Abraham nanga Sara ben trow furu yari kba. Den gwe libi den moi oso na ini Ur èn den ben e libi na ini tenti. Ma Sara no ben e krutukrutu fu di a ben e fertrow tapu Yehovah.

Sara ben wani wan pkin so te, taki a taigi Abraham: ’Efu mi umasrafu Hagar kisi wan pkin, dan a o de leki na mi pkin.’ Bakaten Hagar kisi wan manpkin. En nen na Ismael.

Furu yari baka dati, di Abraham ben abi 99 yari èn Sara ben abi 89 yari, dri man kon na den. Abraham kari den kon fu rostu pkinso na ondro wan bon èn fu nyan wan sani. Yu sabi suma na den man disi? Den ben de engel. Den taigi Abraham: ’Tra yari yu nanga yu frow o abi wan manpkin.’ Sara ben de na ini a tenti e arki. A lafu èn a ben prakseri: ’Mi o man kisi wan pkin, now di mi kon owru so?’

A tra yari Sara kisi wan manpkin, soleki fa na engel fu Yehovah ben pramisi. Abraham kari en Isak. A nen disi wani taki „Lafu”.

Di Isak ben abi feifi yari, Sara si taki Ismael ben abi a gwenti fu dreigi en. Fu di a no ben wani taki Ismael du ogri nanga a boi fu en,  meki a go na Abraham èn a aksi en fu seni Hagar nanga Ismael gwe. Na a bigin Abraham no ben wani. Ma fu di Yehovah ben wani taki sani go bun nanga Isak, meki a taigi Abraham: ’Arki Sara. Mi o sorgu gi Ismael. Ma na Isak mi o gebroiki fu du san mi pramisi.’