Pahayag 18:1-24
18 Katapos hito, nakakita ako hin usa pa nga anghel nga may daku nga awtoridad nga nalusad tikang ha langit; ngan an tuna naglamrag tungod han iya himaya.
2 Ngan ginuliat hiya: “Narumpag na hiya! An Babilonya nga Gamhanan narumpag na, ngan nagin urukyan hiya han mga demonyo ngan nagin taragoan nga lugar han ngatanan nga maraot nga espiritu* ngan han ngatanan nga mahugaw ngan makasisina gud nga tamsi!
3 Tungod han bino han makusog nga hingyap han iya imoralidad* nabiktima an ngatanan nga nasud, ngan an mga hadi ha tuna nagkaada imoral nga relasyon ha iya, ngan an mga negosyante ha tuna nagriko tungod han gahum han iya kahimyang nga diri niya iginkakaawod.”
4 Katapos nakabati ako hin usa pa nga tingog tikang ha langit nga nasiring: “Gawas ha iya, katawohan ko, kon diri niyo karuyag mahidabi ha iya mga sala, ngan kon diri niyo karuyag kumarawat hin bahin han iya mga peste.
5 Kay an kadamu han iya sala tubtob na ha langit, ngan nahinunumdoman han Dios an iya maraot nga mga buhat.
6 Balusi hiya pariho han iya pagtratar ha iba, oo, doble an ibalos ha iya tungod han mga butang nga iya ginbuhat; an irimnon nga iya ginsalakot ha kopa salakti hin doble nga kadamu para ha iya.
7 Tungod kay ginhimaya niya an iya kalugaringon ngan nagkinabuhi hiya ha kahimyang nga diri niya iginkakaawod, paantosa hiya hin kasakit ngan kabido. Kay ha iya kasingkasing padayon nga nasiring hiya, ‘Nalingkod ako sugad nga rayna, ngan diri ako balo, ngan diri gud ako makakaeksperyensya hin kabido.’
8 Tungod hito, ha usa ka adlaw maabot ha iya an mga peste, an kamatayon, kabido, ngan gutom. Ngan bug-os nga masusunog hiya ha kalayo, kay hi Jehova nga Dios, nga naghukom ha iya, makusog.
9 “Ngan an mga hadi ha tuna nga nagkaada imoral nga relasyon ha iya ngan nagkinabuhi upod niya ha kahimyang nga diri niya iginkakaawod, magtatangis ngan magpupukpok han ira dughan ha kasubo tungod ha iya, kon makita nira an asó han iya kasunog.
10 Matindog hira ha hirayo kay nahahadlok hira han iya kasakit ngan masiring, ‘Kairo, kairo mo, gamhanan nga syudad han Babilonya, ikaw nga marig-on nga syudad, kay ha sulod hin usa ka oras inabot ha imo an paghukom!’
11 “An mga negosyante ha tuna nagtatangis ngan nabibido liwat tungod ha iya, kay waray na mapalit han ira damu nga tinda,
12 mga tinda nga bulawan, silber, marahalon nga bato, mga perlas, maopay nga klase hin tela, purpura nga tela, seda ngan pula nga tela; ngan ngatanan nga hinimo tikang ha mahamot nga kahoy, ngatanan nga klase hin produkto nga hinimo tikang ha marpil,* marahalon nga kahoy, tumbaga, puthaw, ngan marmol;
13 sugad man han sinamon, mga panakot tikang ha India, insenso, mahamot nga lana, busag nga insenso, bino, lana han olibo, pino nga harina, trigo, mga baka, mga karnero, mga kabayo, mga karuwahe, mga uripon, ngan mga tawo.
14 Oo, ginbayaan ka na han maopay nga bunga nga ginhihingyap han imo kalag, ngan nawara na ha imo an ngatanan nga marasa nga pagkaon pati an makaruruyag nga mga butang, ngan diri na gud ito hiaagian utro.
15 “An mga negosyante nga nagbaligya hito nga mga butang, nga nagriko tungod ha iya, matindog ha hirayo tungod han ira kahadlok han iya kasakit ngan magtatangis hira ngan mabibido,
16 nga nasiring, ‘Kairo, kairo han gamhanan nga syudad, nga may sul-ot nga maopay nga klase hin tela, purpura ngan pula nga tela, ngan damu nga alahas nga bulawan, marahalon nga bato ngan perlas,
17 kay ha sulod hin usa ka oras nawara an sugad kadamu nga karikohan!’
“Ngan an kada kapitan han barko ngan an kada tawo nga nagbibiyahe ha dagat, an mga tripulante ngan an ngatanan nga an pakabuhi ha dagat, tinindog ha hirayo
18 ngan ginuliat hira samtang ginkikita an asó han pagsunoga ha iya ngan nagsiring, ‘Ano nga syudad an pariho han gamhanan nga syudad?’
19 Ngan nagsabrag hira hin tapotapo ha ira ulo ngan ginuliat, nanangis ngan nagkabibido, ngan nagsiring, ‘Kairo, kairo han gamhanan nga syudad, nga tungod han iya karikohan nagriko an mga may sakayan ha dagat, kay ha sulod hin usa ka oras nabungkag hiya!’
20 “Malipay ka tungod ha iya, O langit, sugad man kamo nga mga baraan ngan mga apostol ngan mga propeta, kay ginhukman na hiya han Dios tungod ha iyo!”
21 Katapos, gin-alsa han usa nga makusog nga anghel an bato nga pariho hin daku nga gilingan nga bato ngan iginlabog ito ha dagat, nga nasiring: “Sugad hini kadagmit ilalabog an gamhanan nga syudad han Babilonya, ngan diri na gud hiya makikita utro.
22 Ngan waray na gud hibabatian utro ha imo nga tingog han mga magkaranta nga nagpapatunog han ira mga arpa, mga musikero, mga paragplawta, ngan mga paragtrumpeta. Waray na liwat hiaagian ha imo nga eksperto nga parahimo han bisan ano nga produkto, ngan waray na gud hibabatian ha imo nga tunog han gilingan nga bato.
23 Waray na gud kahayag han lampara nga maglalamrag utro ha imo, ngan waray na tingog han karaslon nga lalaki ngan han iya maarasawa nga hibabatian utro ha imo. Tungod ito han imo mga negosyante nga prominente ha tuna, kay pinaagi han imo pagbuhat hin espiritismo an ngatanan nga nasud nalimbongan.
24 Oo, hin-agian ha iya an dugo han mga propeta ngan han mga baraan ngan han ngatanan nga ginpatay ha tuna.”
Mga footnote
^ O “gininhawa; giniyahan nga kapahayagan.”
^ Kitaa an footnote ha Mat 5:32.
^ Ha English, ivory. Kitaa an “Ivory” ha Glossary.
