BAEBELE YA RENG
Mesia
Baebele e ne ya bolelela pele gore Mesia o ne a tla tla mo lefatsheng mme a golole batho mo bolwetseng, mo pogong le mo losong. A Jesu Keresete ke ene Mesia?
Batho ba ne ba tla lemoga Mesia jang?
Boporofeti jwa Baebele jwa re Mesia kgotsa Keresete o ne a tla diragatsa dikarolo tse pedi tse di neng di tla direga ka nako e e sa tshwaneng. * O ne a tla diragatsa karolo ya ntlha e le motho. Gore batho ba kgone go mo lemoga, bakwadi ba Baebele ba ne ba bolelela pele ka botshelo le bodiredi jwa gagwe. Tota e bile, boporofeti jwa Baebele bo bua thata ka “go naya bosupi ka Jesu.”—Tshenolo 19:10.
Fa Jesu a ne a le mo lefatsheng o ne a bontsha maoko a se a tla se direlang batho fa e le sebopiwa sa moya
SE BAEBELE E SE BUANG
Mesia o ne a tla . . .
-
Nna setlogolo sa ga Kgosi Dafide.—Isaia 9:7; Luke 3:23-31. *
-
Tsholelwa kwa motseng wa Bethelehema.—Mika 5:2; Luke 2:4-7.
-
Nna moreri yo o ikokobeditseng wa “dikgang tse di molemo.”—Isaia 61:1; Luke 4:43.
-
Nyadiwa le go tshwarwa kwa ntle ga lebaka.—Isaia 53:3; Mathaio 26:67, 68.
-
Okiwa ka dipapetlana di le 30 tsa selefera.—Sekarea 11:12, 13; Mathaio 26:14, 15.
-
Didimala fa balatofatsi ba gagwe ba mo atlholela loso ka maaka.—Isaia 53:6, 7; Mathaio 27:12-14.
-
Nna setlhabelo sa “kwana” se se neng se tla tlosa maleo, le go dira gore batho ba amogelwe ke Modimo.—Isaia 53:7; Johane 1:29, 34, 36.
-
Bolawa mme go se lerapo lepe la gagwe le le robiwang.—Pesalema 34:20; Johane 19:33, 36.
-
Fitlhwa le bahumi.—Isaia 53:9; Mathaio 27:57-60.
-
Tsosiwa ka letsatsi la boraro.—Mathaio 16:21; 28:5-7.
Boporofeti jono jotlhe le jo bongwe bo diragaditswe mo go Jesu. Gape o ne a fodisa balwetse a bo a tsosa baswi. Seno se re tlhomamisetsa gore e ne e le Mesia e bile se re thusa go dumela mo dilong tse Baebele e reng o tla di direla batho mo lefatsheng lotlhe mo isagweng. (Luke 7:21-23; Tshenolo 21:3, 4) Fa Jesu a sena go tsosiwa, o ne a nna mo ‘seatleng sa moja’ sa Modimo a letetse go wetsa tiro ya gagwe e le Mesia.—Pesalema 110:1-6.
“Fa Keresete a goroga, ga a kitla a dira ditshupo tse di fetang tse monna yono o di dirileng, ga ke re?”—Johane 7:31.
Mesia o tla dira tiro efe?
Bajuda ba mo motlheng wa ga Jesu ba ne ba solofetse gore Mesia o tla ba golola mo pusong ya Baroma a bo a busa Iseraele. (Ditiro 1:6) Balatedi ba ga Jesu ba Bajuda ba ne ba tlhaloganya moragonyana gore o ne a tla diragatsa karolo ya gagwe a le kwa legodimong e le sebopiwa se se maatla sa moya e bile a neilwe taolo yotlhe.—Mathaio 28:18.
SE BAEBELE E SE BUANG
Mo karolong ya bobedi, Mesia o tla . . .
-
Busa e le Kgosi ya Bogosi Jwa Modimo, e leng puso ya lefatshe lotlhe.—Daniele 7:13, 14; Tshenolo 11:15.
-
Segofatsa batho botlhe ba ba dumelang mo go ene.—Genesise 22:17, 18; Pesalema 72:7, 8.
-
“Boifisa ditšhaba di le dintsi” le babusi ba tsone fa a di fedisa ka gonne di le kgatlhanong le ene.—Isaia 52:15; Tshenolo 19:19, 20.
-
Boloka “boidiidi jo bogolo” jwa batho ba ba siameng ba ba tswang mo ditšhabeng tsotlhe gore ba tshele mo lefatsheng le lesha la kagiso.—Tshenolo 7:9, 10, 13-17.
-
Tsosetsa baswi mo lefatsheng la Paradaise, a dira seno mmogo le Jehofa Modimo.—Luke 23:43; Johane 5:21, 28, 29.
-
Ruta batho ba a ba busang go tshela ka kagiso ya mmatota.—Isaia 11:1, 2, 9, 10.
-
Tlosa boleo jo bo dirang gore batho ba lwale ba bo ba swe.—Johane 1:29; Baroma 5:12.
-
Senya ditiro tsa ga Satane a bo a dira gore batho ba busiwe ke Jehofa Modimo.—1 Bakorintha 15:25-28; 1 Johane 3:8.
Jesu o diragaditse karolo ya ntlha e le Mesia. O tla diragatsa le ya bobedi. Ka jalo, batho ba ba botlhale ba ithuta ka ene ka tlhoafalo ka gonne Jesu o ne a re: “Ke nna tsela le boammaaruri le botshelo.”—Johane 14:6.
“Mo metlheng ya gagwe mosiami o tla tlhoga, le letlotlo la kagiso go fitlha ngwedi e sa tlhole e le teng. O tla nna le babusiwa . . . go ya kwa mafelelong a lefatshe.” —Pesalema 72:7, 8.
^ ser. 5 “Mesia” ke lefoko la Sehebera mme le le tshwanang le lone la Segerika ke “Keresete.”—Johane 1:41.
^ ser. 7 Ditemana tsa ntlha di bua ka boporofeti; tsa bobedi di tlhalosa kafa bo diregileng ka gone.
Tse Dingwe Tse O ka Di Kgatlhegelang
DIKARABO TSA DIPOTSO TSA BAEBELE
A Jesu ke Ene a Diragaditseng Boporofeti jo bo Buang ka Mesia?
A go ka direga gore go nne le Bomesia ba le mmalwa?
TORA YA TEBELO
“Re Bone Mesia”!
Ba le bantsi ba dumela gore Jesu ke Mesia yo o solofeditsweng. Ba bangwe ga ba dumele. Tlhatlhoba se Baebele e se bolelang.
