Pahayag 6:1-17
6 Nakita ko han gintangtang han Kordero an usa han pito nga selyo, ngan nabatian ko an usa han upat nga kerubin nga nasiring ha daku nga tingog nga pariho hin dalugdog: “Kadi!”
2 Ngan nakita ko an usa nga busag nga kabayo, ngan an nasakay hito may pana; ngan gintagan hiya hin korona, ngan sinulong hiya basi pirdihon an mga kaaway ngan tapuson an iya pakig-away.
3 Han gintangtang niya an ikaduha nga selyo, nabatian ko an ikaduha nga kerubin nga nasiring: “Kadi!”
4 Ngan ginawas an usa nga kabayo nga pula an kolor; ngan an nasakay hito gintagan hin awtoridad ha pagkuha han kamurayawan ha tuna basi hira magparaptayay; ngan gintagan hiya hin daku nga espada.
5 Han gintangtang niya an ikatulo nga selyo, nabatian ko an ikatulo nga kerubin nga nasiring: “Kadi!” Ngan nakita ko an usa nga itom nga kabayo, ngan an nasakay hito may ginkakaptan nga timbangan.
6 Ngan nabatian ko nga may tingog tikang ha butnga han upat nga kerubin nga nasiring: “Mga usa ka kilo* nga trigo para ha usa ka denaryo,* ngan tulo ka kilo nga sebada para ha usa ka denaryo; ngan ayaw pabay-i nga maubos an lana han olibo ngan an bino.”
7 Han gintangtang niya an ikaupat nga selyo, nabatian ko an tingog han ikaupat nga kerubin nga nasiring: “Kadi!”
8 Ngan nakita ko an usa nga kabayo nga duason, ngan an nasakay hito may ngaran nga Kamatayon. Nagsisinunod hirani ha iya an Hades.* Ngan gintagan hira hin awtoridad ha ikaupat nga bahin han tuna, ha pagpatay pinaagi hin hilaba nga espada, gutom, makamaratay nga sakit ngan mapintas nga mga hayop ha tuna.
9 Han gintangtang niya an ikalima nga selyo, nakita ko ha ubos han halaran an dugo* han mga ginpatay tungod han pulong han Dios ngan tungod han ira pagpamatuod.
10 Ngan nagsiring hira ha daku nga tingog: “Soberano nga Ginoo nga baraan ngan totoo, tubtob san-o ka magpupugong ha paghukom ngan pagbulos ha mga naukoy ha tuna para ha amon dugo?”
11 An tagsa ha ira gintagan hin hilaba ngan busag nga bado, ngan ginsidngan hira nga pumahuway hin halipot nga panahon, tubtob nga makompleto an kadamu han ira mga igkasi-uripon ngan han ira kabugtoan nga hirani na patayon pariho ha ira.
12 Nakita ko han gintangtang niya an ikaunom nga selyo, ngan naglinog hin makusog; ngan an adlaw nag-itom sugad hin sako nga panapton nga hinimo tikang ha barahibo,* ngan an bulan nagpula pariho hin dugo,
13 ngan an mga bitoon ha langit nahulog ha tuna, pariho han nagkakahudlog nga hilaw nga mga bunga han kahoy nga igera kon nababay-og han makusog nga hangin.
14 Ngan an langit nawara pariho hin basahon nga ginlukot, ngan an tagsa nga bukid ngan isla nakuha ha hinmumutangan hito.
15 An mga hadi ha tuna, an hitaas nga mga opisyal, an mga kumander ha militar, an mga riko, an mga makusog, an tagsa nga uripon, ngan an tagsa nga tawo nga may kagawasan nanago ha mga lungib ngan ha dagku nga bato ha kabukiran.
16 Padayon nga nasiring hira ha kabukiran ngan ha dagku nga bato: “Matimpag kamo ha amon ngan tagoa kami tikang ha nawong han Dios nga nalingkod ha trono ngan tikang ha kangalas han Kordero,
17 kay an daku nga adlaw han ira kangalas inabot na, ngan hin-o an makakaatubang hito?”
Mga footnote
^ Mga 0.7 kilogramo.
^ Silber nga sinselyo han Roma. Kitaa an Apendise 11.
^ Kitaa an Apendise 8.
^ Ha literal, “mga kalag.”
^ Posible nga barahibo han kanding.
