri gud mahiaagom han ikaduha nga kamatayon.’
12 “Ngan ha anghel han kongregasyon ha Pergamo, isurat ini: Hiya nga may matarom ngan hilaba nga espada nga paluyoluyo an tarom nasiring,
13 ‘Maaram ako kon diin ka naukoy, karuyag sidngon, kon diin nahimumutang an trono ni Satanas; pero bisan pa hito nagpapadayon ka nga maunungon ha akon ngaran, ngan waray mo isalikway an imo pagtoo ha akon bisan ha panahon ni Antipas nga akon matinumanon nga saksi, nga ginpatay ha iyo lugar nga inuukyan ni Satanas.
14 “ ‘Pero may mga nadidirian ako ha imo, kay may-ada ka dida mga nagsusunod ha katutdoan ni Balaam, nga nagtutdo kan Balak nga magbutang hin hiparakdolan* ha mga anak han Israel, basi hira kumaon han mga iginhalad ha mga dios-dios ngan magbuhat hin imoralidad.*
15 Sugad man, may-ada ka liwat mga nagsusunod ha katutdoan han sekta ni Nicolas.
16 Salit pagbasol. Kay kon diri, makada dayon ako ha imo, ngan makikig-away ako ha ira gamit an hilaba nga espada ha akon baba.
17 “ ‘An may talinga sadang mamati ha ginsisiring han espiritu ha mga kongregasyon: An nagdadaog ha pakig-away tatagan ko han manna nga tinago, ngan tatagan ko hiya hin busag nga bato nga ginsuratan hin bag-o nga ngaran nga waray iba nga maaram kondi an nakarawat hito.’
18 “Ngan ha anghel han kongregasyon ha Tiatira, isurat ini: An Anak han Dios nga may mga mata nga pariho hin nagdidilaab nga kalayo, ngan mga tiil nga pariho hin puro nga tumbaga, nasiring,
19 ‘Maaram ako han imo mga buhat, ngan han imo gugma, pagtoo, sagrado nga buruhaton, ngan pagpailob, ngan han imo mga buhat yana nga mas maopay kay han naglabay.
20 “ ‘Pero may nadidirian ako ha imo, kay imo ginkukonsinter an babaye nga hi Jezebel, nga nagpapakapropetisa. Nagtututdo hiya ngan naglilimbong ha akon mga uripon basi hira magbuhat hin imoralidad ngan kumaon han mga iginhalad ha mga dios-dios.
21 Gintagan ko hiya hin panahon nga magbasol, pero diri niya karuyag magbasol han iya imoralidad.
22 Kitaa! Akon hiya sisirotan hin grabe nga sakit, ngan an mga nakikig-adulteryo* ha iya sisirotan ko hin daku nga kasakitan, kon diri hira magbasol han ira mga buhat nga pariho han iya mga buhat.
23 Ngan papatayon ko an iya mga anak pinaagi hin makamaratay nga sakit, basi mahibaro an ngatanan nga kongregasyon nga ako an nag-uusisa han gihilarumi nga mga panhunahuna* ngan han mga kasingkasing, ngan an tagsa ha iyo babalosan ko uyon ha iyo mga buhat.
24 “ ‘Pero an iba ha iyo nga aada ha Tiatira, an ngatanan nga diri nasunod hito nga katutdoan, ngan an mga waray mahibaro han tinatawag nga “hilarom nga mga butang” tikang kan Satanas, ginsisidngan ko: Diri ko kamo gintatagan hin dugang nga pinas-an.
25 Sugad man, tipigi niyo an mag-opay nga butang nga aada ha iyo tubtob ha akon pag-abot.
26 An nagdadaog ha pakig-away ngan nagsusubad han akon mga buhat tubtob ha kataposan tatagan ko hin awtoridad ha mga nasud,
27 pariho han awtoridad nga nakarawat ko tikang ha akon Amay. Pagmamandoan niya an katawohan gamit an tungkod nga puthaw basi mabuong hira pariho hin mga surudlan nga hinimo tikang ha lapok.
28 Ngan ihahatag ko ha iya an bitoon ha kaagahon.
29 An may talinga sadang mamati ha ginsisiring han espiritu ha mga kongregasyon.’
Mga footnote
^ O “mayaman.”
^ O “hinungdan ha pagluya han pagtoo.” Kitaa an “Kahipakdol” ha Glossary.
^ Kitaa an footnote ha Mat 5:32.
^ Kitaa an “Adulteryo” ha Glossary.
^ Ha literal, “mga kidney.”
