Wan neti Nebukadnesar kisi wan dren di ben meki a frede. A kari ala den koniman fu en kon fu ferteri en san a dren wani taki. Ma nowan fu den ben man du dati. Te fu kba, a kownu taki nanga Danièl.

Nebukadnesar taigi Danièl: ’Na ini mi dren mi si wan bigi bon. A gro kon so bigi taki a doro te na hemel. Sma na ala sei fu grontapu ben kan si en. Den w’wiri fu en ben moi èn a ben lai froktu. Den meti ben e suku kowru na ondro a bon èn den fowru ben e meki nesi na tapu den taki fu en. Ne wan engel saka kmoto fu hemel, dan a bari nanga wan tranga sten: „Koti a bon trowe èn koti den taki fu en puru. Ma un musu libi a tompu fu en na ini a gron. Poti wan banti fu isri nanga wan banti fu kopro lontu a tompu. Na ati fu a bon di de wan libisma ati, o kenki kon tron na ati fu wan meti. Èn a o tan so teleki seibi pisi ten psa. Ala sma o sabi taki Gado na Tiriman èn taki a e gi a kownukondre na suma a wani.”’

Yehovah meki Danièl kon sabi san a dren wani taki. Di Danièl ferstan a dren, a kon frede. A taki: ’Lespeki Kownu, mi ben winsi taki a dren disi ben e sori san o psa nanga den feanti fu yu, ma a dren e taki fu yu. Na yu na a bigi bon di den koti trowe. Yu o lasi yu kownukondre èn yu o nyan grasi neleki busmeti. Ma fu di na engel taki dati den musu libi a tompu fu a bon, meki yu o tiri leki kownu baka.’

Wán yari baka di Nebukadnesar kisi a dren, a ben e waka na tapu a daki fu en paleis e luku fa Babilon moi èn fa a bigi. A taki: ’Luku a bigi foto di mi srefi bow. Luku fa mi kfalek!’ A kownu no ben kba taki srefi, di a yere wan sten na hemel taki: ’Nebukadnesar! Now yu lasi yu kownukondre.’

Wantewante Nebukadnesar lasi en ferstan èn a bigin du leki wan meti. Den yagi en kmoto na ini en paleis èn a go libi nanga den busmeti. Nebukadnesar w’wiri kon langa neleki den w’wiri fu aka èn en nangra ben kon de leki den srapu nangra fu fowru.

 Baka seibi yari, Nebukadnesar kisi en ferstan baka èn Yehovah meki a tron kownu fu Babilon. Ne Nebukadnesar taki: ’Mi e prèise Yehovah, a Kownu fu hemel. Now mi sabi taki Yehovah na Tiriman. A e lagi den sma di abi bigifasi èn a e gi a kownukondre na suma a wani.’