Den Israelsma ben musu wroko tranga leki srafu. Yehovah seni Moses nanga Aron fu gi Farao, a kownu fu Egepte a boskopu disi: ’Seni mi pipel gwe, so taki den kan anbegi mi na ini a sabana.’ Farao di ben abi heimemre piki: ’Mi no e span nanga san Yehovah taki èn mi no o seni den Israelsma gwe.’ Farao meki den Israelsma wroko moro tranga. Yehovah ben o strafu Farao. Yu sabi fa a du dati? A tyari tin rampu kon na tapu Egepte. Yehovah taigi Moses: ’Farao no e arki mi. Na m’manten a o de na Nijl-liba. Go na en èn taigi en taki mi o meki a watra fu Nijl-liba tron brudu, fu di a no seni mi pipel gwe.’ Moses go na Farao soleki fa Yehovah taigi en. Farao ben e luku fa Aron naki en tiki na tapu a watra fu a liba. Ne a watra tron brudu. A liba bigin tingi, den fisi dede èn nowan krin watra ben de na ini Nijl-liba di den ben kan dringi. Tòg Farao no ben wani seni den Israelsma gwe.

 Seibi dei baka dati, Yehovah seni Moses go baka na Farao fu taigi en disi: ’Efu yu no seni mi pipel gwe, Egepte o furu nanga todo.’ Farao no seni den Israelsma gwe. Dati meki Aron opo en tiki go na loktu, dan todo bigin furu a heri kondre. Todo ben de na ini den sma oso, na tapu den bedi èn na ini den baki pe den e masi blon. Todo ben de na ala sei! Farao aksi Moses fu begi Yehovah fu puru den todo. A pramisi taki a ben o seni den Israelsma gwe. Dati meki Yehovah puru den todo. Den Egeptesma tyari den todo kon na wán èn den poti den na ipi. A heri kondre bigin tingi. Tòg a leisi disi srefi Farao no seni a pipel gwe.

Dan Yehovah taigi Moses: ’Aron musu naki a gron nanga en tiki, dan a doti o tron maskita.’ Wantewante maskita ben de na ala sei. Sonwan fu den man di ben e wroko gi Farao taigi en: ’Na Gado tyari a rampu disi kon.’ Tòg Farao no ben wani seni den Israelsma gwe.