Pahayag 3:1-22
3 “Ha anghel han kongregasyon ha Sardis, isurat ini: Hiya nga may pito nga espiritu han Dios ngan pito nga bitoon, nasiring, ‘Maaram ako han imo mga buhat, nga buhi ka ha ngaran* la, pero ha pagkamatuod patay ka.
2 Pagbantay ngan parig-ona an mga nanhibilin nga tikamatay na, kay waray ko makita nga ginbuhat* mo an ngatanan nga iginpapabuhat ha imo han akon Dios.
3 Salit hinumdumi pirme kon ano an imo nakarawat ngan hinbatian, ngan padayon nga tumana ito, ngan pagbasol. Kon diri ka magmata, makada gud ako ha imo sugad hin kawatan, ngan diri ka gud mahibabaro kon ano nga oras ako maabot.
4 “ ‘Pero may pipira* dida ha imo ha Sardis nga waray nira hugawi an ira pantungbaw nga mga panapton, ngan maglalakat hira kaupod ko nga nagpakabusag, kay takos hira hito.
5 An nagdadaog ha pakig-away magsusul-ot hin busag nga pantungbaw nga mga panapton; ngan diri ko gud paparaon an iya ngaran ha libro han kinabuhi, lugod kikilalahon ko an iya ngaran ha atubangan han akon Amay ngan han iya mga anghel.
6 An may talinga sadang mamati ha ginsisiring han espiritu ha mga kongregasyon.’
7 “Ha anghel han kongregasyon ha Filadelfia, isurat ini: Hiya nga baraan ngan totoo, nga may yawi ni David, nga nag-aabri basi waray makasada ngan nagsasada basi waray makaabri, nasiring,
8 ‘Maaram ako han imo mga buhat. Kitaa! Nag-abri ako hin purtahan para ha imo, nga waray makakasada. Ngan maaram ako nga may gutiay ka nga gahum, ngan gintuman mo an akon pulong ngan ginpamatud-an mo nga matinumanon ka ha akon ngaran.
9 Adton tikang ha sinagoga ni Satanas nga nasiring nga Judio hira pero ha pagkamatuod diri, lugod nagbubuwa hira—kitaa! pakakadaon ko hira ngan payuyukboon ha imo tiilan ngan papahibaroon ko hira nga hinigugma ko ikaw.
10 Tungod kay gintuman mo an imo hinbatian mahitungod han akon pagpailob,* puproteksyonan ko ikaw ha oras han pagsari nga maabot ha bug-os nga inuukyan nga tuna, basi sarihan an mga naukoy ha tuna.
11 Makada dayon ako. Padayon nga kapti hin marig-on an aada ha imo, basi waray bisan hin-o nga makakuha han imo korona.
12 “ ‘An nagdadaog ha pakig-away hihimoon ko nga harigi ha templo han akon Dios, ngan diri na gud hiya magawas tikang hito, ngan isusurat ko dida ha iya an ngaran han akon Dios ngan an ngaran han syudad han akon Dios, an bag-o nga Jerusalem nga nalusad tikang ha langit tikang ha akon Dios, ngan isusurat ko liwat an akon bag-o nga ngaran.
13 An may talinga sadang mamati ha ginsisiring han espiritu ha mga kongregasyon.’
14 “Ha anghel han kongregasyon ha Laodicea, isurat ini: An Amen, nga amo an matinumanon ngan totoo nga saksi, ngan an una nga ginhimo han Dios, nasiring,
15 ‘Maaram ako han imo mga buhat, nga diri ka matugnaw ngan diri man liwat mapaso. Karuyag ko unta nga matugnaw ka o mapaso.
16 Salit tungod kay malanhod ka, diri matugnaw ngan diri man liwat mapaso, itutupra ko ikaw.
17 Tungod kay nasiring ka: “Riko ako ngan nagkaada hin karikohan* ngan diri na nagkikinahanglan hin bisan ano,” pero diri ka maaram nga makalolooy ka, pobre, buta, ngan hubo,
18 ginsasagdonan ko ikaw nga pumalit ha akon hin bulawan nga ginpurog ha kalayo basi ka magriko, ngan hin busag nga pantungbaw nga mga panapton basi may igsul-ot ka, ngan an kaarawdan han imo pagkahubo diri maibuhayhag, ngan palit liwat hin tambal han imo mga mata basi ka makakita.
19 “ ‘An ngatanan nga akon hinigugma ginsasaway ko ngan gindidisiplina. Salit magin aktibo* ka ngan magbasol.
20 Kitaa! Natindog ako ha purtahan ngan nagtutuktok. Kon may mamati han akon tingog ngan mag-abri han purtahan, makadto ako ha iya balay ngan mangingiklop kaupod niya.
21 An nagdadaog ha pakig-away akon palilingkuron kaupod ko ha akon trono, sugad la nga ako nagdaog ngan liningkod kaupod han akon Amay ha iya trono.
22 An may talinga sadang mamati ha ginsisiring han espiritu ha mga kongregasyon.’ ”
Mga footnote
^ O “reputasyon.”
^ O “gintapos.”
^ Ha literal, “pipira nga ngaran.”
^ O “ginsubad an akon pagpailob.”
^ O “kayamanan.”
^ O “debotado; madasigon.”
